Ebhikorwa bhya Jitumwa 13

Bharinaabha na Saawuri abhayaanwa emirimu

1Mw‑ikanisa rya mu‑musi gwa Atiyookiya, bhaariga bhari‑mo abharagi na abheeyigisya. Mu‑bheene bhaariga bhari, Bharinaabha, Simiyooni unu aatogwaga Nigeeri,#13:1 Nigeeri. Obhugajuro bhwa risiina eryo ni ati, omuunu omwirafuru. Ruukiyo okusooka Kureene, Manayeni unu aariga arereeywe aamwi na omukama Yeroode Atipaasi, na Saawuri. 2Bhunu bhaariga nibharamya Raatabhugenyi na okwiyima okurya ebhiryo,#13:2 Okwiyima okurya ebhiryo. Omwanya gunu, bhanu ꞉bheekirisiisye, ꞉bheeyimire okurya kwa omwanya omurebhe korereki bhafogerere Nyamuwanga muno kw‑isabhwa ryebhwe. Mwoyo Mweru ˆnaabhabhwira ati, “Munsorere Bharinaabha na Saawuri ku‑mirimu jinu nibhabhirikiriiye.” 3Mbe, bhejire bhaamara okusabhwa Nyamuwanga na okwiyima okurya ebhiryo, nibhatuura amabhoko geebhwe ku‑Bharinaabha na Saawuri okubhasabhirwa, nibhabhatuma bhagende.

Bharinaabha, Saawuri na omuragi omubheeyi Kiipuro

4Niwo, Bharinaabha na Saawuri, nibhatumwa na Mwoyo Mweru. Nibhagenda nibhooromokera mu‑musi gwa Serukiya. Okusooka awo nibhariinya mu‑ngarabha, nibhagenda kw‑isinga rya Kiipuro. 5Omwanya gunu ꞉bhaakingire kw‑isinga eryo, mu‑musi gwa Saraami, nibhaamba okuraasisya abhaanu omusango gwa Nyamuwanga mu‑nju ja ameekofyanyo ga Abhayawudi. Awo Yowana Maariko, aariga ari aamwi nabho wuti musakisi weebhwe.

6Bhejire bhaamara okutura agatigati ya Kiipuro, nibhakinga mu‑musi gwa Paafo. Awo nibhabhugana na Omuyawudi umwi owa amawufyo, omuragi omubheeyi, risiina ryaye ni Bhaari‑Yeesu.#13:6 Bhaari‑Yeesu. Mu‑Chiyebhuraniya obhugajuro bhwaryo ni mwana wa echirume wa Yooswa. 7Omuunu unu aariga ari musakisi wa omusiibha Serugiyo Pawuro, omuunu wa obhwengeeso muno. Omusiibha oyo, ˆnaabhirikira Bharinaabha na Saawuri bhagende ewaaye, ꞉aakenere okutegeresya omusango gwa Nyamuwanga okusooka ku‑bheene. 8Nawe Erima, owa amawufyo oyo, obhwo nibhwo obhugajuro bhwa risiina ryaye, aariga ˆnaayaajana muno na Bharinaabha na Saawuri, enu ˆnaaregeejaga okukongya omusiibha oyo aasiga okwikirisya Yeesu.

9Saawuri unu aatogwaga risiina erindi ati Pawuro, enu eejuuywe Mwoyo Mweru, ˆnaaringira Erima nekeneke, 10ˆnaamubhwira ati, “Awe omwana wa Syetaani! Awe uri omusoko wa eja ekisi joone jinu jiri imbere ya Nyamuwanga! Wijuuye orubheeyi era, awe utakwendaga okurora omusango gwa rirenga! Utakusiga okuyindura emisango ja echimari ja Raatabhugenyi okubha ja orubheeyi? 11Woori tegeresya! Raatabhugenyi kaja okukubhuma, owuja okubha muwofu, utarirora omuumwi kwa omwanya omurebhe.” Awoawo, orukoowa niruwofufya Erima ameeso, ˆnaabha mu‑chisuute ˆnaarema okurora. ˆNeeyindayinda korereki abhone omuunu unu, kaatura okumugwata okubhoko amutangasye.

