Saak 4

Kámaŋi kite aduna i

1Bímiñoor bu nu sulob su t'etutuun, bondu diin t'ufu búnuutin? Uŋu búnuutin tu wúfaŋi woonuun wuwu wulob ti siniuun. 2Aŋ'árimaŋi buroon bite an, abe ariyinaat bo kabaju, n'aŋ'áami ariiyoolo. N'arimero doon dite an, abe ariyinaat do kabaju, n'aŋ'áami ariilob ne o, abe n'árimiñoor. Áribajaariit b'árimaŋie bu aŋarkeyi naane árilawaariit bo Atambatun. 3Abe af'arilaw, áribajaariit ábuki beeemo bu ti kikawuun bijakut: bamb'arilaw, árimaŋamaŋi bo kaanuku ariirooŋan siniuun. 4Aruun fu bakan kéejubut! Árimeyiit kaanuku kámaŋi aduna i aamo fu kahuufu Atambatun? An af'ámaŋi kábuki n'aduna i, áhinooraa anatoora ite Atambatun. 5Atum'ariene man beesokee bu ti *Míkiñjin mu bite fuufu i? Meenaan: «Atambatun aŋ'áfiir dómbokun tu búwejet b'anaŋe bu t'úne.» 6Bare Atambatun ásoniyanasoniyan úne ahaŋ diyu tu dómbokun, ábuki Míkiñjin mu meenaan: «Atambatun aŋ'ásokum kiŋki kayitooro, bare kiŋki kátetianooro aŋ'ásoniyaniin#4.6 Búwesinato bu 3.34..» 7Náami árijeŋgin Atambatun. Aritandarisan ti Setani, abe n'aŋ'atey akambuun. 8Ariloh Atambatun, abe n'aŋ'alohuun#4.8 A̱juk yooŋ Sakari 1.3; Malasi 3.7.. Aruun ehoofoora i, *arikuuranooro; aruun kaŋk'árihin sihel súsuba, arikuuran siheluun! 9Áritaañian, ariyiy, abe n'arilolobool. Ésuw yeenuun éyemi biyiy, katoofu koonuun ni kíyemi kátaañi. 10Áritetianooro hágila Anahaan u, abe n'aŋ'ayituun.

Atum'arijoonan bakanuun kúŋgowulan

11Kújakuwe, atum'arisok meejakut ti bakaaku. An af'asok meejakut t'ake, man yooŋ n'ajoonano, asoka meejakut t'Eluwa yite Atambatun, ajoonana yo yooŋ. Abe af'a̱joonan Eluwa i, aŋkut á̱yemi an éejeŋgine yo: awe ajoonana yo. 12Atambatun unoono asiiŋane fu Eluwa i, o yooŋ unoono aamo fu ajoonana u. Akina unoono áyinie fu kafakan an, o yooŋ unoono áyinie fu kátowutan an. Kame awe a̱amo fu aañ, awe aa a̱joonan áwiyi húŋgowulan?

Atum'ariyitooro

13Hahiyu arijamatanam, aruun kaŋk'ariene: «Úmiye man yooŋ kuwaatu uni bija t'ésuk émanuma, uni kabaju bo emit, uni kájula, abe n'iŋ'iribaj sírirem.» 14Árimoomi me hite hu kuwaatu, nu buŋ bu buroŋ boonuun bija fu#4.14 Siferse su 13-14, a̱juk yooŋ Búwesinato bu 27.1.? Aruun fu árimoomi naane kamooha; iŋi kíŋaasin, diŋgilis yooŋ kep nu kútowuto. 15Bonde b'ariware fu kasoku. Ariene: «Atemit af'ámaŋi, uni karoŋu, abe n'iŋ'írihin bonde man yooŋ bonda.» 16Bare aruun n'aŋ'arifin ariyitooro ti jísamban joonuun. Biyitooro naane bondu bijakut. 17Náami an éemeyie meejake m'aware mu káhinu, abe áhinut mo, an ondu áhina kaahoofoor.

Currently Selected:

Saak 4: cwt

Highlight

Copy

Compare