Bɔ̀zɛ̃́níriè 21

Hóohũn dɛ̀fĩì àá sṹsùnù dɛ̀fĩì bòo

1Ɛ́ ń wo mɔn hóohũn dɛ̀fĩì dɔ̀ àá sṹsùnù dɛ̀fĩì dɔ̀; lè hán hóohũn àá lé hán sṹsùnù lɛ ɛ́ hṹn wi yán ɛ́ vṹnun lɔ́ yán, ɛ̀ hɔ̀ ɲun-bɛhɔ́ ɛ́ lò bĩniɛ mí yán wɛ̀. 2Ɛ́ ń wo mɔn lè Dɔfĩn lóo, lɛ iè pe Zerizalɛɛmu dɛ̀fĩì kɛ́ lé yòó lɔ́ àá hɔ́pe Dɔfĩn viì ɛ́ dàa ɛ́ síɛ, ɛ̀ lè hɛ̀ sɛ́sɛ́a míte vɔ́ kɛ̀a ie hɛ́fĩn lɛ ɛ́ hɛ̀ can míte sãa sãa ɛ́ mii dàá vɛ sĩ́ ɓá bɛ́rɔ híɛhɔ́. 3Ɛ́ ń ɲɛ́ lé tɛn-bɛhɔ́ dɔ̀ lɛ zɔn tɛ̀ ɛ́ lɔ́ àá lé bɛ́záanú wànlè viì kɛ́ lé ɛ́ bie ɛ́ nɛ làa: «Mì húi, Dɔfĩn zɔǹlén ɛ́ wo wi ɓɛ nìnbirìe tĩ́ihṹ. Hɔ̀ ɓén kań àá ɓɛ́, ɛ̀ ɓɛ̀pe ɛ́ wé piè nìɛ, ɛ́ hɔ́pe Dɔfĩn míte ǹ ɛ́ ɓén kań àá ɓɛ́, ɛ́ wo ɛ́ wé peɓɛ̀ Dɔfĩn. 4Ɛ́ Hɔ́ wo ɓén sùukɛ peɓɛ̀ yìncuò míkùi ɛ́ lé peɓɛ̀ híɛhɛ̃ ǹ; ɛ̀ hɔ̀ húmú ɛ́ wo yá bĩní ɛ́ wé, ɛ̀ yúrú àá wũamɛkɛà àá lɔ̀nbiè ɛ́ lò yá bĩní ɛ́ wé wɛ̀; hɔ̀ bòo bɔ̀kĩ́ɛ míkùi ɛ́ wo vṹnun lɔ́ yán.»

5Ápe lɛ kɛsí lé bɛ́záanú wànlè lɔ̀n ɛ́ zɔn bie ɛ́ nɛ làa: «Mì húi, nín wé hɔ́ bòo míkùi àá bɔ̀fĩɛ̀.» À wo zɔn bie lɛ́ mi ǹ ɛ́ nɛ làa: «Síɛ wĩ́ hɔ́pe bòo lɛ, iè hɔ̀ lɛ ɛ́ hɔ́pe biehĩ́ sɔ lɛ ɛ́ iè bɔ̀berà biehĩ́ ɛ̀ hɔ̀ lò iè bòo lɛ ɛ́ fɔ́ɓán ɛ̀ hɔ̀ dɛsĩ̀nin.» 6À bĩniɛ zɔn bie sĩiniɛ ɛ́ nɛ làa: «Hɔ̀ wo wɔ́ vɔ́! Ǹpe temu iè ɔ̀pe Alifa àá ɔ́ Omeka, hɔ̀ bòo míkùi fìi ɓánlén àá pehɔ̀ vénlén. Ɛ́ kɛ́ ɲɛ-hĩni ɛ́ nìnbírɔ lɛ ɛ̀ ɓé, ɛ́ nín lɛ́ hɔ́ ɲumu ɔ̀ ǹ á ɛ́ ɲu kã́amáa, lèpe ɲun-kɛ̃̀nù ɲumu lɛ wóò lɛ́ lé mɛkɛ̃nì. 7Ɛ́ nìnbírɔ lɛ yú hɔ́ pànkɛ́ hɔ̀ bɔ̀koohɔ́ lɔ̀n ɛ́ ɓén yí hɔ́pe hɛ̃mù bòo sɔ sí niǹ viì. Ń ɓén wé ɓàasɔ Dɔfĩn, ɛ̀ ɓàasɔ ɛ́ ɓiɛ̀ ɛ́ wé niǹ yɛ̀nù. 8Kɛ́ ɓɛ́ ɓen kɛ́ ɓɛ́pe ńzánkɛbáa àá ɓɛ́lɛ ɛ́ yí dɛsĩ̀ Dɔfĩn àá ɓɛ́ ńwékɛkũǹ nìɛ àá ɓɛ́ nìɓériè àá ɓɛ́ ńdaaníkɛɓánkũǹ nìɛ àá ɓɛ́ híe àá ɓɛ́ wɛ̃̀hɛ̃ ɓàasiè àá ɓɛ́ ɓɔ́ɓúukɛriè ɓɛ́kùi, ɛ̀ peɓɛ̀ kaǹlén ɛ́ ɓén wé hɔ́ dṹn-bɛhɔ́ lɛ ɛ́ hɔ́ cìrìbí wi hũn. Ɛ́ sí iè pe ńɲuunín húmú.»

