2 Timote 3

Kunak kiraanu ku

1Á̱meyi bonde jak: kunak kiraanu kite etaam i káyemi kunak kéetaañie. 2Múniyo ésuk i kayinoor huruw hikawo, ni kámaŋi yooŋ sírirem, boko kamaku, ni kayitooro yooŋ, abe ni kálafatin Atambatun. Iti kájeŋgin sifaafiin ni síñaayiin, iti kaane an eyeehen, abe boko biteñeko yooŋ doon fe deenabe. 3Iti kámaŋi an, iti kayubiyen an, boko kasoku ti bakan, iti káyini kajoku kikawiin, boko kánafut, abe iti kámaŋi meejake mu. 4Boko kásiku bakan kasaan bakaake, ni káhin yooŋ buroon beeñunut, abe ni kayitooro. Kámaŋi kite beetoofiin bu kihaŋe fu tu boko kámaŋi kite Atambatun. 5Boko káhinu ni kite bayi kabajabaj káyilen, bare boko biteñeko sembe site te ko. A̱kamb bakan kondu! 6Bakaake tu boko iŋi kayoosorooro sunuuf su, abe n'iŋi kabuut haare hu kéeniyeit ku keejam tu boko. Haare hondu kaniŋananiŋan wuhoofoor taŋ, abe wúfaŋi wánowan w'ifi kanaban. 7Ko kireyi fe kámaŋamaŋi kaliikenee, bare kámusut mayet kámeyi múniyo mu. 8Naane Sanes ni Sambures#3.8 Sanes ni Sambures: t'Esuwif i, bákasuba kondu kaamo fu élugusa i kéeyemie ku ti síñakoor su nu Moyis t'ésuk ite *Esipt, h'aane hu eenuutan bo bakate ku *Israyel eeja nu boko t'Atambatun asoko du. A̱juk Kafakan ku 7.11,22. kabine i kañakoor nu *Moyis, iyu yooŋ i bokondu ifi kañakoor nu múniyo mu. Siheliin siyeemayeem, abe káyilen kooniin kuñunut. 9Bare iti kaja akambee, ábuki ésuk i fe kánandin kaanuku kabajut kikaw, naane bibine i bibaj Sanes ni Sambures.

Karimu ku

10Awe bare á̱moomi akuur but bimb'iliiken ésuk i, nu hunoŋk húuma, ni b'iŋese bu tu burok búuma, ni káyilen kúuma, ni kámuñu kúuma, nu buŋ b'ímaŋie fu ésuk i, nu buŋ b'if'ijok alitee, 11nu buŋ b'íhihinooree fu, nu buŋ b'ílaame fu. Á̱moomi beebajam bu Antiyoos fe, n'Íkoñom, ni Listir. Á̱moomi sílaam s'ijuke su fe, bare Anahaan u aramamram te so sireyi fe#3.11 Antiyoos fe, n'Íkoñom, ni Listir: a̱juk Epotor i 13.14-52; 14.1-20; aramamram te so sireyi fe: a̱juk yooŋ Élookiin i 34.20.. 12Kéemaŋie ku fe káhinu t'afeeneŋ ni Yesu *Kiris, abe ni kajok bítim bite Atambatun, boko káhihinooree. 13Bare kéenafute ku ni ñatuuk ñu, boko kahaŋu ti meejakut mooniin kep. Boko kabuutu bakaaku, abe boko kumuumiin yooŋ kabuutiee. 14Awe bare, a̱jok alitee ti b'a̱liikenee bu. Á̱moomi kaanuku bite nu múniyo, ábuki á̱moomi aañiin kaliikeni fu bo#3.14 A̱juk 2 Timote 1.5; 2.2.. 15Múniyo á̱moomi *Míkiñjin Meenabe mu huta hu awe añi, abe múnoonii kawunu búwesinato. Búwesinato bondu ifi bíhin an n'afak kane áyilen ti Yesu Kiris. 16Míkiñjin mu fe, Atambatun atiŋge fu ésuk i keekiñj mo, abe mibajabaj éñjeriŋ bija ti kaliiken kite ésuk i múniyo mu, ni káwufoor an katin koone, ni kajoŋooran an éehinut áwariee, ni kaliiken an buroŋ beetoofe Atambatun. 17Iyu a Atambatun áhine fu kaanuku man an eeemo oone n'áyemi an eefaree áhabanein, éeyinie káhinu burok fe beejake.

Currently Selected:

2 Timote 3: cwt

Highlight

Copy

Compare