1 Korintiye 12
12
Gəte Pitə a və miye
1Gəngnə ji-nuwo, taa mwi atɨ hwuna gə ka ɗongə leetə a nə wule gəte Pitɨ Ɗəmɗəmtə a və miye. 2Hwun leyə atɨ ite hwun aa ji-kotti, nggələ mya nggəltəwnə a zə kəwnə a koɗə pɨlee taa myenti kaarən. 3Gə ləngɨn na dɨ səwnə atɨ, ma dɨ byeli dɨ haka Pita Həmɨnpwa, aa dɨ sa atɨ, “Mye hiwdə Yesu,” taa ama də mgban ɓa mba satə a sa atɨ, “Yesu nə Həmɨmiye,” na aa dɨ haka Pita Həmɨnpwa.
4Gəte Pitə a ɓyana miye nə som-som, shezə Pitɨngɨn nə hiɗə kal-kal. 5Təfəgi ɗa lyentə nə də som-som, shezə Həmɨnpwa nə hiɗə kal-kal mya dɨ ɗan lyentɨngɨn. 6Zərgi lyente ɓwaare a dɨ ɗa nə də som-som, shezə Həmɨnpwa nə hiɗə kal-kal dɨ və ɓwaare kat gətɨ ɗa lyentɨngɨn.
7Həmɨnpwa a dɨmaadə Pitɨ dan bwang a və nagi ndo ma sa ndi ɓa ɗa lyentə kan gə gwadə ɓwaare kat. 8Ama Pitə a vən gətɨ lee byele, ama mgban lelə kɨr-kɨre dɨ haka Pitɨ hiɗəti, 9ama mwadiyalə kɨr-kɨrə dɨ haka Pitɨ hiɗətɨngɨn. Ama mgban gəti gə nda dɨmdə ootə som-som dɨ sɨtɨ ɓwaare dɨ haka Pitɨ hiɗətɨngɨn, 10ama gətɨ ɗa zərgi shikoshopi, ama gətɨ kpalti, ama gətɨ taka waka zərgi piti, ama gətɨ byelə ka kwaame som-som, ama gətɨ vədə naarə ləməgi kwaame som-som. 11Pitɨ Ɗəmɗəmtə nə hiɗə kal-kal dɨ və nagi ndo ma shingɨn ɓətɨ nda mwo.
Sɨtə hiɗə, shezə base hananang
12Ɓətɨya sɨtɨ ɓwaara nə hiɗə ka base som-som, basengɨn mgban tənə hananang a sɨtɨ ɓwaara hiɗə, sə mgban Ma Həmɨnpwa a Yaɓwarən a gə. 13Gə hɨm kat mye ɗam batisɨmatə dɨ haka Pitɨ hiɗətɨngɨn a sɨtɨ hiɗətɨngɨn da Yesu, nagi nda mangɨn Yawuda, nagi Helinə, nagi nda kɨsa ka ma aa kɨsa, hɨm kat luwom Pitɨ hiɗətɨngɨn a vor hubosəm.
14Mye leyəm atɨ sɨtə nə hiɗə, shezə kote ka base som-som. 15Ɓə mbwara kana sa atɨ, “Gəkɨlə aa hɨn tɨfə, gə ləngɨn asə aa pɨrdi ka sɨtə,” sə mgban wule ɗate aa dɨ ɗɨkdə mbwara nda kwo nzatə a sɨtɨ ɓwaara atɨ gəkɨlə aa ndi tɨfə. 16Mɨni ɓə kwake mgban ndi kana sa atɨ, “Gəkɨlə aa hɨn diiti, gə-angɨn asə aa pɨrdi ka sɨtə,” sə mgban wule ɗate aa dɨ ɗɨkdə kwake nda kwo nzatə a sɨtɨ ɓwaara. 17Ɓə anda sɨtɨ ɓwaara kat gəə dii, ka ndo haa ndi ɓa kɨl le? Ɓə mgban anda sɨtɨ ɓwaara kat kwaki, ka mɨnə ndi ɓa kɨl pomə shine? 18Gə ləngɨn Həmɨnpwa ɗɨkdə nagi ndo basa a sɨtɨ ɓwaara nda gə haa nda gə də ɓətɨ nda mwo. 19Anda sɨtɨ ɓwaara kat basa hiɗə ɓəmbə, ya sɨtɨngɨn ɓa gə? 20Ɓətɨya mya leyəm atɨ base nee som-som a sɨtə, kat ka angɨn sɨtə nə hiɗə kal-kal.
