Паволонь сёрмазо Галатияв 5

Христианонь олячись

1Христос олякстомтымизь минек олячис. Истя, аштеде кеместэ ды илинк тонговто прянк мекев урексчинть ашкос!

2Кунсолодоя! Мон, Павол, яволявтан тенк: бути тынь теевтядо эстенк киськепень керявтома, сестэ Христосонь эйстэ кодамояк лезэ тенк а ули. 3Мон таго кортан-кармавтан тенк: эрьвантень, кие теевти керявтома, эряви топавтомс Коень весе вешематнень. 4Тынь, кить терявтыть теевемс Пазонть икеле чумовтомокс Коенть топавтома вельде, керявиде-явиде Христосонь эйстэ ды прыде-туиде Пазонь чанстенть эйстэ. 5Минек жо ули седейнежедьксэнек: Пазось ловсамизь чумовтомокс кемеманок кисэ, ды тень минь кемезь учотано Оймеялтонть вийсэ. 6Зярдо ломанесь эри Христос Иисус марто вейсэндязь, сестэ ялатеке: керявтозь сон эли апак керявто. Эрявиксэсь тесэ – ансяк кемемась, конась невтеви вечкемасо.

7Тынь уш истя парсте молиде икелев! Кие эно стясь тынк кинть лангс ды теидизь видечинть а кунсолыцякс? 8Истямо мельс тынк путыдизь, нама, аволь тынк тердиця Пазось. 9Кода кортави: аламошка оргатне сыргавтсызь весе чапаксонть. 10Азоронть лангс нежедезь мон, ялатеке, кеман тенк: тынь лиякс а карматадо арсеме. А вана сенень, кона тынк кавтолдовты, кие сон илязо уле, максови Пазонть пельде чумонь пандома. 11Кемиця ялган! Бути мон алкукс икеле ладсо кортавлинь: керявтомась эряви, – сестэ мезень кисэ монь яла пансить? Бути те улевель истя, сестэ Христосонь крёстось уш аволь уле пупордямо кевекс. 12Вай, пек вадря улевель, бути сеть, конат тынк кавтолдовтыть-чаракавтыть киськепень керявтоманть коряс, допрок пичкавтовлизь эсь пряст!

13Тынк жо, кемиця ялган, Пазось тердидизь олячис. Ансяк те олячинть илинк тее эсенк пежетев обуцянь мельтнень топавтомакс. Мекевланк, вечкезь важодеде вейкенк-вейкенк туртов. 14Эдь Коень весе вешематне кирдевить неть валтнэсэ: «Вечкть малавиксэть кода эсь прят». 15Бути истя тынь вейкенк-вейкенк портядо ды сэвтядо, сестэ, ванодо, вейкенк-вейкенк допрок аволиде маштне.

Пазонь Оймеялтось ды ломантнень пежетев обуцясь

16Мон вана мезде кортан: свал эрядо Пазонь Оймеялтонть ветямонзо-мереманзо коряс, ды сестэ тынь а карматадо топавтомо пежетев обуцянк мелензэ. 17Се, мезе мелезэ теемс тынк пежетев обуцянть, моли Оймеялтонть каршо. Се жо, мезе мелезэ теемс Оймеялтонть, моли тынк пежетев обуцянть каршо. Сынь свал тюрить карадо-каршо. Тень кувалт тыненк а тееви истя, кода эряволь теемс меленк коряс. 18Бути тынк вети Оймеялтось, сестэ Коенть арась азорксчизэ тынк лангсо. 19Ломанень пежетев обуцянть тевензэ весень сельме икеле: те – мирде эли ни икеле авидечи, усксевемат-ускурямот, аванькс бажамот, визьксэнь тевть, 20аволь алкуксонь пазнэнь сюконямо, мунямо-орожиямо, ятокс улема, сёвномат, вардонь сельмексчи, кеж, кенгелямот-покордамот, пелькстамот-спорямот, явномат, 21кежень кирдема, маштомат, симнемат, азаргалемат ды лият нетнень кондят минеть-сюнот. Мон икелеяк тенк кортынь ды нейгак таго кортан: кияк истя теицятнень эйстэ а совави Пазонть Инязорксчинтень.

22А вана Оймеялтось чачты-касты вечкема, кеняркс, седейоймамо, цидярдома, парочи, чевте седей, кемевиксчи, 23сэтьмечи, прянь кирдема. Нетнень каршо кодамояк кой а моли. 24Сеть, конат Христосонь ломанть, крёст лангс вачкодизь эсест пежетев обуцяст весе эсь визьксэнь мелест ды бажамост марто. 25Бути минь эрятано Оймеялтонть вельде, сестэ миненек эряви теемскак Оймеялтонть ветямонзо коряс. 26Секскак а карматано эсь прянь покшкавтнеме, вейке-вейкень ацирьгавтнеме, вейке-вейкень лангс сельмень сявадстомо.

Currently Selected:

Паволонь сёрмазо Галатияв 5: ОВ

Highlight

Copy