Zerizalɛɛmu lóo dɛ̀fĩì bòo

9Ɛ́ ɓɛ́pe mɛlɛkɛ hùuɲu lɛ ɛ́ hún dàa hɔ ɲunlánɓɛ̀ hùuɲu lɛ hṹn tú àá máahṹ lɔ̀n bɔ̀sũmúa bòo hùuɲu tĩ́ihṹ, ádɔ̀ ɛ́ ɓɛrɛ ɛ́ bie àá mi ɛ́ nɛ làa: «Ɓen, nin vɛ zɛ̃́ní-ɛ hɛ́fĩn kɔ ǹ, àpe Pi-zuú ɓà hṹnu.» 10Ɛ́ lé Mɛkɛ̃n-Sãanu ɛ́ khie mɔ̀ mi ǹ, ápe mɛlɛkɛ sɔ ɛ́ wo khie fɔ́ mi ɛ́ dàa yòó van lè ɓúkìe dɛ̀bɛhɔ́ dɔ̀ lɛ hélélé lɔ̀n, ɛ́ van yòó zɛ̃́niɛ Dɔfĩn lóo mi ǹ, hɔ̀pe Zerizalɛɛmu lɛ ɛ́ yòó lɔ́ àá hɔ́ hóohũn hɔ̀pe Dɔfĩn viì ɛ́ dàa ɛ́ síɛ. 11Ɛ̀ hɔ̀pe Dɔfĩn ɓàarɔ́ ɛ́ hɛ̀ wi lepe lóo sɔ lɔ̀n, ɛ̀ lè hɛ̀ ɛ́ ɲiiníkɛ kɛ̀a ie sɛ̃̀nlè lɛ yàamu hie hie ɲiiníkɛrɔ́ bòo sí, kɛ̀a ie le sɛ̃̀nlè lɛ ɛ́ ɓɛ́ wóò ve nɛ zasipe lɛ ɛ́ ɲiiníkɛ kɛ̀a ie dùɓɛlé bòo sí. 12Ɛ̀ toohɔ́ dɛ̀bɛhɔ́ dɔ̀ lɛ dɛ̃un ɛ́ kíríkɛa lèpe Zerizalɛɛmu lóo sɔ ǹ ɛ́ khie fɔ̀; ɛ̀ zĩínù ɲihĩ́ɛ pírú àá bɔ̀nbɔ̀ ɲu ɛ́ wi lepe toohɔ́ sɔ ǹ, ɛ̀ mɛlɛkɛɓɛ pírú àá bìɛ ɲu ɛ́ wi hɔpe zĩínù ɲihĩ́ɛ pírú àá bɔ̀nbɔ̀ ɲu sɔ lɔ̀n ɛ́ hɔ̀ hìénin. Ɛ̀ hɔ̀pe zĩínú ɲihĩ́ɛ sɔ ɛ́ ɓɛ́ Yizarayɛɛle dàa nìɛ pírú àá bɔ̀nbɔ̀ ɲu yèhĩ́ ɛ́ wɛ̃́ wi lɔ̀n. 13Lèpe toohɔ́ sɛhĩ́ɛ bɔ̀nbɔ̀ nɛ́ ɛ́ hɔ́ zĩínù ɲihĩ́ɛ bɔ̀nbɔ̀ tĩ tĩ ɛ́ wi dúrɔ ńsɛ̀nù lɔ̀n: bɔ̀nbɔ̀ tĩ ɛ́ wi àá wurù hànlén, ɛ̀ bɔ̀nbɔ̀ tĩ ɛ́ wi àá wurù línlén, ɛ̀ bɔ̀nbɔ̀ tĩ ɛ́ wi àá wurù hànlén ńdóonín, ɛ̀ bɔ̀nbɔ̀ tĩ ɛ́ ɓiɛ̀ wi àá wurù hànlén ńmiinín. 14Lèpe toohɔ́ sɔ fìi ɛ́ ɲɛ̀ sɛ̃̀nlɛ̀a pírú àá bɔ̀nbɔ̀ ɲu lɔ̀n, ɛ̀ hɔ̀pe sɛ̃̀nlɛ̀a sɔ, á Pi-zuú tɔnkɛriè pírú àá nìɛ ɓɛ̀ ɲu yèhĩ́ ɛ́ wɛ̃́ wi lɔ̀n.

