3 Zãn 1
1
Tìɛníkɛrɔ́
1Hɔ̀ iè ǹpe nìkĩ́ihṹ ɛ́ te lepe vɛ̃hṹ sɔ lɛ ɛ́ wĩ́ ɛ́ nin lɛ́ kɔ́pe Kayiise lɛ ɛ́ ń hɛ̀ wɛ àá bɔ̀bín. 2Kìe pàá lɛ ń wɛ àá bɔ̀bín, nín Dɔfĩn ɛ̀ hɛ̃nnin nɛ Hɔ lɛ́ ɛ̀ kɔ̀ bòo míkùi ɛ̀ vɛ àá híɛhɔ́, ɛ̀ kɔ̀ kań tɛkɛ-hiè hũn kɛ̀a bòo lɛ ɛ́ kɔ́ ńcɛɓánlɔ́ àá Dɔfĩn ɛ́ dàa ɛ́ vɛ vanlɔ́ àá híɛhɔ́.
3Kìe zɛ̀ɓɛ̀ dɔ̀ ɛ́ ɓɛrɛ dɛ̃un hũ̀nún, ɛ́ ɓɛ́ bie hɔ̀ bɔ̀berà lɛ wi kɔ ǹ bòo àá bòo lɛ ɛ́ kɔ́ dàa ɛ́ vɛ hɔpe bɔ̀berà hũn. Ɛ́ hɔ́ lɛ ɛ́ ń ɲɛ́ hɔ́ ɛ́ ń hɛ̀ wɛniɛ niǹte cɛ̃̀un. 4Ɛ́ bòo dɔ̀ lɛ ɛ́ wóo lɛ́ lé tĩwiɛ̀ mi ǹ ɛ̀ pɔní ɛ́ mí, kɛ́ hɔ́ yí bòo lɛ ɛ́ ń ɓen ɲɛ́ kɛ́ ɓɛ́ nɛ niǹ nìɛ ɛ́ vɛ hɔ bɔ̀berà hũn.
Kayiisi ɲún cã̀anírɔ́ bòo
5Kìe zuú lɛ ɛ́ ń wɛ, kɔ́ wóò cã̀aní kɔ́ ɲún ɛ̀ dàá wé hɔ́ bòo lɛ ɛ́ kɔ́ wóò wé míkùi ɛ̀ dàá sĩiní ɓɛ́ kìe zɛ̀ɓɛ̀, hɛ̀rí ɓɛ̀pe nɛ̀hãà ɛ́ kɔ́ wóò sĩiní kɛ̀amu. 6Ɛ́ ɓɛ́pe nìɛ lɛ ɛ́ kɔ́ sĩiniɛ ɛ́ bie kɔ̀ wanminu bòo lè Dɔfĩn zũnù hũn. Ɛ́ nín kɔ̀ hɛ̃nnin nɛ kɔ bĩní sĩiní ɓɛ́ ɛ̀ ɓáaníɓán àá bòo lɛ ɛ́ Dɔfĩn ɛ́ wɛ, ɛ̀ ɓɛ̀ dàá lé bè ɓɛ́ wṹn. 7Iè hɔ̀ lɛ á iè ɔ̀ Yiezu yèrè bòo hũn ɛ́ ɓɛ́ dàa ɛ́ lɔ́ mɔ̀ lè wṹn kɛ́ ɓɛ́ yí tɛ̀ ɛ̀ fé bòo dɔ̀ ɓɛ̀ nìnbirìe lɛ ɛ́ yí bè Dɔfĩn wṹn núnú hũn wɛ̀. 8Ɛ́ képe ɓiɛ̀ ɛ́ sãawi ɛ̀ kè wóo pen ɓɛ̀pe nìɛ sɔ sí ɓà ńmàa bòo lɛ ɛ́ wé ɛ̀ kè wo páa ɓɛ́ lɔ̀n ɛ̀ dàá tɛ́ hɔ́ tɔnlɔ́ lɛ ɛ́ ɓɛ́ ɛ́ tɛ́ hɔ́ bɔ̀berà bòo hũn.
