Ebhikorwa bhya Jitumwa 18

Pawuro mu‑musi gwa Koriito

1Emisango ejo jejire jaawa, Pawuro ˆnaasooka mu‑musi gwa Ateene awo, ˆnaagenda mu‑musi gwa Koriito. 2Awo ˆnaabhugana na Omuyawudi, risiina ryaye aatogwaga Akiira, omwibhurwa wa mu‑mukoowa gwa Pooto. Akiira oyo aamwi na omugasi waaye Pirisiira, bhaariga bhasookere mu‑musi gwa Ruumi mu‑chaaro cha Yitaariya, kwa okubha Kayisaari Kirawudiyo aariga aragiriiye Abhayawudi bhoone bhabhirimibhwe mu‑musi ogwo. Pawuro ˆnaagenda okubharora, 3kwa okubha Pawuro aakoraga emirimu ja okusona amayeema rwa abheene, ˆnaasigara eweebhwe awo na okukora emirimu aamwi nabho. 4Bhuri orusuku rwa Isabhaato, Pawuro aaregeejaga okukongya Abhayawudi aamwi na Abhayunaani mu‑nju ya eriikofyanyo rya Abhayawudi.

5Siira na Timoteewo bhejire bhaakinga awo okusooka Makedooniya, Pawuro aariga ˆnaasoosya omwanya gwaye gwone okwiyigisya omusango gwa Nyamuwanga ku‑Bhayawudi, ˆnaabhabhwiraga ati Yeesu niwe Kirisito. 6Abhayawudi abho nibhamurema na okumufuma muno, omwene ˆnaakubhura emyenda jaaye, kwa okurema emisango jeebhwe, ˆnaabhabhwira ati, “Isagama yeemwe ibhe inguru yeemwe abheene! Anye, nitari na esoro, naakuumisya jinu naariga ninkenwa okukora. Okwambira woori, enija okugenda ku‑bhaanu bhanu bhatari Bhayawudi.”

7Neeya Pawuro, ˆnaasooka mu‑nju ya eriikofyanyo rya Abhayawudi, ˆnaagenda mu‑nju ya omuunu umwi risiina ryaye aatogwaga Tiito Yuusito, omuramya wa Nyamuwanga. Inju yaaye yaariga isiijeene na inju eyo ya eriikofyanyo. 8Kirisipo, omukuru wa inju ya eriikofyanyo eryo, ˆneekirisya Raatabhugenyi, aamwi na abhaanu bhoone bha iika ewaaye. Abhakoriito abhaafu nibhategeresya Pawuro, nibheekirisya na okubhatiijibhwa.

9Rusuku rumwi mu‑ngeta Raatabhugenyi ˆnaabhwira Pawuro mu‑bhiroro ati, “Siga okuubhaya, genderera okuraasya, siga okujibhira. 10Anye niri aamwi na awe, atari‑wo omuunu woonewoone unu kaja okukuwutaasya. Okubha anye niri na abhaanu bhaafu bhanu bhari orubhaara rwani.” 11Kurwa ejo Pawuro, ˆnaamara omuguuga gumwi na esinja ari Koriito awo, ˆneeyigisyaga abhaanu omusango gwa Nyamuwanga.

12Omwanya gwa obhutungi bhwa Gaariyo, omusiibha wa Echiruumi mu‑mukoowa gwa Akaaya, Abhayawudi bhoone aamwi nibhagwata Pawuro, nibhamusira imbere ya echitebhe cha indamu. 13Nibhamusitaaka nibhaayikaga ati, “Omuunu unu kaakongya abhaanu bharamye Nyamuwanga ku‑njira inu itakwikirisibhwa na ebhiraagiro bhya Muusa.”

14Pawuro ejire eenda okwibhagira era kutya, Gaariyo ˆnaabhwira Abhayawudi ati, “Emwe Abhayawudi mukabheeye nimusitaaka omuunu unu inguru ya obhujabhi amwi okukora echikayo echibhiibhi, jikabheeye ja ekisi okubhategeresya. 15Nawe kwa okubha ni inguru ya emisango, amasiina na ebhiraagiro bhyemwe, mujimare emwe abheene. Naarema okubha omuramusi wa emisango ejo.” 16Niwo ˆnaabhabhirimya okusooka imbere ya echitebhe cha indamu. 17Awo bhoone nibhagwata Sositeene, omukuru wa inju ya eriikofyanyo rya Abhayawudi, nibhamubhuma awoawo imbere ya echitebhe cha indamu. Noorwo kutyo Gaariyo ꞉ataaruubhiriiye noorwo omusango gumwi.

