Galasi 1

Kasaafu ku

1Íñje Pool ikiñje fee, íñje eeemo u *apotor káanukiiit ti kámaŋi kite kúŋgowulan ku, man yooŋ kite ake, bare naane ti Yesu *Kiris ámaŋie du, n'Atambatun yooŋ Faaf u eeritano u t'eket i. 2Íñje ni *kéeyilene ku keeemo ku beebe fe írikiñjinuun fee aruun bakate ku Galasi#1.2 A̱juk Epotor i 16.6. kéeyilene ku. Uni bokondu ti kasokuuun bonde: 3Atambatun Faaf úne, n'Anahaan u Yesu Kiris kaja kásoniyanuun, abe ni kawunuun káasuumaay. 4Yesu Kiris humuumo ásikasik síhiinio asaan kaanuku eefakan úne tu wuhoofoor wu. Aramaram úne ti sembe site t'etaam ite hahiye yeejakut yee, naane t'Atambatun Faaf úne ámaŋie du. 5Atambatun aja ákini kániku ku hiraanu! Amiin.

Hirim Heetoofe hifeeneŋ hibaje fu

6Ítumbatumba ijahale dómbokun naane ariemo i ti káwuŋgu Atambatun kiñaawu ahil iye, akina eeruwuun u ti kajaku kite *Kiris, ariisooñ arijok ti hike hirim heetoofe#1.6 hike hirim heetoofe: kiŋki kawaare hirim heetoofe hondu heesokee hu diye, múniyo iŋi kawaare bite bu *Kiris. Bare iŋi kaane yooŋ ésuk i kawarawar káhinu naane *t'Eluwa yite Moyis esoke du, naane *kateyi karam, ni kakamboor ku ni keenooto ku Esuwif.. 7Káanukiiit man abajeebaj hike hirim heetoofe, aaa, abajutee. Bare abajeebaj bakan keeemo ti kábujuuun sihel, kéemaŋie kawetekanoor Hirim Heetoofe hite hu Kiris. 8Hutoof ake t'uni af'asokuun iye hirim heetoofe heewayee ni h'irisokuun hu, man yooŋ amalaka ite t'etiir, Atambatun aja áwuumoo! 9Irisokuunsok bo, abe íñje kasooñu isok bo hahiye: an af'asokuun hirim heetoofe heewayee ni h'arijame hu, Atambatun aja áwuumoo!

10Íñje fíya eemo ti kaŋesu man ésuk i n'esokorooram? Aaa, Atambatun i ímaŋie fu asokorooram. Íñje fíya eemo ti kaŋesu man ésuk i kikawiin nu kutoof t'íñje? Kane isooñ iŋes man ésuk i kikawiin nu kutoof t'íñje, man íyemi aroka ite Kiris.

Buŋ bu Pool abine fu áyemi apotor

11Kújakuwe, íñj'endu ti kasokuuun bonde: Hirim Heetoofe h'iwaareuun hu, húŋgowulaniit átuute ho. 12Ijamut ho t'an, ániit yooŋ aliikenam ho, bare Yesu *Kiris humuumo áwufooram fu ho.

13Arijamajam naane ii inoŋk kóŋkeyin, íñje káaroŋin ku n'ijok ti bítim bite Esuwif i. Arijamajam naane ii íhihinoor yéeni ni sembe kéeyilene ku ti Kiris kaanuku íibujiin. 14Hite bítim bite Esuwif i, keehooje ti k'írifuroore ku ijaaŋeiinjaaŋo, ihaŋiinhaŋ yooŋ káñiŋkaan t'ejoosan ite sifaaf uni#1.14 Siferse su 13-14, a̱juk Epotor i 8.3; 22.3-5; 26.9-11..

15Bare Atambatun afiyafiya ajifanam t'ibukoorutee, abe n'aruwam ti kajaku koone. Abe h'áhabaneina hu 16kaanuku éewufooram Añio, man n'iŋ'ija iŋ'iwaare keenooto ku Esuwif Hirim Heetoofe hu heesoke hu moone mu, ijeit t'an eerimam#1.16 Siferse su 15-16, a̱juk Epotor i 9.3-6; 22.6-10; 26.13-18. A̱juk yooŋ Esayi 49.1; Seremi 1.5.; 17ijeit yooŋ Serusalem kajuku keejabe ku káyemiam *epotor. Bare ijaja toko-toko bija Arabi, ihaban n'íbatikein Damas. 18Abaj simit síhaaji, n'itik ija Serusalem kaanuku íriimeyioori ni Piyeer, abe n'iriiko bo ne o sirimaas súsuba barebare#1.18 A̱juk Epotor i 9.26-30.. 19Ijukut bo mayet ake apotor, kane arko Saak at'ute Anahaan u taŋ#1.19 A̱juk Galasi 2.9; Epotor i 15.13..

20B'íkiñjinuun bee, Atambatun yooŋ ajama, bíteiit haajuus.

21Hunuut toko, n'ija tu búsuk bite Siri ni Silisi. 22Bare bakate ku *Súde kéeyilene ku ti Kiris kámusut káheelin t'íñje. 23Kajamajam barebare naane ésuk i eene: «Áyin u aa áhihinoor úne hítiyar hu ondu hahiye ti kawaare Hirim Heetoofe hu h'ámaŋie hu yéeni kábuju.» 24Abe n'iŋi kasokoroor Atambatun uŋu húuma hu.

Currently Selected:

Galasi 1: cwt

Highlight

Copy

Compare