Diotɛrɛfu bɔ̀werà lɛ yí sãa àá Demetiriyuusi bɔ̀tente wénlɔ́ bòo
9Ń wɛ̃́ lé vɛ̃hṹ dɛ̀cíi dɔ̀ ɛ́ lɛ́ mí Dɔfĩn zũnù nìɛ ǹ, kɛ́ á Diotɛrɛfu ɛ́ yí tɛ̀ ɛ̀ tɛ́ mí ɲɛkɛ̃̀a niǹ viì wɛ̀; iè hɔ̀ lɛ á den wɛ ɛ́ mii wóo dí hɔ́ bòo míkùi híɛhɔ́. 10Ɛ́ sí iè hɔ̀pe ɛ́ ń dàa ɓen ɓɛrɛ, ɛ́ ń ɓén munkɛ hɔ́pe bòo lɛ yí sãa lɛ á ɛ́ wé míkùi àá bòo lɛ á dàa ɛ́ kè yèrè ɛ̀ yaa le vìi míkùi. À yáà tɛ̀ pen ɓɛ̀ ńdɛsĩ̀riè lɛ ɛ́ wóò ɓen mì viì, ɛ̀ ɓɛ̀lɛ ɛ́ lò wóò nɛ ɓɛ pen ɓà ǹ á lò wóo si nɛ ɓɛ bí wé hɔ́ wɛ̀; à yɛ̀rɛ́ ɲɛ ɓɛ ɛ̀ líení lé Dɔfĩn zũnù hũn.
11Kìe zuú lɛ ɛ́ ń wɛ, bí wóo húi ɓɛ́ nìnbirìe bɔ̀koohɛ̃ lɛ ɛ́ ɓɛ́ ɛ́ wé ɛ̀ kɔ̀ ɓiɛ̀ wé hɔ́ ɓà ńmàa wɛ̀; kɛ́ hɔ́ bɔ̀tente wénlɔ́ iè pe ɛ́ kɔ́ wɛní. Nìnbírɔ lɛ ɛ́ wóò wé hɔ́ bɔ̀tente ɛ́ bòo sɛ̃̀ Dɔfĩn; àlɛ ɛ́ wóò wé hɔ́ bɔ̀koohɔ́ ɛ́ yí dũ Dɔfĩn wɛ̀.
12Kɛ́ hɔ́ ɓen kɛ́ á Demetiriyuusi, ɛ̀ ɓɛ̀ nìnbiriè ɓɛ́kùi ɛ́ piè bɔ̀tente wénlɔ́ bòo ɛ̀ bie, hɛ̀rí hɔ̀ bɔ̀berà lɛ ɛ́ wi è ǹ pɛwi ɛ́ piè sãamu bòo ɛ̀ bie. Ɛ́ képe ɓiɛ̀ ɛ́ piè sãamu bòo ɛ̀ bie, ɛ́ kɔ́ lò wo dũ kɛ́ ké bòo lɛ ɛ́ ké ɛ́ bie pie bòo hũn ɛ́ bɔn.
Víenikɛlan tìɛnikɛrɔ́
13Ń den pɛwi dàa bòo bɔ̀kùi ɛ́ nin bie ɛ̀ lɛ́ kɔ ǹ, kɛ́ ń den yí wɛ ɛ̀ ǹ wĩ́ hɔ́ wĩ́nlɔ́ ɛ̀ kóo vɛ̃hṹ hũn ɛ̀ tɔní lɛ́ kɔ ǹ wɛ̀. 14Ń den ɛ́ cɛ̀ ɛ̀ ǹ ɓen kɔ̀ viì hũ̀nún àá bìcínbóo, ɛ́ kè den wo ɛ́ dìkìmú kɛ́ ké loo ɓán. 15Nɛ hũn-wiɛ̀ ɛ̀ wé àá kɔ! Mì pàáɓɛ́ ɛ́ kɔ̀ tìɛnikɛnin. Ɛ́ kɔ́ ɓiɛ̀ tìɛníkɛ kìe pàáɓɛ́ ǹ, ɓɛ̀pe àá ɓɛ́ nì-cóohɛ̃.
Currently Selected:
3 Zãn 1: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation