Lyenta 13
13
Mye tar yə Barnabas ka Shawulu gə lyentə
1A vor ji-kotte a vɨnə hiwtɨ Antiyok, kpalye da Həmɨnpwa nee də ka ji-lee kəndəshe hananang: Barnabas, Simiyon a mya wa atɨ Sɨlarə dembɨne, Lukiyus a dɨ njiya Sireni, Manayin (a maɗə vor hwoɗi hiɗəti ka həmɨn Hiridus), ɗɨkənə Shawulu. 2Ite təna paya a dɨ kala Həmɨnpwa gbəətə ka gone, Pitɨ Ɗəmɗəmtə a sa, “Taɗimi yə Barnabas ka Shawulu gə lyente na watɨrən gə təna ɗe.” 3Tən ɓe ɗa hiwtə ka gone mbəə. Təna pukə myee mya nggɨlə tyefingrən a nəngrən a ɗarən hiwtə, təna ɓə shea gərən kwasatə gə təna muɗə hee lyentɨngɨn.
Shawulu ka Barnabas a luutɨ Sepɨrus
4Tən mi kpeyingɨn 'ye Pitɨ Ɗəmɗəmtə a lyentɨrən, a yə Barnabas ka Shawulu a muɗə vɨra Salukiya, dɨ hangɨn təna dilə ka koombotə a zə vor Sepɨrus. 5Ite təna tɨlə vɨra Salamis, təna pɨrə vor vəni kəndəshe da Yawude, a hiwa ɓwaare ləme da Həmɨnpwa. Yohana Markus nee ɓwaa kaarən dɨ gwadərən ka lyentə.
6Təna woyə vor luutɨ Sepɨrus ite tawa a nə gbɨnuwe, baa təna tɨlə vor vɨra Pafos. A hangɨn təna pa a nzə-kushi dɨ woyi kər jeronyi kpaltə, ndi Yawuda, kwakɨngɨn nə Bar-Jesuwa naasə mgban Alimas. 7Sɨnə nzə-hwoda hama njiya Sarjiyus Bulus, ndi Sarjiyus Bulus nzə-lelə kɨr-kɨr. Nda wa Barnabas ka Shawulu gə təna sɨ boyən le da Həmɨnpwa. 8Ndi Alimas a nzə-kushingɨn a kangə ta ɓaya yə Barnabas ka Shawulu ka byele, gə ɓe həmə njiya Sarjiyus aa mwadiyale ka Yesu. 9Ndi Shawulu a mya wa atɨ Bulus, sɨnee naa ka Pitɨ Ɗəmɗəmtə, nda nidə nzə-kushingɨn kpəkəkə, nda san atɨ, 10“Hye, hyenə nze da Nzə-tɨmbɨrha, hye teewa mwo sa pepe. Hubosa a naa pas ka vwakaha ɓaye ka kuta hase. Goɗinə hye ɓa ɗaka kɨɗa təfəgi pepeye da Həmɨnpwa? 11Həmɨnpwa kənə nanga, hye ɓa nan. Ɓəgəng hye ɓa welə, ɓa ɓongə tee dɨ naa haa.”
Də a hangɨn tee gbyel, kulitə a kɨttən, haa a gən vut, nda welə. Nda woyə ta ɨl ma ɓa kɨsən kada. 12Ite həmə njiya Sarjiyus a naa sa ɗa, nda mwadiyale, gəkɨlə nda ɗa ndəle ka kəndəshe a nə Həmɨmiye 'ye nda kɨlə.
Bulus ka Barnabas a Antiyoktɨ njiya Pisidiya
13Dɨ Pafos, Bulus kat ka myee təna dɨ woyo a ɗa lyentə kaarən a lyembərə ka koombotə a zə vor vɨra Parga ite a vor njiya Pamfiliya, a hangɨn Yohana Markus a ɗakarən a mɨnə Urshelima. 14Myee mbiɗi mgban a pɨrgə Parga a muɗə vor vɨra Antiyok ite a vor njiya Pisidiya. A hangɨn təna pɨrə vor vɨnə kəndəshe da Yawude a fərə piyatə a nza. 15Beetɨ ite mye bəlshe dɨ vor malɨmi ɓashita Musa kat ka hɨnggə kpalye, mi kpan-kpanyee dɨ nidə vɨnə kəndəshingɨn a lyenshe atɨ a mya ɗiyə yə Bulus ka myee mbiɗi atɨ, “Ji-nuwo, anda hwun ɓə ka i ləməgi ɓa boyo gə ləməgingɨn a gwadə ɓwaare kat, zə boyom.”
