Fílip 2

Áriyemi naane Kiris

1Naane árihine i t'afeeneŋ ni *Kiris, híkinineŋut fíya kikawuun ni kiyaŋg? Naane ámaŋiuun i, híkinineŋut fíya kikawuun iŋkut kiteyoor? Arijamoorajamoor nu Búwejet Beenabe bu? Árineenaneeni me, abe aŋ'ariyubiyenoor yooŋ? 2Náami árihinam iitoofan ireeŋan: árimaŋioori, aribaj biyinoor bifeeneŋ, siheluun yooŋ síyemi efeeneŋ tu doon fe d'árimaŋie káhinu. 3Atum'árihin doon fe ni sihel site baabet, atum'ariŋes yooŋ bíhinooro kuruwu, bare ariwananooro hágila bakaaku, abe huruw fe n'ajok bakaaku ahaŋ naane ajokooree i akina humuumo. 4Huruw fe atum'aane uŋu hoone hu barebare, bare ajuker iŋ'ite hu bakaaku. 5Abe n'aribaj búwejet naane bite bu Yesu Kiris:

6akina eefiye u áyemi boko k'afeeneŋ ku n'Atambatun,

aŋesut káhinu kaanuku man n'are ne o#2.6 A̱juk yooŋ Kájabina ku 3.5..

7Ajaja ayak abin áami anuuta t'áyemie du,

éehinooro aroka#2.7 A̱juk yooŋ Esayi 52.13-53.12; Májiye 20.28..

N'ayit búnokoorum bite húŋgowulan,

an af'áheelin te o n'aŋ'aane

húŋgowulan áraanno diyu tej;

8awananoorawananooro, abe ájeŋginajeŋgin Atambatun bija yooŋ t'eket i;

hee, eket i *t'ekuruwa i.

9Iŋ'ite ho h'Atambatun ayito fu anaŋ t'ahaŋe du kaliitu fe,

abe n'awuno huruwu heehaŋe hu kaaku kuruwu fe,

10kaanuku man keeemo ku fe tu bufor bu, ni t'etaam i, ni t'éhinda etaam i#2.10 t'éhinda etaam i: aamo fu ti keekete ku kaamo du naane Esuwif i ii kasok.

ni kájiŋgitan kane kajam huruwu hite Yesu,

11abe huruw fe n'anoŋk eesok aane

Yesu Kiris aamo fu Anahaan u;

iyu Atambatun Faaf u n'aŋ'asokorooree#2.11 Siferse su 10-11, a̱juk Esayi 45.23..

Burok bite Akarjen

12Náami kújakuwe, aruun k'ímaŋie-maŋie ku, árijeŋginamjeŋgin ko kireyi fe h'íyemie hu n'aruun; bare hahiye naane aamo i inooto t'aruun, ariwarawar kahaŋu kájeŋginam. Áriñiŋkaan ariirok áriiwufoor kaanuku arifakafak, abe n'árihin bo ti kábitu ni sembe hágila Atambatun, 13ábuki Atambatun ondu tu burok t'aruun kaanuku éehinuun áriimaŋi beetoofo bu, abe n'árihin bo yooŋ.

14Doon fe d'ariemo ti káhinu, atum'arifutanoor, síñakoor yooŋ itim sibaj toko, 15man n'áriyemi bakañi Atambatun *keekuure, keeyinaatee kawatan tu doon. Arikinakin t'etaam ye ni ñatuuk, ni bakan keejakut#2.15 A̱juk Buluwa bu 32.5., bare atum'árihin doon fe di káyiniuun katinan te do. Aruun kasilan tu boko naane búloofiiloof bu tu bufor bu, 16aruun ti káwufooriin hirim hite buroŋ bu. Af'árihin iyu, n'iŋ'íyini kasaŋgoor n'aruun hunak hi *Kiris abin hu te ho. Bo káwufoor kaanuku burok búuma bireyi fe káfiiteniit, iñeekut yooŋ fuufu.

17Naane áriyilene i t'Atambatun, anokooreenokoor naane *kaasarah. Maske boko kayooliam, bare ifi bibaj, halan húuma káwutiyenee ti kaasarah kondu#2.17 A̱juk yooŋ 2 Timote 4.6., abe hikawam n'uŋu hutoof dómbokun. Abe katoofu keeemo ku t'íñje, ímaŋamaŋi aribaj ko. 18Aruun yooŋ kikawuun kutoof, abe katoofu keeemo ku t'aruun, ko káyemi yooŋ t'íñje.

Pool n'aane o kaboñu Timote n'Épafurodit

19Tu hutoofe Anahaan u Yesu, íñje káboñinuun memee Timote, kaanuku man hikawam ni hiyaŋg ti b'ija bu kajamu t'aruun. 20O unoono taŋ i iribaje fu kaayinoor kifeeneŋ, abe ehelo fe yendu t'aruun. 21Bakaaku fe uŋu hooniin hu h'ifi kayinoor, bare iŋ'ite híiit Yesu *Kiris. 22Bare Timote, arijukajuk naane áwufoore i hinij hoone heejake hu, nu buŋ b'aroke fu n'íñje ti kawaare kite Hirim Heetoofe hu; arokarok n'íñje naane añi aa áyokunan faafo. 23Náami iyakarayakar káboñinuuno kane ímeyi buŋ b'ija fu búmuje. 24Abe iyakarayakar t'Anahaan u kaanuku íñje yooŋ bibin t'aruun memee.

25Iyinoorayinoor n'eene ajakeejak n'íbatikannuun ati úne Épafurodit#2.25 A̱juk Fílip 4.18., a aribine u áriboñin t'íñje kaanuku eebin éeyokunanam ti bisawula búuma. O aamo fu áwiyam tu burok bu ni t'étuum i iŋi Hirim Heetoofe hu. 26Ámaŋiuunmaŋi kajuku dómbokun arireyi fe, abe ehelo yooŋ ebebut, ábuki arijamajam kaanuku ásomutasomut yéeni. 27Múniyo ásomutasomut yéeni ayak alohen kaketu, bare Atambatun ayubiyenoyubiyen. Óiit unoono a ayubiyene fu, n'íñje yooŋ fe kaanuku kátaañian k'ibaje ku itim kihah. 28Iŋ'ite ho i ihaŋe fu kámaŋi káboñinuuno, kaanuku man af'arijuko, n'arisooñ aritoofan, abe íñje humuumam yooŋ n'iraan kátaañian ku. 29Náami arijoko áwariee ni katoofu kómbokun, ábuki o aamo fu atuuun t'Anahaan u. Bakan naane akina kámoomiee kajoku nu sumoŋu súsuba, 30ábuki ajaja ayak áheelin t'eket i uŋu burok bite bu Kiris. Ajoohenajoohen síhiinio kaanuku éeyokunanam, ábuki ariyinaat bo káhinu aruun kumuumuun.

Currently Selected:

Fílip 2: cwt

Highlight

Copy

Compare