Rom 10
10
1Kújakuwe, b'ímaŋie bu t'eholam íhabanein, ni b'ilawe bu Atambatun beemo fu Esuwif i kafak. 2Íyinooni kaseede kaanuku káhabaneinohabanein kaanuku kéejeŋgin Atambatun, bare bíhabaneina bondu bite ni kámeyiaate. 3Kánandinut buŋ b'Atambatun af'ajok ésuk i bakan kéejube, bare kaŋesaŋes kasiiŋan bifehe booniin bite kájubu ku. Iyu i kateñekee fu efehe yite Atambatun yey'éhin ésuk i kéeyemi bakan kéejube. 4Ábuki Kiris ahabanoore fu *Eluwa yite Moyis, kaanuku man kéeyilene ku te o fe, Atambatun n'ajokiin bakan kéejube.
Atambatun kafakan kéeyilene ku te o kareyi fe
5Bonde bi *Moyis asoke fu t'an éemaŋie kaŋaasu t'Eluwa i éejub t'Atambatun. Aanaan: «An af'áhin b'Eluwa i esoke bu bireyi fe, o kabaju buroŋ bu#10.5 A̱juk Esaraha i 18.5..» 6Bare ti bite káyilen ku man an u n'ájub t'Atambatun, bonde busokee fu: «Atum'a̱yinoor n'a̱ane: aañ aja fu t'etiir#10.6 Buluwa bu 30.12; a̱juk yooŋ Buluwa bu 9.4.?» kite awe á̱maŋie *Kiris áŋaabein úne t'etaam. 7«Atum'a̱yinoor yooŋ n'a̱ane: aañ aja fu búwaneina ti keekete ku kaamo du?» kite awe á̱maŋie karitan Kiris t'eket i. 8*Míkiñjin mu meenaan: «Hirim hite Atambatun hikambuti, hondu ti káalelufi, nu tu búwejeti#10.8 Buluwa bu 30.14..» Hirim hondu heemo fu báhamin bite káyilen ku kiŋk'iriwaare. 9Af'a̱sok nu butumi tu buhooŋu ésuk i a̱ane Yesu aamo fu Anahaan u, abe n'á̱yilen tu búwejeti kaanuku Atambatun aritanoritan t'eket i, awe kafaku. 10Ábuki an af'áyilen tu búwejeto, Atambatun n'aŋ'ajoko an éejube, abe an n'asok nu butumo tu buhooŋu ésuk i káyilen koone ti Yesu, Atambatun kafakano. 11Múniyo Míkiñjin mu meenaan: «An af'áyilen te o, at'awatanooro hikee#10.11 Esayi 28.16..» 12Náami Asuwif u n'eenooto u Asuwif, boko k'afeeneŋ ku. Anahaan afeeneŋ i kabaje fu aa ásoniyan dómbokun kiŋki karuwo fe. 13Ábuki Míkiñjin mu meenaan: «An fe eeruwe Anahaan u, o kafaku#10.13 Sowel 3.5..»
14Bare buŋ bi kaja fu karuwio ti káyilenut te o? Buŋ bi kaja fu káyilen te o ti kajamut huruwu hoone? Buŋ bi kaja fu kajamu huruwu hoone ti kabajut an eesokiin ho? 15Buŋ b'an aja fu kasokiiin ho t'aboñutee? Míkiñjin mu meenaan: «Aŋ'atoof dómbokun kane kiŋki kawaare Hirim Heetoofe hu káreeŋin#10.15 Esayi 52.7.!» 16Bare ésuk íiit ereyi éjeŋgine fu Hirim Heetoofe hu. Múniyo *Esayi aanaan: «Atemit, aañ áyilene fu báhamin bite b'uni#10.16 Esayi 53.1.?» 17Náami káyilen ku iŋi kibin ti kajamatan kite báhamin bu, abe báhamin bondu uŋu búnuutin ti kasoku kite hirim hite hu Kiris.
18Hahiyu eene i: bakate ku *Israyel kajamut fíya báhamin bu? Áyine wala, kajamajam bo! Míkiñjin mu meenaan:
«Wuji wute kiŋki kawaare hirim hu
wujameejam t'etaam i ereyi fe,
abe báhamin booniin
bireeŋareeŋ tánotan t'etaam i#10.18 Élookiin i 19.5..»
19Iisooñ íkandijen bonde: bakate ku Israyel fíya kánandinut? Wala, kánandinanandin. Ábuki kóyin Moyis, Atambatun aanaan:
«Íñje káhinuuun ariihiñan baabu biheet.
Íñje káhinuuun ariiyiŋat ti bakan kéewesinateit ku#10.19 A̱juk Buluwa bu 32.21..»
20Atambatun atiŋgatiŋg yooŋ Esayi eeene:
«Keeŋesutam ku yéeni kajukam fu,
abe n'ifeeñ ti keeruwutam ku#10.20 Esayi 65.1..»
21Bare ti bakate ku Israyel, Atambatun aanaan:
«Bújom tujon iyitayit bakan kúuma emoŋu kaanuku keebin,
bare kájeŋginutam,
abe yooŋ iŋi kárahan t'íñje#10.21 Esayi 65.2..»
Currently Selected:
Rom 10: cwt
Highlight
Share
Compare
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
