Ebhikorwa bhya Jitumwa 16

Pawuro kaagega Timoteewo

1Pawuro ˆnaagenda mu‑misi ja Deeribhe na Risitura. Risitura eyo aariga ari‑wo omwiyigisibhwa umwi wa Yeesu, risiina ryaye aatogwaga Timoteewo. Nyiramwene aariga ari Omuyawudigasi, omwene aariga ari mwikirisya wa Yeesu, nawe esemwene aariga ari Muyunaani. 2Timoteewo aariga ari omuunu wa jikuma ja ekisi agati ya abheekirisya abheejaabho bha Risitura na Yikoniya. 3Pawuro ˆneenda abhega ˆnaaruubhana nage mu‑rugendo rwaye, kutyo ˆnaamutenda rwa Abhayawudi. Okubha Abhayawudi bhoone bheende‑yo bhaariga bhamenyere ati esemwene Timoteewo aariga ari Muyunaani bhanu bhatakutenda. 4Pawuro na abheejaabho abho, nibhagenda nibhaturaga mu‑misi ja ende‑yo, nibhabhwiraga abheekirisya amaragiriro ganu gateeywe‑wo na jitumwa ja Yeesu na abhakaruka bha Yerusareemu. ꞉Bhaakorere kutyo korereki abheekirisya bheende‑yo wone bhabhe nibhagayuka amaragiriro ago. 5Kutyo nikwo abheekirisya ꞉bhaagendereeye okukomeera mu‑riikirisya. Obhukumi bhwebhwe bhwariga nibhwiyongesya bhuri rusuku.

Ebhiroro bhya Pawuro inguru ya omuunu wa Makedooniya

6Pawuro na abheejaabho abho, bhaariga bhagaanyiibhwe na Mwoyo Mweru ati, bhaasiga okwiyigisya omusango gwa Nyamuwanga mu‑mukoowa gwa Asiya. Kurwa ejo ꞉bhaaturire mu‑mikoowa ja Furiigiya na Garaatiya. 7Bhejire bhaakinga ku‑rubhibhi rwa okwingira mu‑mukoowa gwa Miisiya, nibharegeeja okwingira mu‑mukoowa gwa Bhitiniya, nawe Mwoyo wa Yeesu ꞉ataabheekirisisiisye. 8Kurwa ejo nibhatura mu‑mukoowa gwa Miisiya, nibhagenda mu‑musi gwa Turoowa.

9Mu‑ngeta, Pawuro ˆnaarora ebhiroro. Mu‑bhiroro ebhyo, ꞉aarorere omuunu umwi wa mu‑mukoowa gwa Makedooniya eemereeguuyu, ˆnaamwirembeeresya, ˆnaayika ati, “Yaambuka, uuje Makedooniya enu, uchisakire.” 10Pawuro ejire aamara okurora ebhiroro ebhyo, awoawo nichikora bhwangu okuyenja ingarabha chigende Makedooniya eyo, kwa okubha ꞉chaarorere ati Nyamuwanga achibhirikiiye korereki chiraasisye abhaanu bheende‑yo Emisango ja Ekisi.#16:10 ꞉Chaarorere ati Nyamuwanga achibhirikiiye korereki chiraasisye abhaanu bheende‑yo Emisango ja Ekisi. Abhamenyi bhaafu abheetogera ati, emisango jinu ejeeresya ati Ruuka aambire orugendo aamwi na Pawuro.

