Esuwif i 5

1Tu kúŋgowulan ku *t'asaraha ómbokun fe t'af'ajifanee, abe aŋ'anaŋee toko kaanuku éeyemi aroka ooniin bija t'Atambatun. Akina af'asarah Atambatun buroon b'ésuk i bimbi kásikino iŋ'ite wuhoofoor wooniin. 2Áyinooni kayubiyen kiŋki kahiil iŋ'ite kajokaate kooniin, ábuki akina yooŋ humuumo húŋgowulan barebare. 3Naane aamo i akina yooŋ húŋgowulan barebare, awarawar káhinu wusarah, káanukiiit iŋ'ite wuhoofoor wute ésuk i barebare, bare bija yooŋ tu woone wu akina humuumo#5.3 A̱juk Esaraha i 9.7.. 4An ayinaat kanoŋku eeyitooro, éehinooro asaraha ómbokun. Atambatun af'aruwo eesaano burok bondu, naane abine i aruw *Aaron kóŋkeyin.

5*Kiris yooŋ, iyu i bije fu; anoŋkut eeyitooro, éehinooro asaraha ómbokun. Bare Atambatun aano fu:

«Awe a̱amo fu Añi úuma,

úmiye íñj'eemo fu Faafi#5.5 Élookiin i 2.7..»

6Abe n'asooñ aane tike tiŋ ti Míkiñjin mu:

«Awe káyemi asaraha hiraanu

naane Melkisedek#5.6 Élookiin i 110.4..»

7Hi Yesu áyemie hu t'etaam ye, aŋ'alaw Atambatun éeyinio u karamu t'eket i, abe n'aŋ'áwasiyano ayak aŋ'ayiy, ti kataŋku yooŋ t'etiir#5.7 A̱juk Májiye 26.36-46; Mark 14.32-42; Luk 22.39-46.. Abe Atambatun n'asa kalawu koone aŋarkeyi naane Yesu ájeŋginojeŋgin. 8Bare naane aamo i fe Añi ite Atambatun, ajukajuk sílaam, eeliiken naŋ neemo fu kájeŋgin Atambatun. 9H'aamo hu *akuuranee but ahaban, n'áyemi ti kiŋki kájeŋgino kareyi fe an u aa afakaniin hiraanu. 10Abe Atambatun n'áhino éeyemi asaraha ómbokun naane Melkisedek.

Únaŋ toko kikaw úne, utum'úwuŋg Atambatun kiñaawu

11Iribajabaj beehooje bite kasokuuun tu bonde, bare kaanuku íriihandinuun bo, átaañieetaañi, ábuki árisoŋkaariit arijok. 12Afiyee naane ariware i yéeni kaliiken bakaaku buroon bite Atambatun, bare arisawulasawulo ake asooñ aliikenuun buroon bítiyar bu bite hirim hite Atambatun. Hahiye miin m'arisawulee fu mite kájuwu, ábuki ariyinaat buñoofo maanu wéekunde. 13An aŋ'ájuw miin barebare, an ondu aroŋa alekej; ámeyioorut beejake bu ni beejakut bu#5.13 Siferse su 12-13, a̱juk yooŋ 1 Korent 3.2.. 14Bare maanu wéekunde wu, wo wute keehaate ku; buroon bimbi kajuk tu buroŋ booniin biliikenaliiken siheliin kámeyi beejake bu ni beejakut bu.

Currently Selected:

Esuwif i 5: cwt

Highlight

Copy

Compare