15Ápe mɛlɛkɛ sɔ lɛ ɛ́ hṹn bie àá mi ɛ́ dàa le bòo màatɛ̃́lán dɔ̀ mí núnú hũn, lɛ iè sɛ̃́ní kã́anú dɔ̀, ɛ́ mii dàá màatɛ̃́ lépe lóo àá pelè zĩínù ɲihĩ́ɛ àá pelè toohɔ́. 16Lèpe lóo sɔ sɛhĩ́ɛ bɔ̀nbɔ̀ nɛ́ tóokɛrɔ́ ɛ́ màamán. Á mɛlɛkɛ ɛ́ màatɛ̃a lèpe lóo, á yú kílɔ́nɓɛ̀ muasie ɲu àá khĩɛ́ ɲu (2 200)#21.16 Hàarí nìɛ bòo màatɛ̃́rɔ́ hũn, ɛ́ kílɔ́nɓɛ̀ muasié ɲu àá khiɛ́-ɲu (2 200), ɛ́ iè sitaadeɓɛ̀ muasié pírú àá bɔ̀nbɔ̀ ɲu (12 000); pelè sɛhĩ́ɛ bɔ̀nbɔ̀ nɛ́ tóokɛrɔ́ àá pelè dɛ̃nɛmú míkùi ɛ́ màamán. 17Á mɛlɛkɛ ɛ́ bĩniɛ màatɛ̃a lèpe toohɔ́ lɛ kíríkɛa lèpe lóo ǹ dɛ̃nɛmú á yú mɛ́tɛ́rɛ́ɓɛ́ ɓaàtĩ àá pírú àá bɔ̀nbɔ̀ ɲu (72)#21.17 Mɛ́tɛ́rɛ́ɓɛ́ ɓaàtĩ àá pírú àá bɔ̀nbɔ̀ ɲu (72) ɛ́ iè kudeɓɛ ɓɛ́rɛ́ hùuɲu àá bɔ̀nbɔ̀ nɛ́ (144) hàarí nìɛ bòo màatɛ̃́rɔ́ hũn.; à màatɛ̃a lè kɛ̀a nìnbirìe bòo màatɛ̃́kɛrɔ́. 18Lè toohɔ́ sɔ ɛ́ tɔn àá sɛ̃̀nlɛ̀a lɛ yàamu hie lɛ ɛ́ ɓɛ́ wóò ve nɛ zasipe, ɛ̀ lèpe lóo kùusɔ ɛ́ tɔn àá sɛ̃́ní lɛ ɛ́ ce mí yìehṹn, lɛ ɛ́ ɲiiníkɛ kɛ̀a iè dùɓɛ̀ré bòo sí. 19Ɛ̀ lèpe toohɔ́ lɛ ɛ́ kíríkɛa lèpe lóo ǹ fìi ɲìnlán sɛ̃̀nlɛ̀a ɛ́ iè sɛ̃̀nlɛ̀a lɛ yàamu hie àá mí ɲúuhɛ̃ ɲúuhɛ̃ lɛ ɛ́ tɔn lùnkɛa sãa sãa: Lè hán sɛ̃̀nlè lɛ ɲɛ̀ lèpe tóohɔ́ fìi ɛ́ ɓɛ́ wóò ve nɛ zasipe, ɛ̀ lè ńɲuunín ɛ́ ɓɛ́ wóò ve nɛ safiire, ɛ̀ lè ńtĩinín ɛ́ ɓɛ́ wóò ve nɛ akaate, ɛ̀ lè bɔ̀nbɔ̀ nɛ́lán ɛ́ iè yemerɔɔde, 20ɛ̀ lè hùanúlán ɛ́ iè onikiise, ɛ̀ lè huiezĩ́lán ɛ́ iè sariduanɛ, ɛ̀ lè hùuɲulán ɛ́ iè kirizolite, ɛ̀ lè hùutĩlán ɛ́ iè beriile, ɛ̀ lè káanílán ɛ́ iè topaaze, ɛ̀ lè pírúlán ɛ́ iè kirizoparaze, ɛ̀ lè pírú àá dìcóonílán ɛ́ iè turikuaze, ɛ̀ lè pírú àá bɔ̀nbɔ̀ ɲulán ɛ́ iè ametisite. 21Ɛ̀ hɔ̀pe zĩínù ɲihĩ́ɛ pírú àá bɔ̀nbɔ̀ ɲu sɔ ɛ́ iè sɛ̃̀nlɛ̀a lɛ yàamu hie hie ɲúuhɛ̃ pírú àá bɔ̀nbɔ̀ ɲu; dúrɔ ńzĩínù ɲunù ɛ́ wɔ́ àá lépe sɛ̃̀nlè lɛ yàamu hie hie dìcóoní. Ɛ̀ lèpe lóo fɔ́nú ɛ́ iè sɛ̃́ní lɛ ɛ́ ce mí yìehṹn, lɛ ɛ́ ɲiinikɛ kɛ̀a ie dùɓɛ̀lé bòo sí.