Riidiya keekirisya Yeesu

11Mbe, nichisooka Turoowa awo na ingarabha, nichigenda kw‑isinga rya Samotiraake. Bhwejire bhwacha, nichigenda na ingarabha nichikinga mu‑musi gwa Neyapoori. 12Okusooka awo nichigenda Firiipi omusi omukuru gwa Makedooniya, anu bhaariga bheekaaye Abharuumi. Eswe wone, nichiikara mu‑musi ogwo kwa siku ndebhe. 13Orusuku rwa Isabhaato nichigenda anja ya omusi ogwo, ku‑mbarimbari ya omusima, okubha cheeyikanyaga ati, awo niwo ꞉chaakabhwene wa okurombera. ꞉Cheenyanjire, nichiroma na abhagasi bhanu bhaariga bheekumanyiisye awo. 14Mu‑bhanu bhaachitegeresyaga, aariga ari‑mo omugasi umwi, asookere mu‑musi gwa Tiyaatira, risiina ryaye aatogwaga Riidiya. Riidiya oyo, aariga ari omugusi wa emyenda ja ekisi ja ijambarawu na aaramyaga Nyamuwanga. Pawuro ejire aabhabhwira Emisango ja Ekisi, Raatabhugenyi ˆneegura mutima gwa Riidiya, ˆnaategeresya kisi omusango gunu Pawuro aariga ˆnaaraasya. 15Bhunu ꞉eekirisiisye na okubhatiijibhwa omwene aamwi na abhaanu bha iika ewaaye, ˆnaachiirembeeresya ati, “Araabha chimari mwarora ati anye neekirisya Raatabhugenyi Yeesu, ambe enibhakuma iika ewaani mwinyanje.” ˆNaachisegera muno ati chigende ewaaye.

Pawuro na Siira abhatuurwa mw‑ibhoyero

16Rusuku rumwi, omwanya gunu chaariga nichigenda anu abhaanu bhaariga nibhasabhwa Nyamuwanga, nichibhugana na omugayagasi. Omugayagasi oyo aariga ari na risambwa rinu ryariga nirimuyaana obhuturo bhwa okuragura. Okuruubhana na obhuragusi obhwo, abhaami bhaaye bhaariga nibhabhona omuriiro munene. 17Omugayagasi oyo, aariga ˆnaaruubhirira Pawuro na eswe, ˆnaamwayaga, ˆnaayikaga ati, “Bhanu ni abhakosi bha Nyamuwanga unu ari Inguru ya Bhyone. Bhari anu okubhamenyesya injira ya okuchungurwa.” 18ˆNaakora kutyo bhuri rusuku, okukingira Pawuro ˆnaabhiyirwa muno. Ku‑bhuteero, ˆnaaringira omugayagasi oyo, ˆnaagonya risambwa rinu ryariga rimuri‑ko ati, “Enikugonya kw‑isiina rya Yeesu Kirisito, sooka ku‑muyarakaji unu!” Awoawo risambwa eryo nirimusooka‑ko.

19Abhaami bha omugayagasi oyo, nibharora ati obhwiyikanyo bhwebhwe bhwa okubhona ribhona bhwawa. Kutyo, nibhagwatwa risungu, nibhakurumukira Pawuro na Siira, nibhabhakurura, nibhabhasira mw‑iguriro, imbere ya riramuriro rya abhakuru bha ebhiraagiro bhya Echiruumi. 20Nibhabhasitaaka ku‑bhatungi abho nibhaayikaga ati, “Abhaanu bhanu ni Bhayawudi, abhakora omusi gweswe gubhe na injogere. 21Abheeyigisya ati chiruubhirisye jitungwa jinu jiteeyire okukorwa na eswe Abharuumi. Ebhiraagiro bhyeswe Abharuumi ebhichiiyigisya ati chisige okujiikirisya noorwo okujiruubhirisya.”

22Echise cha abhaanu bhanu bhaariga bheekumanyiisye awo nibhagenda kwa risungu ku‑Pawuro na Siira. Abhatungi abho nibhabhafuura emyenda kwa amanaga na okuragirira ati Pawuro na Siira bhabhumwe muno. 23Bhejire bhaamara okubhumwa muno, nibhatuurwa mw‑ibhoyero, omusirikare wa ribhoyero ˆnaaragirirwa ati bharindwe muno. 24Okuruubhana na amaragiriro ago omuriisi oyo ˆnaabheengisya mu‑chisago cha mu‑nda agati, ˆnaabhoya amaguru geebhwe kwa amaseega ku‑ngʼingi.

