Ebhikorwa bhya Jitumwa 23

1Pawuro ˆnaaringira nekeneke abhaanu bha mw‑ibharaja eryo, ˆnaabhabhwira ati, “Emwe abhayiri bhaasu, nikumisiisye emirimu jaani ku‑Nyamuwanga, omutima gwani ni mweru pee okukingira reero inu.” 2Omugabhisi omukuru Ananiiya, ejire oongwa omusango ogwo, ˆnaaragirira bhanu bhaariga bheemereeguuyu ayeeyi na Pawuro bhamubhaatuure rikoofi ku‑munwa. 3Niwo Pawuro ˆnaamubhwira ati, “Nyamuwanga kaja okukubhuma, awe indugu inu ikaatirwe ichokaa!#23:3 Indugu inu ikaatirwe ichokaa. Indugu rwa inu eyibhonekana ati kwa anja ni ya ekisi na ingʼomeeye, nawe kwa mu‑nda ni mbiibhi na ni nderu. Isonga ya Pawuro anu ni ati, omugabhisi omukuru oyo keekora okubha omuramusi wa rirenga unu kaaruubha ebhiraagiro kisi, nawe ebhikorwa bhyaye bhitakuruubhana na ebhiraagiro. Winyanjire awo, undamure kwa okuruubha ebhiraagiro, nawe owunyamura ebhiraagiro kwa okuragirira ati nibhumwe keenu ebhiraagiro bhiremere!”

4Niwo abhaanu bhanu bhaariga bheemereeguuyu ayeeyi na Pawuro nibhamubhwira ati, “Owutura kutiki okufuma omugabhisi omukuru wa Nyamuwanga?” 5Pawuro ˆnaabhasubhya ati, “Abhayiri bhaasu, naari nitakumenya ati omwene niwe omugabhisi omukuru, okubha jikaamirwe ati, ‘Nuusige okwayika kubhiibhi omutungi wa abhaanu bhaawo.’#23:5 Ringira Okwimuka 22:28.”

6Mbe, Pawuro ˆnaasombookerwa ati mu‑bhaanu abho bhaariga bhari‑mo Abhasadukaayo aamwi na Abhafarisaayo. ˆNaamura obhuraka bhwaye mw‑ibharaja, ˆnaayika ati, “Abhayiri bhaasu, anye niri Mufarisaayo, omwana wa Omufarisaayo. Enibhuurwa anu inguru ya obhwiyikanyo bhwani ati, Nyamuwanga arisuurura abhafuuwe.” 7Ejire aayika ejo, niibha‑wo injogere agati ya Abhafarisaayo na Abhasadukaayo. Mw‑ibharaja nibhaawukana makiju gabhiri. 8Isonga ya okwawukana okwo ni ati, Abhasadukaayo bhatakwikirisya ati bhuri‑wo obhusuuruko, bhamaraayika, noorwo omwoyo. Nawe Abhafarisaayo abheekirisya ati, ebhyo bhyone bhiri‑wo.

9Mbe, mw‑ibharaja omwo, niibha‑mo injogere nene muno. Abheeyigisya abharebhe bha ebhiraagiro bhya Muusa bhanu bhaariga bhari Abhafarisaayo, nibheemereeguru nibhabhambarira Pawuro kwa managa goone nibhaayikaga ati, “Chitakurora echikayo choonechoone cha omuunu unu! Kaatura okubha ari mwoyo amwi ari maraayika niwe aayikire nage.”

10Injogere niigenderera okukanya, okukingira omukuru wa abhasirikare urya ˆnaayaya, ˆneetogera ati bhakatabhuuye Pawuro bhibhaarabhaara. Kurwa ejo, ˆnaaragirira abhasirikare bhagende bhamusoosye agatigati ya abhaanu bharya kwa amanaga na okumwingisya mu‑runengo rwa obhutungi.

11Mu‑ngeta ya orusuku orwoorwo, Raatabhugenyi ˆneemereeguru ayeeyi na Pawuro, ˆnaamubhwira ati, “Fungʼama! Rwa kutyo wansoosisya obhubhambaasi Yerusareemu anu, nikwo kutyo wone ni bhusibhusi unsoosisye obhubhambaasi na mu‑musi gwa Ruumi.”

Pawuro kaaromerwa iniku ya okumwita

12Bhwejire bhwacha katondo, Abhayawudi abhandi nibharomera Pawuro iniku. Nibheeyima ebhiryo kwa echirayiro ati, bhatakuja kurya noorwo okunywa bhachaari okwita Pawuro. 13Abhaanu bhanu ꞉bhaaromere iniku eyo, bhaariga nibhaambuka makumi gana. 14Mbe, nibhagenda ku‑bhakuru bha abhagabhisi na ku‑bhakuru bha Abhayawudi, nibhabhabhwira ati, “Cheeyima ebhiryo bhoone kwa echirayiro ati, chitakurya noorwo okunywa chichaari okwita Pawuro. 15Mbe woori, emwe aamwi na abhakuru bheejaanyu mw‑ibharaja ryemwe, omukenwa musabhwe omukuru wa abhasirikare korereki areete Pawuro kw‑imwe. Mwikore wuti omwenda okumubhuusirisya kisikisi inguru ya emisango jaaye. Eswe chiimaririiye okumwita achaari okukinga anu.”

