2 Korent 6
6
1Makamu iŋ'irirok n'Atambatun, uni bokondu ti kaanuuun waasuun, atum'árihin kásoniyan k'Atambatun ásoniyanuun ku kéeyemi kite fuufu. 2Múniyo Atambatun aanaan ti *Míkiñjin mu:
«H'aamo hu areeŋee ñaaj,
íjeŋginajeŋgin kalawu koonuun.
Hunak hite kafaku ku,
ibinabin karamuuun#6.2 Esayi 49.8..»
Úja! Hahiyu areeŋee ñaaj; úmiye n'aamo fu hunak hite kafaku ku.
3Írimaŋiit an asok beejakut tu burok bite b'uni, iŋ'ite ho h'írihinaariit fu doon fe déeyinie kaneyan an eeemo ti bítim bu. 4Aaa, iŋ'íriwufoor tu buroon bu fe bimb'írihin kaanuku uni eroka bakate Atambatun: iŋ'irituumen dómbombokun ti sílaam su, nu kúnuur ku, nu wútaañi wu, 5ni bímiñ bu, nu tu bukulu bu#6.5 A̱juk Epotor i 16.23., ni ti naane ésuk i ee erito iŋ'ite h'uni, nu ñurok ñeeniŋe ñu, ni kaŋotaate ku, ni kañoofaate ku. 6Iŋ'íriwufoor kaanuku uni eroka bakate Atambatun ti *kakuuru ku, ni kámeyi kite múniyo mu, ni kámuñu ku, ni kajaku ku, ni ti sembe site Búwejet Beenabe bu, ni kámaŋi kite ku nu múniyo, 7ni kawaare kite múniyo mu, ni ti sembe site Atambatun. N'íriwufoor bo yooŋ ti kájubu kite k'uni keeemo ku naane bujuŋko bite kálaatin, man yooŋ bite biramooro. 8Iŋi kajok uni nu sumoŋu súsuba, abe ni kafuñatan uni. Ni kasok t'uni beejakut, abe ni kasok t'uni beejake. Ni kajok uni naane ejuusa, abe bare uni bakate bifeeneŋ. 9Ni kajok uni bakan kéemeyiitee, abe bare ésuk i ereyi émeyie fu uni. Ni kajok uni naane bakan keekete, abe bare uni bokondu tu buroŋ jes. Iŋi káhihinoor uni, bare káyoolaariit uni. 10Iŋi káhin uni íriitaañian, bare ko kireyi fe iŋ'iritoofan. Írimoomi naane bakan keebajut, bare iŋ'írihin keehooje kéeyemi kusaanum ti bítim bu. Írimoomi naane bakan kéeyekiit doon fe, bare uni irikino fu buroon bireyi fe.
11Kújakuwe, aruun bakate ku Korent, írihaminuunhamin akuur but, írifeŋginuunfeŋgin yooŋ sihel site s'uni. 12Íriwufooruunwufoor kaanuku írimaŋiuunmaŋi, bare aruun áriwufoorut uni kaanuku árimaŋamaŋi uni. 13Náami íihaminuun naane faaf aa áhamin añio: árihin naane uni, árifeŋgin uni sihel soonuun!
Atum'aŋ'árihin t'afeeneŋ ni kéeyilenut ku
14Atum'aŋ'árigiilool ni kéeyilenut ku áriihin t'afeeneŋ. Doon déejube díyinooni fíya káhinu t'afeeneŋ nu doon deejakut? Meejaaŋe míyinooni fíya káhinu t'afeeneŋ n'ébaani i? 15*Kiris áyinooni fíya kajamoor ni Setani? Man yooŋ an éeyilene, áyinooni fíya kakolu n'an éeyilenut? 16*Enuuf ite Atambatun éyinooni fíya kakolu nu ñúwisenum ñu? Ábuki fu úne úemo fu enuuf ite Atambatun eeemo u buroŋ. Akina humuumo Atambatun asokasok aane:
«Íñje kakinu t'etutiin, abe n'iŋ'iŋ'iriboor nu boko.
Íñje káyemi Atambatun ooniin,
boko n'iŋi káyemi bakan kúuma#6.16 Esaraha i 26.12; Esekiyel 37.27..»
17Iŋ'ite ho h'Atemit aane fu:
«Arinuut ti kéeyilenut ku áriiyemi káasiŋuun.
Atum'arigor mayet doon *deekuurut,
abe n'iŋ'ijokuun áwariee#6.17 A̱juk Esayi 52.11; Esekiyel 20.34.
18Íñje káyemi Faafuun,
aruun n'áriyemi ehaawa íima, nu búsuŋgute búuma.
Atemit eehaŋe u ebaja sembe asoke fii#6.18 A̱juk 2 Samiyel 7.14; Esayi 43.6..»
Currently Selected:
2 Korent 6: cwt
Highlight
Copy
Compare
Share
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