12Omwanya gunu omusiibha oyo ꞉aarorere echikorwa echo, ˆneekirisya Raatabhugenyi, ˆnaaruguurira muno ameeyigisyo ganu geeyigisibhwaga inguru ya Raatabhugenyi.

Pawuro na Bharinaabha abheeyigisya Pisiidiya inguru ya Yeesu

13Pawuro na abheejaabho nibhasooka Paafo awo. Nibhatura mu‑ngarabha nibhagenda nibhasikirira mu‑musi gwa Perege mu‑mukoowa gwa Pamufiriya. Yowana Maariko ˆnaabhasiga awo, ˆnaasubha Yerusareemu. 14Bhejire bheeya Pawuro na Bharinaabha nibhasooka Perege, nibhagenda, nibhasikirira mu‑musi gwa Atiyookiya mu‑mukoowa gwa Pisiidiya.#13:14a Mu‑musi gwa Atiyookiya mu‑mukoowa gwa Pisiidiya. Mu‑chitabho cha Ebhikorwa bhya Jitumwa, jiri‑mo Atiyookiya ebhiri. Ya okwamba ni Atiyookiya ya mu‑mukoowa gwa Siiriya. Ya kabhiri ni Atiyookiya ya mu‑mukoowa gwa Pisiidiya. Atiyookiya ya mu‑mukoowa gwa Siiriya, niryo rikanisa ryayo ꞉ryatumire Pawuro na Bharinaabha. Orusuku rwa Isabhaato,#13:14b Isabhaato. Ku‑Bhayawudi ni rusuku rwa okuramya Nyamuwanga na okwisya omwoyo era. Ku‑meeresyo amaafu, ringira mu‑Meeresyo inguru ya Emisango Emikomeeye. nibheengira mu‑nju ya eriikofyanyo rya Abhayawudi nibheenyanja. 15Abhakuru bha inju eyo bhejire bhaamara okusoma mu‑bhiraagiro bhya Muusa na mu‑bhitabho bhya abharagi, nibharagirira omuunu ku‑Pawuro na Bharinaabha, ˆnaabhabhwira ati, “Abhayiri bhaasu, araabha muri na omusango gwa okuroma na abhaanu gwa okubhasimbiisya emyoyo, mugwayike.”

16Awo Pawuro ˆneemereeguru, ˆnaabhawungisya okubhoko korereki bhamutegeresye, ˆnaayika ati, “Emwe abhaanu bha Yisirayeeri, na emwe abhaanu bhanu mutari Bhayawudi bhanu omuramya Nyamuwanga, muntegeresye! 17Nyamuwanga wa abhaanu bha Yisirayeeri niwe ꞉aawuuwe bhasaaja weeswe. Ku‑mwanya gunu bhaariga bheekaaye ebhugenyi mu‑chaaro cha Miisiri, ꞉aabhakorere okubha eyanga enene muno. Ejire eeya ˆnaabhatangasya, ˆnaabhasoosya Miisiri kwa amanaga gaaye maafu muno. 18Ku‑mwanya gwa emiguuga makumi gana, ˆnaabheegumiirisisya ibhara. 19Ejire eeya, ˆnaasingaarisya amaanga gataanu na gabhiri mu‑chaaro cha Kanaani, echaaro cheebhwe, ˆnaayaana Abhayisirayeeri okubha omwandu gwebhwe. 20Ejo joone ꞉jaakorekeene ku‑mwanya gwa emiguuga magana gana na makumi gataanu (450).

“Ejo okuwa, Nyamuwanga ˆnaayaana bhasaaja weeswe abharamusi okubhatangasya, okukingira omwanya gwa omuragi Samweri. 21Niwo nibhasabhwa ati bhabhe na omukama. Nyamuwanga ˆnaabhayaana Saawuri, omwana wa Kiisi, wa mu‑ruganda rwa Bhenjamiini, ˆnaabha omukama emiguuga makumi gana. 22Nawe Nyamuwanga ˆnaasoosya‑ko Saawuri, ˆnaatuura‑ko Dawudi okubha omukama weebhwe. Nyamuwanga ꞉aayikire ja ekisi inguru ya Dawudi ati, ‘Naarora Dawudi omwana wa Yeese, unu kaankondisya omwoyo gwani, ka wone niwe arikora okwenda kwani kwone.’

