དང་པ་ཐེ་ས་ལོ་ནི་ཀི། 5

གཙོ་བོ་ག་ནོང་།

1ཡུང་ཟི་བ་ དུས་ཙུན་དང་ དུས་སྐབས་ག་ཀོར་གེ་ ཇི་གི་ན་ཧ་འབྲི་བེ་མ་ཁེ༌ལ། 2ཧང་ཡ་དག་ནེ་ལ་ ནའི་ནའི་ཏེན་གི་རང་ ལེག་པཱན་ཨ་ཉི་སེན༌ཅ། གཙོ་བོ་ག་ནོང་ཤོ་ བི་ནང་ག་དྲོ་ཝཱན་པ་ ཨོ་ཕ་པུརུས་ཀིན་ཨ་ཉི་ ཨོ་ཕེ་གི་ལ་དག༌ཉི། 3སོ་ངོ་བ་ཀི་ ཧང་རང་མ་ཇུང་མ་ སྐྱིད་པུ་ཅ་དག་ཉི་ ཡེག་པ་ཀབ་ཉི་ མེ་པ་ཕི་ཁཱན་ཁེ་པ་ ཡིད་ཀ་རྣམ་ཏོག་མ་ཝ་ མེ་ཝག་ཙ་ན་ཚ་ཨ་ཝ་པུརུས་ཀིན་ཨ་ཉི་ རོག་ཏེ་བ་ཀ་ཐུང་ཀ་ཤེག༌པེ། ཉི་སོ་ངོ་བ་གཱན་མ་ཐར༌བ།

4དག་པ་ཀབ་ཉི་ ཡུང་ཟི་བ་ ནའི་མེར་བུ་ནང་ཀ་མཱན༌ཅ། ཨོ་ཉི་ཨ་དེན་གེ་ ཨོ་ཉ་ནོང་གི་ དྲོ་ཝཱན་པ་གི་ ཨ་ཝ་པུརུས་ཀིན་ཨ་ཉི་ ནའི་ངང་ཉི་ ལུས་པེ་མ་ཁེན་ཆེན། 5ནའི་ཐམས་ཅན་རང་ འོད་ཟེར་ག་རྒྱུད་པ་གི༌ལ། ཨའི་བི་ནང་ག་ལོ་ཀེ་མང་གི་ ཉི་མེར་བུ་ག་ལོ་ཀེ་བུ་མང་གི། 6ཨོ་ཉི་ཨ་དེན་གེ་ ཨའི་བཱརའ་ད་བུ་ཨ་ཉི་ ཡི་ཕེ་མང་གི་ཝ་ ཨའི་ཤོ་ མ་ཡི་ཕཱན་ རིག་པ་སྒྲིམ་ཉི་ཆོ་ལེ་ཁེ༌ལེ། 7ཧང་ཡ་དག་ནེ་ལ་ ཡིབ་ཁཱན་བ་ བི་ནང་ག་ཡིབ༌ཅ། ཉི་ཞུ་ཇམ་ཁཱན་བ་བུ་ བི་ནང་ག་ཇམ༌ཅ། 8དག་པ་ཀབ་ཉི་ ཨའི་ངབ་ཀ་ལོ་ཀེ་གི་ཝ་ཨ་དེན་གེ་ ཨའི་ཤོ་ རིག་པ་སྒྲིམ་ཉི་ཆོ་ལེ་ཁེ༌ལེ། ཉི་ཨ་ཧ་དད་པ་དང་ སྙིང་རྗེ་ཤོ་ དམག་མི་གི་ དགྲ་དོག་པེ་དེན་གེ་ བང་ཁཱན་བཱརང་ཏོང་ད་ལི་ད་བུ་ཐུར་དང་ ཨ་ཧ་ཐར་པ་ག་རེ་ཝ་ཤོ་ པེར་ག་མུ་ཁུ་ལུམ་ ད་བུ་ཐུར་ཚཱས༌པེ། 9དཀོན་མཆོག་གི་ ཨའི་རོ་ཀ་ཁྲིམས་ཉོང་པ་དེན་གེ་ སི་ཝ་མང་གི། དག་པ་ཀབ་ཉི་ གཙོ་བོ་ཡི་ཤུ་ཁིརིས་གེ་ཨ་ཉི་ ཐར་པ་ཉོང་པེ་དེན་གེ་གི༌ལ། 10རོག་ཤོ་ ཨ་ཧ་དེན་གེ་ གཤགས་པ་གི༌ལ། ཨོ་ཉི་ཨ་དེན་གེ་ ཨའི་ཤོ་ ཆོན་ཐཱན་ཨ་ནེ་བུ་ ཤིན་ཐཱན་ཨ་ནེ་བུ་ ཨའི་རོག་ཀབ་ཉི་རང་ ཆོ་ལེ་གི༌ལ། 11ཨོ་ཉི་ཨ་དེན་གེ་ ན་ཤི་ ཨོ་མ་ཨ་ཝ་པུརུས་ཀིན་ཨ་ཉི་ ཐུར་གི་ཐུར་ག་ སེམས་གསོ་ཨ་ཉི་ ཐུར་གི་ཐུར་ག་ ཇ་རོ་ཨའི༎