16Nawe omwiwa wa Pawuro, ˆnoongwa inguru ya iniku eyo. Kurwa ejo, ˆnaagenda mu‑runengo rwa obhutungi ˆnaamubhwira. 17Niwo Pawuro ˆnaabhirikira omwangarisi umwi wa abhasirikare, ˆnaamubhwira ati, “Sira omusigaji unu ku‑mukuru weemwe, ari na omusango gwa okumubhwira.” 18Mbe, omwangarisi urya, ˆnaasira omusigaji oyo ku‑mukuru na okumubhwira ati, “Pawuro, omubhoywa urya, aambirikira na okunsabhwa ati, nireete omusigaji unu kw‑awe, kwa okubha ari na omusango gwa okukubhwira.” 19Omukuru wa abhasirikare oyo, ˆnaagwata omusigaji oyo okubhoko, ˆnaamwichundya ku‑mbari, ˆnaamubhuusya ati, “Oweenda okumbwira ki?”

20Omusigaji oyo ˆnaamubhwira ati, “Abhayawudi bheekirisyanya bhakusabhwe usire Pawuro mw‑ibharaja ryebhwe rikuru mutondo. Abhaja okwikora wuti abheenda okumubhuusirisya kisikisi inguru ya echiina chaaye. 21Nawe waasiga okubheekirisisya, kwa okubha abhaanu bhanu abhaambuka makumi gana abhamwiteganira. Bharayiiye ati bhatakurya noorwo okunywa bhachaari okumwita. Woori bhatengeejere, abharindirira ubheekirisisye risabhwa ryebhwe.” 22Mbe, omukuru wa abhasirikare oyo ˆnaabhwira omusigaji oyo ati genda, nawe ˆnaamukomeeresya ati, “Waasiga okubhwira omuunu woonewoone ati wambwira emisango jinu.”

Pawuro kaasirwa ku‑musiibha Feeriki

23Neeya omukuru urya ˆnaabhirikira abhaangarisi bhabhiri bha abhasirikare bhaaye, ˆnaabhabhwira ati, “Mwiraabhe abhasirikare magana gabhiri (200), abhasirikare makumi gataanu na gabhiri abha jifwaraasi na abhandi magana gabhiri (200) abha amachumu bhagende Kayisaariya saa esatu mu‑ngeta. 24Ka wone mwiraabhe ifwaraasi inu Pawuro kaja okuriinya‑ko korereki asirwe na omurembe ku‑musiibha Feeriki.”

25Neeya ˆnaakaama inyarubha ku‑Feeriki ati,

26“Anye Kirawudiyo Riisiya, ku‑musiibha Feeriki owa echibharo, enikukeesya. 27Omuunu unu enimutuma kw‑awe, aariga agwatirwe na Abhayawudi bhanu bhaariga bhari yeeyi okumwita. Ninkinga arya na echise cha abhasirikare, nimmuwonʼya, kwa okubha ꞉naabhwene emisango ati omwene ni Muruumi. 28꞉Naakenere okumenya ati ni kurwa ki bhaariga nibhamusitaaka, kurwa ejo nimmusira imbere ya ribharaja rikuru rya Abhayawudi. 29Niwo ninsombookerwa ati, aariga ˆnaasitaakibhwa kwa emisango ja ebhiraagiro bhya idiini yeebhwe ya Echiyawudi. ꞉Ataasitaakiibhwe kwa omusango gwonegwone gunu gwiyire eetwe amwi okubhoywa. 30Mbe, nejire naabhwirwa ati bhamuromeeye iniku, nikwo okukora naamutuma kw‑awe awoawo. Naabhwira abhasoko bhaaye wone bhaaje korereki bhaayike echiina cheebhwe cha okumusitaaka kw‑awe.”

31Mbe, abhasirikare kwa okuruubha amaragiriro ganu ꞉bhaayaaywe, nibhagega Pawuro omwanya gwa mu‑ngeta na okumusira mu‑musi gwa Atipaatiri. 32Bhwejire bhwacha, nibhasiga abhasirikare abha jifwaraasi, nibhagenderera na orugendo aamwi na Pawuro. Abhasirikare bhanu bhaaribhataga amaguru nibhasubha mu‑runengo rwa obhutungi. 33Abhasirikare abha jifwaraasi abho bhejire bhaakinga Kayisaariya, nibhayaana omusiibha inyarubha irya, nibhatuura Pawuro wone mu‑mabhoko gaaye. 34Omusiibha oyo, ˆnaasoma inyarubha irya, ˆnaabhabhuusya ati, ni omuunu wa omukoowa ki. Abheene nibhamusubhya ati, kaasooka mu‑mukoowa gwa Kiriikiya. 35Niwo ˆnaabhwira Pawuro ati, “Enija okutegeresya echiina chaawo, omwanya gunu abhasoko bhaawo bhaakakinga anu.” Neeya ˆnaaragirira ati Pawuro aangarirwe mw‑iyumba rya echikama rya Yeroode.

Currently Selected:

Ebhikorwa bhya Jitumwa 23: jit

Highlight

Copy

Compare