21Ɓe diitə aa boyə tɨfe atɨ, “Taayə mwora ganə,” sə mgban ɓe ne aa boyə mbwara atɨ, “Taayə mwora ganə!” 22Diyala də nə atɨ, wule hee a sɨtɨ ɓwaara a 'ye mya dɨ ushitɨrən gə tənaa nyerə tənə she 'ye ka lyentə a sɨtə. 23Sə mgban wule base a sɨtɨ ɓwaara 'ye mya dɨ niyə ɓətɨ taa fukati kaarən, tənə base mya dɨ vərən fukatə. Wule base a sɨtɨ ɓwaara a 'ye aa wula niti a haa bwange bwang, tənə mya dɨ shea ɗarən fawne, 24she wule base a sɨtɨ ɓwaara a base wula niti pepe, myaawa bəgərən myenti a ɗarən fawne. Shezə Həmɨnpwa a pedə sɨtɨ ɓwaara kat, wule base taa fukati kaarən nda vərən fukatə. 25Nda ɗaasə gə nagi ndo haa a sɨtɨ ɓwaara a ɗa lyentɨ dan, gə ɓe som-somtə aa dɨma a sɨtə, shezə gə nagi ndo basa a sɨtɨ ɓwaara tawa ɗyanga ka kpeyəsən. 26Səngɨn nə ɗa mgban, se kana ɓwa a basa a sɨtə, mbiɗitɨ base kat sɨsərən ɓa otɨrən mgban. Hye kana niyə mgban basa hiɗə kana ɗɨm fukatə, mbiɗitɨ basee kat a sɨtə ɓa ɗa hanɨngtə.
27Gəngnə hwunə sɨtɨ Ma Həmɨnpwa a Yaɓwarən, nagi ndo ma a vorsəwnə ndi basa a sɨsən. 28Səngɨn ɗa Həmɨnpwa a taka lyentə som-som a nə ɓwaare. Sə kwaməte Həmɨnpwa a ɗa sɨnə nda nggɨl kpe-lagbe, kpeyətə, tənə kpalye, mwaakɨnətə, tənə ji-kəndəshe. Sə mgban nda nggɨl myee dɨ ɗa zərgi shikoshopye, ka myee ka gətə dɨ dɨmdə ootə gə sɨtɨ ɓwaare, ka myee dɨ woyi gwadə ɓwaare ka lyentə som-som, ka myee ka kpanə shala lyentə gə ɓwaare a ɗatɨrə pepe, ɗɨkənə wule myee dɨ byeli ka kwaame som-som. 29Na ɗiyə atɨ ɓwaare nə kat kpe-lagbe ma? Ɓwaare nə kat kpalye? Ɓwaare nə kat ji-kəndəshe? Ɓwaare nə kat dɨ ɗa səkushipe? 30Ɓwaare nə kat ka gətɨ dɨm oota? Ɓwaare nə kat dɨ byeli ka kwaame som-som? Ɓwaare nə kat lee naarə kwaame som-som? 31Ndɨka hwuna mɨndə hubosəwnə a ɨl gəte pɨri ka fukatə kat.
Gəngnə hɨn ɓa bɨləwnə sa wula pɨri kat.
Currently Selected:
1 Korintiye 12: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