བསླབ་བྱ་མཇུག་དུས།

12ཨ་ཧ་ཡུང་ཟི་བ་ ཨ་ཤི་ལ་སོ་སྐུ་ཆེ་ཨ་ཉི་ཡེག་ཅ་ ན་ཧ་པོང་ཀ་ གཙོ་བོ་ག་མཚན་ག་ ན་ཧ་ཐུང་ཀེ་ ལའི་ཨ་ཉི་ ན་ཤི་ངཱད་པ་ཀབ་ཉི་ བཱརག་ཁཱན་བ་ཀ་ གུས་ཞབས་ཨའི། 13རོག་ཏེ་བ་ཀི་ ཨ་ཁཱན་ལའི་ག་ཡོར་ཀེ་ རོག་ཏེ་བ་ གནམ་མེད་ས་མེད་ ཕང་ཉི་ཆི་ལུ་ཙི་ཉི་ གུས་ཞབས་ཨའི། ནའི་ནང་དོ་ སྐྱིད་པུ་ཨ་ཉི་ཆོའི། 14ཨ་ཧ་ཡུང་ཟི་བ་ ཨ་ཤི་ ན་ཧ་ལ་སོ་སྐུ་ཆེ་ཨ་ཉི་ཡེག་ཅ་ ཀ་ཤི་བ་ཀ་ བཱརག༌ཅོ། ཡོང་བ་ལུ་ཆོ་ཁཱན་བ་ཀ་ སེམས་གསོ་ཨ་ཉི་ ཡཱན་མུ་བ་ཀ་རུམ༌ཅོ། ཨི་བི་ཀབ་ཉི་རང་གི་ནེ་བུ་ བཟོད་པར་སྒོམ་ཉི་ཆོའི། 15ཨི་བི་ག་རང་གི་ནེ་བུ་ ངན་པ་ག་ཏཱན་ ལོག་ཉི་ངན་པ་ ཨ་ལེ་མ་གོད༌ཅོ། དག་པ་ཀབ་ཉི་ ནའི་ཐུར་གི་ཐུར་ག་ ལེག་པུ་ཨ་ལེ་ག་དང་ སོ་ངོ་ཐམས་ཅན་ག་ ལེག་པུ་ཨ་ལེ་ག་དེན་གེ་ ན་ཧ་མིག་པ་ཅོད༌ཅོ།

16ཧ་ལ་རང་གི་ནེ་བུ་ ཤོ་ནང་ཕེ་ཉི་ཆོའི། 17དུས་ཏ་བུ་རང་ སྨོན་ལམ་ཞུའི། 18ཧང་ད་བུ་རང་ཇུང་ནེ་བུ་ བཀའ་དྲིན་བསམ་ཤོ། ཨུ་ཐུ་ཤོ་ ཁིརིས་ཡི་ཤུ་ག་ ན་ཧ་དེན་གེ་ དཀོན་མཆོག་ག་ ཐུགས་བཞེད་གི༌ལ།

19དམ་པའི་ཐུགས་ཉིད་ མ་ཁག༌ཅོ། 20དམ་པའི་ཐུགས་ཉིད་ག་ ཐུང་ཀེ་ཨ་ཉི་ ཡེན་གནང་ཁཱན་གསུང་ ཁུངས་ཧང་རང་མ་ཝ་མ་ཙི། 21ཐམས་ཅན་རང་ རྒྱུགས་ལའི། ལེག་པུ་ཤོ་ ཙུང་ཉི་ཐའི། 22ངན་པ་ཧང་རང་གི་ནེ་བུ་ སྤང༌ཤོ༎

བྱིན་རླབས་དང་བསླབ་བྱ།

23ཉི་ཨོམ་ ན་ཧ་སྐྱིད་པུ་གནང་ཁཱན་ དཀོན་མཆོག་ རོག་ཏེན་གི་ ཚང་པ་ཨ་ཉི་ དམ་པ་ཅོད་ཉི་གནང་ཆེན། ཉི་ན་ཧ་རྣམ་ཤེས་དང་སྲོག་ ལུས་པུ་ ཐམས་ཅན་རང་ གཙོ་བོ་ཡི་ཤུ་ཁིརིས་ བྱོན་མ་ཀབ་ཉི་ ཅོན་ཏག་པེ་མར་བ་ཨ་ཉི་ ཐཱན་གནང་ཆེན། 24རོག་ནའི་ར་ཁཱན་ཁེ་པ་ དམ་ཚིག་ཅན༌ཅ། ཨོ་ཉི་ཨ་དེན་གེ་ རོ་ཀི་མཛད་ཉི་གནང༌མེ།

25ཡུང་ཟི་བ་ ཨ་ཧ་དེན་གེ་བུ་ སྨོན་ལམ་ཞུའི། 26དད་པ་ཨ་ཁཱན་ཡུང་ཟི་ ཐམས་ཅན་ག་ དམ་པ་ཅུབ་ཨ་ཉི་ སྐུ་གཟུགས་བཟང་པོ་ཨ་ཉི་ཞུའི། 27ཇི་གི་གཙོ་བོ་ག་ དབང་ཚད་ག་ཐུང་ཀེ་ཨ་ཉི་ ན་ཧ་ཡེག་ཅ་ ཨོ་ཐ་ཡི་གུ་ཁེ་པ་ ཡུང་ཟི་ ཐམས་ཅན་ག་དེན་གེ་ ལྷག༌ཅོ།

28གཙོ་བོ་ཡི་ཤུ་ཁིརིས་ག་ཐུགས་རྗེ་ ནའི་ཀབ་ཉི་བཞུགས་ཅེན། ཨ་མེན༎

Currently Selected:

དང་པ་ཐེ་ས་ལོ་ནི་ཀི། 5: TNTB

Highlight

Copy