གཉིས་པ་ཏི་མོ་ཐི། 4

1ཁིརིས་ཡི་ཤུ་ དཔོན་ཨ་ཉི་བྱོན་མེ་གང་ཀ་ ཤི་ཁཱན་དག་པེ་མ་ཝ་ མ་ཤི་ཁཱན་དག་པེ་མ་ཝ་ རོ་ཀི་སོ་ངོ་ཐམས་ཅན་ག་ ཁྲིམས་ཅཱད༌པེ། ཨོ་ཉི་ཨ་དེན་གེ་ དཀོན་མཆོག་དང་ ཁིརིས་ཡི་ཤུ་ག་སྐུན་མདུན་ག་ ཇི་གི་ན་ག་བཀའ་བིན༌ཅ། 2དཀོན་མཆོག་ག་ གསུང་བཤད༌ཅོ། དུས་ལེག་པུ་ཆོ་ནེ་བུ་ མ་ལེག་པ་ཆོ་ནེ་བུ་ གསུང་བཤད་ཉི་རང་ཆོའི། སོ་ངོ་བ་ཀི་ ངཱད་པ་ཀབ་ཉི་ བཅོ་ཁ་ཨའི། བཱརག༌ཅོ། སེམས་གསོ་ཨའི། ཉི་ཡེ་ལ་ཀབ་ཉི་བུ་ ཇམ་ཀེན་ཨན་ཡེ་ཉི་བི། 3སོ་ངོ་བ་ཀི་ ལེག་པུ་ཡེ་ཁཱན་ག་ མ་ཉཱན་པེ་ག་ དུས་ཙུན་ཤེག༌པེ། ལག་ཏང་ རོག་ཏེ་བ་ཀི་ ཉཱན་པེ་ག་སེམས་ ཨ་ཝ་དང་ཏུ་ཉི་ཡེ་ཁཱན་ སློབ་དཔོན་བ་ལ༌མེ། 4རོག་ཏེ་བ་ཀི་ ཆཱས་དེན་པ་ཤོ་ མ་ཉཱན༌པ། དག་པ་ཀབ་ཉི་ ཇུང་ཁུངས་མ་ཁཱན་ ཆཱས་བ་ཤ་ཉཱན༌པེ། 5དག་པ་ཀབ་ཉི་ ནཱན་ཤོ་ དུས་ཧང་ད་བུ་ ཇུང་ནེ་བུ་ མ་འགྱུར་བཱན་ དཀའ་ཝ་ཅཱད་ནེ་བུ་ཐེས་ཉི་ འཐེན་ལེག་པུ་བཤད་པེ་ག་ལའི་ ཨ་ལེ་ཁེ༌ལེ། ཉི་ནཱན་གི་ ཨ་ལེ་ཁེ་ཁཱན་ལའི་ཁེ་པ་ འགྲུབ་ཕ་ཨ་ཉི་ཨའི།

6ཉི་ཨོམ་ ཇང་མཆོད་པ་ཕུལ་བེ་ག་དེན་གེ་ དུས་ཙུན་རེན་པ༌ཅ། ཇང་ཤི་ལེ་ག་ དུས་ཙུན་རེན་པ༌ཅ། 7ཇི་གི་ཕྱད་མདའ་ལེག་པུ་ཨ་ཉི་ཕི༌ཝ། ཉི་ཇི་གི་ ཇུག་ཉི་ཆུ་མ་ཨ་ཉི་རང་ཕི༌ཝ། ཉི་ཇི་གི་ དད་པ་ཨ་ཉི་རང་ཆོ༌ཝ། 8ཉི་ཨོམ་ དྲང་པུ་ཨ་ཉི་ ཆོ་ཝ་ཨ་དེན་གེ་ གཙོ་བོ་གི་ ཇ་ག་དེན་གེ་ སེ་རབ་ཐ་ཉི་གནང་མ༌ཅ། གཙོ་བོ་ཤོ་ ཁྲིམས་ཐྲང་ཉི་གནང་ཁཱན་དྲང་དཔོན་གི༌ལ། ཉི་ཡི་ཤུ་བྱོན་མེ་ནོང་ཀ་ རོ་ཀི་ཇ་ག་ ཨོ་ཉ་སེ་རབ་གནང༌མེ། ཉི་ཇང་ཐུར་ག་ཤ་མང་གི་ཝ་ རོག་ལོག་ཉི་བྱོན་མེ་ག་ ཤོ་ནང་ཕེ་ཁཱན་ ཐམས་ཅན་ག་རང་གནང༌མེ༎

