2 Korent 3

Eroka i bakate kaajamoor kíyeni ku

1B'isoke bee fíya beemo fu uni iŋk'irisooñ íriyemi ti jímak? Bare fíya uni irisawulee bakan kakiñj bileetar kéemuur uni bakan keejake naane bakaake ii káhin, man yooŋ n'irienuun árihin uni bondu íriiyini bija ti bakaaku#3.1 Enatoora yite Pool kabinabin Korent boko ni bileetar bi kaanuku man bakate ku bo ni kajokiin áwariee. Kanoŋkanoŋk kéemuurooro te bo, abe ni kaane bakaake kásaanniin fu bo. H'aamo hu kámaŋia kanuutu bo, ni kaane bakate ku Korent kakiñjiin yooŋ bileetar naane bi kabine bu ne bo, man ni káyini kayuunu tu búsuk bite bakaaku *kéeyilene ku.? 2Aruun kumuumuun ariemo fu eleetar ite uni yeekiñjee i tu suhol site s'uni, y'an fe ayino kámeyi, abe n'ajaŋga. 3Áriwufoorawufoor ti máhinar moonuun kaanuku aruun eleetar yi *Kiris akiñje, abe uni n'iribin ne yo. Ekiñjeekiñj káanukiiit man ni hikiñju, bare nu Búwejet bite Atambatun eeemo u buroŋ. Ekiñjeekiñj káanukiiit man tu bujuju, bare tu suhol site kúŋgowulan#3.3 tu bujuju: *Eluwa yite Moyis yi Pool ámaŋie fu kasoku diye, ábuki tu bujuju t'ekiñjee fu. A̱juk Kafakan ku 24.12. tu suhol site kúŋgowulan: Seremi *ayiŋana ite Atambatun abinabina aane eluwa éyeni i kakiñjiee tu suhol site kúŋgowulan ku. A̱juk Seremi 31.33; Esekiyel 11.9; 36.26..

4Irisokasok bondu aŋarkeyi naane kikaw uni kiyaŋgayaŋg t'Atambatun iŋ'ite hu Kiris. 5Káanukiiit man iŋ'iriyinoor n'iriene uni íriyinie kanoŋku íriihin burok naane bondu uni kumuum uni. B'íriyinie bu, t'Atambatun tu búnuutina fu. 6Akina áhine fu uni íriiyini káyemi eroka kaanuku iŋ'iriwaare ésuk i *kaajamoor kíyeni ku. Kaajamoor kondu kukolut n'Eluwa yeekiñjee i, bare nu Búwejet Beenabe bu. Ábuki Eluwa yeekiñjee i eŋ'eyool, bare Búwejet bu uŋu buwun buroŋ#3.6 A̱juk yooŋ Seremi 31.31..

7Eluwa i ekiñjeekiñj tu bujuju, abe meejaaŋe mite kániku kite Atambatun ni misilan toko. Buhooŋu bite *Moyis bútumb bisilan, abe naane aamo i fe kasilan kondu kíteiit bifiyo, bakate ku *Israyel kátumbut káyini káheelino ni ñíkiniin#3.7 A̱juk Kafakan ku 34.29.. Arko Eluwa i, naane aamo i fe eŋ'eyool, éŋaasinoŋaasin ni kasilan naane kondu, 8kasilan kite ku fíya burok bite Búwejet Beenabe bu ni kire buŋ? 9Arko burok bite Eluwa i yey'etinan ésuk i bisilanasilan, bumbu bujok ésuk i bakan kéejube hágila Atambatun n'iŋi bihaŋ tu dómbokun! 10Úyinooni kaanu kasilan kite kaajamoor kite ku kóŋkeyin, ko dóoniit fe kane kiliikee ni kite ku hahiye, keehaŋe ku ko tu dómbokun. 11Múniyo arko kaajamoor kítiyar ku keeŋaaŋut ku bifiyo kisilanasilan, kame kíyeni ku keeemo ku kite bifiyo hiraanu kahaŋu kasilan!

12Eyakar yendu y'iribaje i ékinineŋe fu kikaw kite k'uni ni kiyaŋg iŋ'iriwaare Hirim Heetoofe hu. 13Irinooto naane Moyis éenuuse u buhooŋio nu musoor kaanuku bakate ku Israyel itim kajuk naane kasilan kondu kíyemie i tu bútowuto bu#3.13 A̱juk Kafakan ku 34.33.. 14Náami búwesinato booniin biyinaat kánandin bondu. Bija yooŋ t'úmiye fe, ifi káyemi ti kajaŋga ti kaawiit kite kaajamoor kítiyar ku, musoor uŋu múkumbalool ñúwejet ñooniin, abe kájokaariit. Musoor mu uŋu munuut t'an éehine t'afeeneŋ ni Kiris barebare. 15Bija yooŋ t'úmiye fe, bakate ku Israyel ifi káyemi ti kajaŋga ti kaawiit kite *Eluwa yite Moyis, musoor uŋu múkumbalool ñúwejet ñooniin. 16Bare an af'áwuŋgan inde Anahaan u, musoor mu uŋu munuut#3.16 A̱juk Kafakan ku 34.34.. 17Diye Anahaan u aamo fu Búwejet bu, abe tu Búwejet bite Anahaan u beemo du, Eluwa i et'ékini toko an. 18Úne úreyi, ñuhooŋu ñite ñ'úne ñúkumbaloolutee, abe kasilan kite Anahaan u ifi kifeeñ te ño naane ti kaajukooreey. Náami úne bokondu ti kahosanee kep kaanuku núuyemi naane Anahaan u, abe uŋ'úja ti kahaŋu kasilan. Diyu burok bite Búwejet bite Anahaan u.

Currently Selected:

2 Korent 3: cwt

Highlight

Copy

Compare