Мф 27

27 ГЛАВА

1-2 Иисусым Понтий Пилатын кидышке пуат. 3-10 Иудан колымыжо. 11-14 Пилатын йодыштмыжо. 15-26 Пушташ пунчалмаш. 27-31 Сарзе-влакын игылтмышт. 32-44 Иисусым пудален сакымаш. 45-56 Иисусын колымыжо. 57-61 Иисусым тойымаш. 62-66 Шӱгарым оролымаш.

1Эрдене эрак архиерей ден калык кугурак-влак, чылан погынен, Иисусым пушташ пуымо нерген каҥашеныт. 2Вара Тудым пидын наҥгаеныт да Понтий Пилатын, вуйлатышын, кидыш пуэныт.

3Иисусым пушташ судитлымым пален налмеке, Тудым кучыктен пуышо Иуда чот ӧкынен да архиерей ден калык кугурак-влакын пуымо кумло ший оксаштым мӧҥгеш пӧртылтен. 4«Титакдыме вӱрым ужален, мый языкым ыштенам», – манын. Нунышт тудлан каласеныт: «Мыланнаже мо? Шке ончо». 5Храмыште оксажым кудалтен, Иуда лектын каен да пикталтын.

6Архиерей-влак оксам налыныт да каласеныт: «Тидым храмын казнаш пышташ ок лий. Тидыже – вӱрын акше». 7Мутланен келшымеке, тиде окса дене кӧршӧк ыштышын пасужым йот эл гыч толшо-влакым тояш налыныт. 8Сандене тиде пасум таче мартеат «Вӱр пасу» маныт. 9Тыге Иеремий пророк гоч каласыме шомак шукталтын, тудо ойлен: «Нуно кумло ший оксам, Израиль эрге-влакын тудо Айдемылан палемдыме акым, налыныт 10да, Господь мылам кӱштымыж семынак, тиде окса дене кӧршӧк ыштышын пасужым тӱлен налыныт».#27:9-10 Иер 32:9, Зах 11:12-13.

11А Иисус вуйлатыше ончык шогалын. Вуйлатыше Тудын деч йодын: «Тый иудей-влакын Кугыжашт улат?» Иисус тудлан каласен: «Шке тидым каласышыч». 12А кунам Иисусым архиерей ден калык кугурак-влак титакленыт, Тудо нимомат вашештен огыл. 13Тунам Пилат Тудлан ойлен: «Тыйын ваштарешет кунар таныклат, от кол мо?» 14Но Иисус ик титаклымыштланат вашештен огыл, садлан вуйлатыше пешак ӧрын.

15Петырен шындыме кокла гыч калыкын ойырен налме ик еҥым Кугече пайрем годым вуйлатыше эрыкыш луктеш улмаш. 16Тунам петырымаште чылалан палыме Варавва лӱман еҥ шинчен. 17Тыгеракын, калык погынымеке, Пилат нунын деч йодын: «Тыланда мый Вараввам але Христос манын лӱмдымӧ Иисусым колтем? Кудыжым колтыктынеда?» 18Пилат пален: Иисусым кӧранымыштлан кӧра тудын кидыш пуэныт.

19Тунам, судитлыме верыште шинчымыж годым, тудлан ватыже каласаш колтен: «Саде чын ыштыше Айдемылан нимом ит ыште, мый таче Тудын верч омо дене чот йӧсланенам». 20Но архиерей ден калык кугурак-влак Вараввалан эрыкым йодаш, а Иисусым пуштыкташ манын, калыкым таратеныт. 21Вуйлатыше калык тӱшка деч адак йодын: «Нине кокыт гыч кудыжым колтыктынеда?» Нуно каласеныт: «Вараввам». 22Пилат нунылан ойлен: «Мом вара мый Христос манме Иисус дене ыштем?» Тудлан чылан вашештеныт: «Тек пудален сакыме лиеш!» 23Вуйлатыше каласен: «Могай осалым Тудо ыштен?» Но нуно эшеат виян кычкыреныт: «Тек пудален сакыме лиеш!»

24Пилат ужын: нимо ок полшо, а пудыранымаш утыр вияҥеш веле, сандене, вӱдым налын, калык ончылно кидшым мушкын да каласен: «Тиде чын ыштыше Айдемын вӱржылан мый титакан омыл, шке ончыза». 25Уло калык вашештен: «Тудын вӱржӧ мемнан да икшывына-влак ӱмбалне!» 26Тунам Пилат нунылан Вараввам колтен, а Иисусым сола дене кырыктен, пудален сакаш пуэн.

27Вара вуйлатышын сарзыже-влак Иисусым преторийыш намиеныт,#27:27 Преторий – Вуйлатышын илыме кӱполатше, тыгак судитлыме вер. Тудын йырже уло полкым погеныт. 28Иисусын вургемжым кудашыныт да йошкар вургемым чиктеныт. 29А вара, шуанвондо дене вуйшӱдышым тодын, Тудын вуйышкыжо пыштеныт да пурла кидышкыже тоям кучыктеныт. Сарзе-влак, ончыланже сукен шинчын, Иисусым игылтын ойленыт: «Куане, иудей-влакын Кугыжашт!» 30Тудын ӱмбаке шӱведеныт, тояжым налын, вуйжо гыч кыреныт. 31Тудым игылтмекышт, ӱмбачше йошкар вургемым кудашыныт, шке вургемжым чиктеныт да пудален сакаш наҥгаеныт.