Pawuro kaasubha Atiyookiya

18Pawuro ejire aabha Koriito kwa omwanya, ˆnaaragana na abheekirisya abheejaabho, ˆnaagenda mu‑musi gwa Keekereya, ˆnaamwega jifwiri jaaye#18:18 ˆNaamwega jifwiri jaaye. Abhayawudi bhaariga nibhamwega jifwiri jeebhwe rwa echibharikisyo ati bhaakuumisya echirayiro amwi ati okumukuuya Nyamuwanga inguru ya amabhando gaaye. kwa okubha aariga ateeye‑wo echirayiro. Neeya Pawuro, Pirisiira na Akiira, nibhatura mu‑nyanja bhari mu‑ngarabha nibhagendaga mu‑mukoowa gwa Siiriya. 19Mu‑njira, bhejire bhaakinga mu‑musi gwa Yefeeso, Pawuro ˆnaasiga abheejaabho erya. Omwene ˆneengira mu‑nju ya eriikofyanyo, ˆnaayikana na Abhayawudi. 20Abhayawudi abho nibhasabhwa Pawuro ati oongesye jisiku ja okubha nabho, omwene ꞉ateekirisiisye. 21Nawe omwanya gunu ꞉eemukire, ꞉aabhabhwiriiye ati, “Araabha Nyamuwanga aakeenda nirisubha kw‑imwe anu rindi.” Neeya ˆneemuka Yefeeso na ingarabha.

22Mbe, ejire aakinga ˆnaasikirira mu‑musi gwa Kayisaariya, ˆnaagenda Yerusareemu, ˆnaakeesya abheekirisya, neeya ˆnaagenda mu‑musi gwa Atiyookiya. 23Ejire aamara siku nooto, ˆnaasooka‑wo, ˆnaatura mu‑mukoowa gwa Garaatiya na mu‑mukoowa gwa Furiigiya, ˆnaaribhatiraga na okukomeesya abheeyigisibhwa bhoone bha Kirisito.

Apooro kaamba emirimu jaaye

24Mbe Omuyawudi umwi, omwibhurwa wa mu‑musi gwa Arekijandiriya risiina ryaye Apooro, ˆnaaja Yefeeso. Apooro oyo aariga ari muunu owa obhuturo bhunene bhwa okusimura na okusombookerwa kisi Ebhikaame Ebhyeru. 25Omuunu oyo aariga eeyigisiibhwe injira ya Raatabhugenyi, na aariga ˆnaayiririrwa mu‑mwoyo gwaye, ˆneeyigisyaga na okwayika abhwerubhweru inguru ya Yeesu. Noorwo kutyo aariga amenyere inguru ya obhubhatiijo bhwa Yowana era. 26Apooro ꞉aambire okusimura kwa ribhaasi nene mu‑nju ya eriikofyanyo rya Abhayawudi. Mbe Pirisiira na Akiira, bhejire bhaamutegeresya nibhamukuma iika eweebhwe, nibhamusomboorera emisango ja injira ya Nyamuwanga jinu aariga achaari okuungwa.

27Apooro ejire aakena okugenda mu‑mukoowa gwa Akaaya, abheekirisya bha Yefeeso nibhamukomeesya, nibhamukaamira inyarubha ya okumumenyesya ku‑bheeyigisibhwa bha Yeesu bheende‑yo. Ejire aakinga eyo, ꞉aasakiiye muno abhaanu bhanu bhaariga bheekirisiisye Yeesu ku‑bhwitiriranya bhwa Nyamuwanga. 28Okubha Apooro, ꞉aayigire Abhayawudi abhwerubhweru, aabheeresyaga kwa Ebhikaame Ebhyeru ati Yeesu niwe Kirisito.

Currently Selected:

Ebhikorwa bhya Jitumwa 18: jit

Highlight

Copy

Compare