22Ɛ́ ń yí mi Dɔfĩn zũnù lèpe lóo hũn wɛ̀; iè hɔ̀ lɛ ɛ́ Ɲunsɔ Dɔfĩn pànkɛ́ míkùi ɓàasɔ àá ɔ́ Pi-zuú lɛ wi yán ɛ́ temu iè peɓɛ̀ Dɔfĩn zũnù. 23Ɛ́ lépe lóo ɛ́ wo mɛ̀kóo mí wurù àá ńpĩ́ihṹ ǹ nɛ hɔ ciení mí ǹ wɛ̀; iè hɔ̀ lɛ ɛ́ hɔ́ Dɔfĩn ɓàarɔ́ ɛ́ lè ciení nin, à Pi-zuú ɛ́ iè pelè pɛ̃̀ntĩní. 24Ɛ́ hɔ́ dàa míkùi nìɛ ɛ́ wo wóo ɓén vɛ pelè ńpiemu hũn; ɛ̀ lè sṹsùnù bɛ́zɛ̀ɓɛ̀ ɛ́ wóo ɓén dàá ɓɛ́ ɓàarɔ́ ɛ́ dàá vɛ yán. 25Ɛ́ lépe lóo zĩínù-ɲihĩ́ɛ ɛ́ yá ɓén híɛ ɛ́ yá mi, iè hɔ̀ lɛ ɛ́ sṹnúhṹn ɛ́ yí mii wé wɛ̀. 26Ɛ̀ ɓɛ̀ ɓén dàá hɔ́ dàa míkùi nìɛ ɓàarɔ́ àá peɓɛ̀ yèhĩ́ hóonírɔ́ ɛ́ dàá ɓen yán. 27Ɛ̀ hɛ̀rí bòo dɔ̀ lɛ ɛ́ lɔn, hɛ̀rí nìnbírɔ lɛ ɛ́ wóò wé hɔ́ yìrá bòo àá ɔ́lɛ ɛ́ wóò ɓúukɛ hɔ ɓúo ɛ́ yá ɓén zɔ lepe lóo sɔ hũn wɛ̀; kɛ́ ɓɛ́pe nìɛ lɛ yèhĩ́ ɛ́ wɛ̃́ wi-e Pi-zuú mɛkɛ̃nì vɛ̃hṹ hũn ɓɛ́ dòonún ɛ́ temu ɛ́ ɓén zɔ yán.

Currently Selected:

Bɔ̀zɛ̃́níriè 21: bwj

Highlight

Copy

Compare