32Лекмышт годым нуно Кириней гыч улшо Симон лӱман еҥым вашлийыныт, тудлан Иисусын ыресшым нумал наҥгайыктеныт. 33Нуно Голгофа манме верыш миеныт, тиде лӱмжӧ «саҥга вер» манмым ончыкта. 34Тушто Иисуслан шекш дене варыме уксусым йӱаш пуэныт. Иисус подыл ончен, но ынеже йӱ улмаш.

35Иисусым пудален сакымеке, шывагам кучен, вургемжым пайленыт 36да Тудым оролен шинченыт. 37Иисусын вуй ӱмбаланже Тудын титакшым ончыктен возымым пижыктеныт: «Тиде Иисус, иудей-влакын Кугыжашт». 38Тудын дене пырля кок агышым пудален сакеныт: иктыжым пурла могыреш, весыжым шола могыреш.

39Эртен кайыше-влак, вуйым рӱзен, Иисусым игылт ойленыт: 40«Тый, храмым шалатен да кум кечыште угыч чоҥен кертше, ынде Шкендым Шке утаре! Тый Юмын Эрге улат гын, ырес гыч воло». 41Тыгак архиерей-влакат закон туныктышо, калык кугурак ден фарисей-влак дене пырля игылт ойленыт: 42«Молым утарен, а Шкенжым утарен ок керт. Тудо Израильын Кугыжаже гын, тек ынде ырес гыч вола, тунам Тудлан ӱшанена. 43Тудо Юмылан ӱшанен. Юмо Тудым утарынеже гын, тек кызыт утара, вет Тудыжо Шкенжым Юмын Эрге манын». 44Иисус дене пырля пудален сакыме агыше-влакат Тудым тыгак вурсеныт.

45Кудымшо шагат#27:45 Куд шагат – мемнан жап дене тура кечывалым. гыч индешымше шагат марте уло мланде мучко пычкемыш лийын. 46Индешымше шагат жапыште Иисус виян йӱк дене кычкыралын: «Или, Или! Лама савахфани?» Тидыже «Юмем, Юмем! Молан Мыйым коденат?» манме лиеш.#27:46 Пс 21:2. 47Воктен шогышо-влак кокла гыч южышт тидым колын ойленыт: «Тудо Илиям ӱжеш». 48Нунын кокла гыч иктыже тунамак куржын миен, губкым налын, уксусеш нӧртен, тоя вуеш керын да Иисуслан йӱаш пуэн. 49А молышт ойленыт: «Вучалте, ончалына, Илия Тудым утараш толеш мо?» 50Но Иисус адакат чот кычкыралын, да чонжо лектын. 51Тунамак храмысе пӱрдыш кӱшычын ӱлыкӧ кокыте кушкедлен, мланде чытырналтын, кугу кӱ-влак шелалтыныт, 52шӱгар рож-влак почылтыныт. Колышо шуко святойын капышт ылыжыныт 53да шӱгар гыч лектыныт, Иисусын ылыж кынелмекыже, нуно святой олашке пуреныт да шукылан конченыт. 54Шӱдывуй да тудын дене пырля Иисусым оролышо-влак, мланде чытырымым да мо лиймым ужмеке, пешак лӱдыныт да ойленыт: «Тудо чынжымак Юмын Эрге улмаш».

55Тушто тыгак шуко ӱдырамаш лийын да ӧрдыж гыч ончен шоген, нуно Иисус почеш Галилей гычак толыныт да Тудлан служитленыт улмаш. 56Нунын коклаште Мария Магдалина, Иаков ден Иосийын Мария авашт да Зеведейын эргыж-влакын авашт лийыныт.

57А кас шумеке, Аримафей гыч улшо Иосиф лӱман поян еҥ толын. Тудат Иисусын тунемшыже лийын. 58Тудо, Пилат деке миен, Иисусын капшым йодын. Пилат капым пуаш кӱштен. 59Иосиф капым налын, тудым яндар йытын вынер дене вӱдылын 60да шкаланже ямдылыме у шӱгарыш пыштен. Шӱгаржым курык саҥгаш кӱнчымӧ улмаш. Иосиф шӱгар аҥжым кугу кӱ дене петырен да каен. 61Туштак Мария Магдалина ден вес Мария лийыныт, нуно шӱгар ваштареш шинченыт.

62Вес кечын, кугарня эрлашыжым, архиерей ден фарисей-влак Пилат деке погыненыт 63да ойленыт: «Озана, ме шарналтышна, саде ондалышет илымыж годым ”Кум кече эртымеке, Мый ылыж кынелам” манын каласен. 64Садлан кумшо кече марте шӱгаржым оролаш кӱштӧ. Уке гын, тунемшыж-влак Тудын капшым, йӱдым толын, шолышт кертыт да калыклан ”Колымаш гыч ылыжын” манын ойлаш тӱҥалыт. Тунам пытартыш ондалымыже икымше дечат ударак лиеш». 65Пилат нунылан каласен: «Оролда улыт, кайыза, моштымыда семын оролыза». 66Нуно каеныт да шӱгарым оролаш шогалтеныт, кӱэшыже печатьым пыштеныт.

Currently Selected:

Мф 27: УС

Highlight

Copy