16Də Bulus a maɗə a kangə, nda maddə tɨfəngɨn a bɨlə ɓwaare gə təna kɨltən. Nda sarən atɨ, “Mi Israila, kat ka myee dɨ kala Həmɨnpwa gbəətə, samdə kwakingəwnə, kɨləm lanə na boyownə. 17Həmɨnpwata mi Israila a tar yə baagəm, nda wulakarən a fukadərən a ite təna rumo vor njiya Ijip, dɨ ha bɨldə gətɨ dan kɨr-kɨr nda dɨmaadərən gə vor njiyangɨn. 18Nda mbasɨsən ka ɗashi hashe darən baa kyawatə bəwtə fwat a vor laawe. 19Həmɨnpwa a kɨɗa səɗə myee nza njiya Kaana, tən kwaame som-som tukolukpe, nda və myee dan, a tən mi Israila njiyangɨn təna mɨnən nda gəə hɨnggərən nə. 20Ɓəgəng ləngɨn ɗa kyawatə haru fwat ka bəwtə tuf.
“Beetɨ angɨn nə Həmɨnpwa a vərən ji-ɓashite dɨ nidərən baa a tɨlə nzata kpale Samaila. 21Də mi Israila a nyit həme, Həmɨnpwa a vərən Shawulu nze da Kish dɨ kwirə Benjamin, nda ɗa həmne a nəngrən kyawatə bəwtə fwat. 22Beetɨ ite Həmɨnpwa ɓe dɨmdə Shawulu gə həmne, nda nggɨl Dawuda, Dawuda a gəə həmə a nə mi Israila. Həmɨnpwa bwe le a nə Dawuda atɨ, ‘Hɨn ɗɨm wule ma na dɨ mwo vor huboshi, ndi Dawuda nze da Jesi, sɨnə ma ɓa ɗa sa kat na dɨ mwo.’
23“Dɨ kwirə Dawuda Həmɨnpwa a shi ka mi Israila ka Nzə-mbəha, sɨnə Yesu, ɓətɨya nda vərən kwaame. 24Ite Yesu aa nda tiya lyentɨ dan ga a vɨratə, Yohana a tiya hiwatə a haka mi Israila kat atɨ təna por-njiya ka səhase darən mya ɗarən batisɨmatə. 25Naya lyenta Yohana ɓa dɨ mbəə ga a vɨratə, nda ɗiyə ɓwaare atɨ, ‘Hwuna dɨ kana atɨ hɨnə wonə ɓə? Di aa hɨnə mangɨn. Niyəm! Mangɨn ɓa kwaɗa beeshi. Hɨn taa kəni na kupo a paragə salaki hwanye dan.’
26“Ji-nuwo, a hwun je da Ibɨraim, kat kəwnə hwun myee dɨ wegə Həmɨnpwa, a hakam kat Həmɨnpwa a lyanashe ka ləmə mbəhanə. 27Tən myee nza vor Urshelima kat ka mi kpan-kpanye darən ka sate atɨ tənaa leyə atɨ Yesu nə Nzə-mbəha. Təna naadə ləməgyee kpalye a doro, a ləməgyee təna dɨ bələ mba-dɨ-mba a vəni kəndəshe a fərə piyatɨ darən a ite təna ɗa Yesu ɓashitɨ we. 28Nagi a nə sate atɨ tən tam ka mgbaala tən ɓa ɓɨl Yesu kan, kat ka angɨn təna nyisə Bilatus atɨ ma nda ɓɨltən. 29Ite tən ɓe ɗa Yesu wule shee Malɨmtɨ Ɗəmɗəmtə a boyə nəngɨn kat mbəə, təna jangadən gə kada ɓɨdɨmtə a ɗɨkrən a taana mya ɗa a gonggoro fara. 30Kat ka angɨn Həmɨnpwa a maddən gə we ka myentə. 31Beetɨ matsən gə we, myee nda woyo kaarən dɨ Galili a zə vor Urshelima nan ka myentə a vor bətə hananang. Mingɨn 'ye nan ka myentə, tənə ɓəgəng woyi dɨ takale a nəngɨn a haka myee dam kat.
32“Ɓəgəng hinə dɨ boyownə ləmə feme: Wule ləngɨn nə Həmɨnpwa a və yə sɨnggəm kwaame a nəngɨn kaaɗəng. 33Həmɨnpwa naadə ləməgyee nda boyə yə sɨnggəm a nəngəm hɨm je darən dɨ ha maddə Yesu gə we ka myentə. Ɓətɨ mya doro vor Malɨmtɨ Dyemshe saare kpe atɨ,
“ ‘Hyenə nze de,
supo hɨn boyo bwang
hɨn gəə hɨnə Baagu.’#13.33 Naasə: Dyemshe 2.7.
34Diyalə sate atɨ Həmɨnpwa a maddən gə we gə ɓe ndaa pomə a yerə ɓaa nə yang:
‘Hɨn ɓa gwadəwnə mbak-mbak ka shi-pepeye de
'ye na boyə Dawuda a vən kwaame a nəngrən.’#13.34 Naasə: Ishaya 55.3.