པ་ཝལ་ག་ཆཱས་མཇུག་དུས།

9ཧབ་ཏུར་རེ་བ་ཐུར་ དོ་ཟོ་ཨ་ཉི་ ཇང་རུ་མེ་ག་ཨོ་དོ། 10དྲེ་མཱས་གི་ ཨོ་ཐ་འཛམ་གླིང་ག་ཅ་ལ་བ་ གནམ་མེད་ས་མེད་ ཕང་པ་ཨ་དེན་གེ་ རོ་ཀི་ཇང་ཐུབ་ཐཱན་ཐཱན་ ཐེ་ས་ལོ་ནི་ཀེ་ག་ཏཱན་དི༌ཝ། ཀིརི་སེནས་ ག་ལ་ཏི་ཡ་ག་ཏཱན་དི༌ཝ། ཉི་ཏི་ཏཱས་ དྲལ་མ་ཏི་ཡ་ག་ཏཱན་དི༌ཝ། 11ཇང་ཀབ་ཉི་ ལུ་ཀ་ཐུར་ཤ་ ལུས་པ༌ཅ། མར་ཀུས་ལམ་ཐཱན་ ནཱན་ཀབ་ཉི་རིག་ཕའི། ཧང་ཡ་དག་ནེ་ལ་ རོ་ཀི་ ཇ་ག་ལའི་ག་ ཇ་རོ་ཨན༌ཅ། 12ཇི་གི་ཏུ་ཁི་ཀཱས་ ཨེ་ཕི་སཱས་ག་ཏཱན་ ཀུན་ཏི༌ཝ། 13ནཱན་ཨོ་ཕ་ཀབ་ཉི་ ཏྲོ་ཨཱས་ག་ ཀར་པཱས་ཀབ་ཉི་ཐུབ་ཐ་ཁཱན་ ཇ་ག་ཁ་མུང་དང་ དཔེ་ཆ་བ་ཕའི། ཙོ་ཙོ་རང་ མོང་ནང་ག་ཤུ་གུ་བ་ཕའི།

14པེར་བཟོ་པ་ ཨ་ལེག་ཇེན་དར་གི་ ཇ་ག་ནོད་པ་ཆི་ལུ་ཀེ༌བ། དག་པ་ཀབ་ཉི་ གཙོ་བོ་གི་ རོ་ཀི་ཨ་ཁཱན་ ལའི་ག་ཚ་མང་གནང༌མེ། 15ཨ་ཤི་བཤད་ཁཱན་ གསུང་ག་ཀོར་གེ་ རོ་ཀི་གནམ་མེད་ས་མེད་ མ་ལེག་པ་ཡེག༌ལ། ཨོ་ཉི་ཨ་དེན་གེ་ ནཱན་རོ་ཀེ་ རིག་པ་སྒྲིམ་ཉི་ཆོའི།

16ཇང་གོ་དང་པ་ ཁྲིམས་ཁང་ག་ཀེ་བེ་གང་ཀ་ ཐུར་གི་རང་ ཇ་ག་མ་རུམ་ཅི། ལག་ཏང་ ཐམས་ཅན་གི་ ཇང་ཐུབ་ཉི་ཐ༌ཝ། ཨོ་ཉི་ཨ་ཝ་ཨ་དེན་གེ་ གཙོ་བོ་གི་ རོག་ཏེ་བ་ཀ་ ཁྲིམས་མ་གནང་ཆེན། 17དག་པ་ཀབ་ཉི་ གཙོ་བོ་ ཇང་ཀབ་ཉི་བཞུགས་གནང༌མ། ཉི་ཡ་ཧུ་དི་པ་མང་གི་ཁཱན་ ཐམས་ཅན་གི་ རོ་ཀ་གསུང་ཉཱན་ཅེན་དག་པ་གི་ གཙོ་བོ་གི་ ཇ་ག་གསུང་ ཐམས་ཅན་རང་ བཤད་པེ་ག་ ཤུགས་སྟོབས་གནང༌མ། ཉི་སེང་གེ་ག་ནོ་ཝང་གེ་ རོ་ཀི་ ཇ་ག་སྐྱབས་ཨ་ཉི་གནང༌མ། 18གཙོ་བོ་གི་ ཇ་ག་ངན་པ་ཐམས་ཅན་གེ་ སྐྱབས་གཟིགས་ཉི་གནང༌མེ། ཉི་རོ་ཀི་ ཇ་ག་སྐྱབས་ཨ་ཉི་རང་ ཞིང་ཁམས་ག་རྒྱལ་སྲིད་ག་ ནུང་ཉི་གནང༌མེ། ཉི་དུས་ཏ་བུ་རང་ རོ་ཀ་བསྟོད་པ་ཕུལ་ཤོ། ཨ་མེན།

19པིརིས་ཀི་ལ་དང་ ཨ་ཀི་ལཱས་ ཉི་ཨོ་ནེ་སི་ཕ་རཱས་ག་ ཕའི་ག་སོ་ངོ་བ་ཀ་ སྐུ་གཟུགས་བཟང་པོ་ཨ་ཉི་ཡེག༌ཅོ། 20ཨི་རཱས་ཏཱས་ ཀོ་རིན་ཐི་ག་ལུས༌པ། ཉི་ཏྲོརོ་ཕི་མཱས་ མར་བ་ཨ་དེན་གེ་ ཇི་གི་ རོག་མི་ལེ་ཏྲས་ག་ ཐུབ་ཐ༌ཝ། 21ཧབ་ཏུར་རེ་བ་ཐུར་ ཏོན་གེ་གོ་མ་ ཨོ་ཕེ་གོད༌ཅོ། ཡུ་བུ་ལཱས་དང་ པུ་དྲེས་ ལི་ནཱས་དང་ ཀོལོཝ་དི་ཡ་ ཉི་བཱརའ་ཡུང་ཟི་ ཐམས་ཅན་གི་ན་ག་ སྐུ་གཟུགས་བཟང་པོ་ཨ་ཉི་ཡེག༌ལ།

22གཙོ་བོ་ ན་ག་རྣམ་ཤེས་ཀབ་ཉི་ བཞུགས་གནང་ཆེན། ཉི་ནའི་ ཐམས་ཅན་ཀབ་ཉི་ ཐུགས་རྗེ་བཞུགས་ཉི་གནང་ཆེན༎

Currently Selected:

གཉིས་པ་ཏི་མོ་ཐི། 4: TNTB

Highlight

Copy

Want to have your highlights saved across all your devices? Sign up or sign in

Tshangla New Testament

Learn More About Tshangla New Testament (BSI)