25Yejire yaakinga mu‑bhwire agati, Pawuro na Siira bhaasabhwaga na okumwimbira Nyamuwanga jinyimbo ja okumukusya, enu abhabhoywa abheejaabho nibhabhategeresyaga. 26Awo rinyamutikima rinene muno niritura mu‑chaaro nirisingisya orufuka rwa ribhoyero. Awoawo jinjigi joone nijiyigura ejeene era na amaseega goone ganu bhaariga bhabhabhoyeeye nigasuruumuka. 27Omuriisi wa ribhoyero oyo, ˆneemuka. Ejire aarora ati jinjigi jiigukire, ˆneetogera ati abhabhoywa abho bhoone bhaatoroka. ˆNaasoromora imbanda yaaye okwenda okwiyita. 28Awo Pawuro ˆnaamura obhuraka, ˆnaamubhwira ati, “Nuusige okwiyita! Bhoone chiri munu!” 29Awo, omuriisi oyo ˆnaaragirira ati idara iretwe. ˆNeengira mw‑ibhoyero omwo bhwangwebhwangwe, ˆnaagwa imbere ya Pawuro na Siira ˆnaayararaga.

30Akatungu katooto okutura, omuriisi urya ˆnaawuruka na Pawuro na Siira mw‑ibhoyero, ˆnaabhabhuusya ati, “Emwe abhaami bhaani, nikore kutiki korereki nichunguke?” 31Nibhamusubhya ati, “Ikirisya Raatabhugenyi Yeesu, niwo owuja okuchunguka. Abhaanu bhoone bha iika ewaawo wone, bheekirisye Yeesu, niwo abhaja okuchunguka.” 32Awo Pawuro na Siira nibheeyigisya omuriisi oyo Emisango ja Ekisi inguru ya Raatabhugenyi Yeesu, aamwi na abhaanu bha iika ewaaye. 33Omwanya ogwoogwo gwa mu‑ngeta, omusirikare ˆnaagega Pawuro na Siira, ˆnoosya ebhiwuta bhyebhwe, ˆnaabhatiijibhwa awoawo aamwi na abhaanu bhaaye bhoone. 34ˆNaakuma Pawuro na Siira iika ewaaye, ˆnaabhayaana ebhiryo. ˆNaakonderwa muno aamwi na abhaanu bhaaye bhoone, kwa okubha ꞉bheekirisiisye Nyamuwanga.

35Bhwejire bhwacha, abhatungi nibhatuma abhaangarisi bheebhwe ku‑muriisi wa ribhoyero, nibhamubhwira ati, “Mwigurire abhaanu bhanu.” 36Niwo omuriisi oyo, ˆnaabhwira Pawuro ati, “Abhatungi bhaatuma obhuraka ati, mwigurirwe. Kurwa ejo, muwuruke mugende na omurembe.”

37Nawe Pawuro ˆnaabhwira abhaangarisi abho ati, “Bhaamachibhuma jisimbo abhwerubhweru imbere ya abhaanu bhatachibhusirisiisye, nibhachisira mw‑iromero, keenu eswe chiri Bharuumi!#16:37 Bharuumi. Bhaariga bhatakwikirisibhwa ati bhabhume Omuruumi weejaabho mu‑meeso ga abhaanu bhatamusirire mw‑iromero. Nibhachituura mw‑ibhoyero, ka woori abheenda okuchisoosya‑mo bhumbise! Chitakwikirisya! Ni bhusibhusi abheene nibho bhaaje anu bhachisoosye‑mo.” 38Abhaangarisi bharya nibhagenda okubhwira abhatungi abho ejo joone. Abhatungi abho, bhejire bhoongwa ati Pawuro na Siira ni Bharuumi, nibhagwatwa na obhuubha. 39Nibhaaja okubharembeereja. Nibhabhasoosya mw‑ibhoyero, nibhabheerembeeresya ati bhasooke mu‑musi ogwo.

40Pawuro na Siira, bhejire bhaasooka mw‑ibhoyero, nibhagenda iika ewa Riidiya. Awo ꞉bhaabhugeene na abheekirisya, nibhabhasimbiisya, niwo nibhasooka mu‑musi ogwo.

Currently Selected:

Ebhikorwa bhya Jitumwa 16: jit

Highlight

Copy

Compare