35Sə mgban mya doro a haa a vor Malɨmtɨ Ɗəmɗəmtə atɨ,
‘Hye tee dɨ ɗaka kɨsa ɗəmɗəme dəw
nda bə a pomə.’#13.35 Naasə: Dyemshe 16.10.
36“Ləməgyee Həmɨnpwa a boyo, aa a nə Dawuda nda boyə, gəkɨlə ite Dawuda a ɗa Həmɨnpwa lyentə a mbəə kat, Dawuda a mbɨrə, mye ɗɨkrən ɓwaa ka yə sɨnggən, sɨsən pomə gwe kɨɗə ɓaa. 37Ləma Həmɨnpwa a boyo di a nə Yesu nda boya, gə Yesu nə Həmɨnpwa a maddən gə we ka myentə, ndaa pomə gwe.
38“Ji-nuwo, zə leyəm atɨ dɨ haka Yesu nə ɓəmbə mya hiwawnə ləməgi nggurgə səhase. 39Dɨ hakan mgban ma kat mwadiyale mye suɓwagən gəədən pepe gə səhase dan, a səhasa ɓashita Musa aa dɨ mban a suɓwagən. 40Bəmdə myensəwnə ka ləməgyee kpalye a boyo. Gəkɨlə ɓe tənaa naa a nəngəwnə atɨ,
41“ ‘Niyəm hwun ji-sharha,
hwun ɓa ɗa ndəle a mbərə ɓaa,
gəkɨlə hɨnə ɓa ɗa asə a wakasəwnə ɓəgəng,
a wule sa hwunaa dɨ mwakan,
nagi ama a boyownə,
hwunaa dɨ mwakan.’#13.41 Naasə: Habakuk 1.5.”
42Ite Bulus ka Barnabas a dɨmgə vɨnə kəndəshe da Yawude a dɨ muɗə, ɓwaare a nyisərən atɨ, a təna mɨna a boyərən wule ləməgingɨn da Həmɨnpwa a fərə piyate dɨ shi. 43Ite ɓwaare a dɨmə a təkəsə gə vɨnə kəndəshingɨn, imi dɨ vor Yawude kat ka myee pɨra a vor kottɨ darən a koɗə yə Bulus ka Barnabas. Tən Bulus ka Barnabas mgban, təna byelə kaarən gə təna kangə dwat a koɗə Həmɨnpwa ka diyale dɨ vor wuladəha dan.
44A mɨni a fərə piyatɨ da Yawude, hakpanə myee a vor vɨratɨngɨn a dɨmə a peyə gə təna mɨna kɨl le da Həmɨnpwa. 45Mi kpan-kpanye da Yawude ɓe naa təkə-təkətɨ ɓwaaree paya, təna naa ka jiwne, təna tiya ta ɗaasə ka Bulus ta shar ləməgyee nda dɨ boyo.
46Tən yə Bulus ka Barnabas a luwa a sarən ka gbənzɨmtə atɨ, “Hwunə kana mya boyownə le da Həmɨnpwa a kwamətə kat. Gələ hwuna mɨndə le da Həmɨnpwa lə ɓayə, hwunaa mwadiyale kan, hwun ɓɨl nəngəwnə ka kwote hwuna kwo myente kaaru-kaaru. Gə-angɨn hin ɓa ɗakəwnə a muɗə haka myee aa Yawude. 47Ɓətɨya Həmɨnpwa a boyo atɨ,
“ ‘Hyenə ɓɨrte na kangdə
a haka myee aa Yawude,
gə mi vɨratə kat a ɗɨm mbətə dɨ hakəw.’#13.47 Naasə: Ishaya 49.6. ”
48Ite myee aa Yawude ɓe kɨlə she, təna ɗa hanɨngtə, təna ndukodə Həmɨnpwa gə ləmə feme dan, myee mgban Həmɨnpwa a nggɨlə gə təna ɗɨm myente kaaru-kaaru a mwadiyale.
49Ləməgye da Həmɨnpwa a fɨlə a mbəgə vor njiyangɨn kat. 50Yawude a ngama hubo mandyee ka kala Həmɨnpwa, a wule 'ye ka ɗɨmtə kaarən, ka moryi twayee a vɨratɨngɨn. Yawude a ngama hubo mingɨn, a takɨma haa, ɓwaare a marka yə Bulus ka Barnabas a omtɨrən, a dɨmdərən gə vor bətɨ njiyangɨn. 51Yə Bulus ka Barnabas ɓa dɨmə a muɗə, təna kpɨwgə bɨr-bɨrə hangɨn gə mbwayingrən, gə təna bɨldən atɨ səhase da mingɨn mɨnə nəngrən. Təna pɨrə a muɗə vor vɨra Ikoniyom. 52Haa a nɨngə ji-kottə kat, Pitɨ Ɗəmɗəmtə mgban a naadərən ta lyeni ɓwaa kaarən.
Currently Selected:
Lyenta 13: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