23“Okusooka mu‑ruganda rwa omukama Dawudi, Nyamuwanga aareetera Abhayisirayeeri Omuchungusi Yeesu, rwa kutyo ꞉aabharagire. 24Omwanya gunu Yeesu aariga achaari okwamba emirimu jaaye, Yowana aariga ˆnaaraasisya Abhayisirayeeri bhoone ati, bhate ebhibhiibhi bhyebhwe na bhabhatiijiibhwe. 25Yowana ejire aarebherera okumara emirimu jaaye, ꞉aayikire ati, ‘Mutegeresye, omurora ati naanye ga? Anye nitari Kirisito unu omutendesya! Omwene ariija inyuma yaani, anye niteeyire noorwo okusuruumura jingoye ja ebhiraato bhyaye!’#13:25 Okusuruumura jingoye ja ebhiraato bhyaye. Ku‑misiro ja omwanya gurya omugenyi aariga akeengira mu‑nju, omugaya aariga ˆnaamusuruumura jingoye ja ebhiraato, okumufuura ebhiraato na okwosya amaguru gaaye.

26“Abhayiri bhaasu, emwe abhaanu bha orwibhuro rwa Bhurayimu, na emwe abhaanu bhanu mutari Bhayawudi bhanu omuramya Nyamuwanga, emisango ja obhuchungusi bhunu jaaretwa kw‑iswe! 27Okubha abhaanu bha Yerusareemu na abhakuru bheebhwe ꞉bhataamenyere ati Yeesu niwe Omuchungusi, nibhamuramura eetwe. Kwa okukora kutyo, ꞉bhaakuumisiisye emisango jinu jikaamirwe inguru yaaye mu‑bhitabho bhya abharagi, na nijo jaasomwaga bhuri rusuku rwa Isabhaato. 28Abhaanu ꞉bhataabhwene isonga yooneyoone ya rirenga okuramura Yeesu eetwe, noorwo kutyo nibhasabhwa Piraato kwa amanaga ati, eetwe. 29Bhejire bhaakuumisya joone jinu jikaamirwe inguru ya Yeesu, nibhamworomosya okusooka ku‑musarabha, nibhamutuura mu‑fwa.#13:29 Mu‑fwa. Iifwa yaariga iri senga inu yaariga isimbirwe mu‑mabhuyi. 30Nawe Nyamuwanga ˆnaamusuurura okusooka mu‑bhafuuwe! 31Na ku‑siku nyafu, Yeesu ˆneebhuurisya ku‑bhaanu bhanu bhaariga nibharibhata aamwi nage okusooka Gariraaya, na okuja Yerusareemu. Woori, abho nibho abhabhambaasi bhaaye ku‑bhaanu.

32“Eswe echibharaasisya emwe Emisango ja Ekisi ati, jinu nijo Nyamuwanga ꞉aaragire bhasaaja weeswe, 33aajikuumisya kw‑iswe abhaana bheebhwe, kwa okusuurura Yeesu. Nikwo kutyo jikaamirwe mu‑Jabhuri ya kabhiri ati,

‘Awe naawe Omwana waani,

reero eniraasya ati anye niri Somwana.’#13:33 Ringira Ijabhuri 2:7.

34“Na echimari inguru ya okumusuurura okusooka mu‑bhafuuwe, aasiga okusubha‑yo rindi na okubhora, Nyamuwanga ꞉aayikire kutya,

‘Nirikuyaana amabhando ameeru na ga echimari,

ganu ꞉naaragire Dawudi.’#13:34 Ringira Iisaya 55:3.

35“Ikaamirwe orubhaara orundi mu‑Jabhuri ati,

‘Utarimusiga Omweru waawo abhore.’#13:35 Ringira Ijabhuri 16:10.

36“Okubha Dawudi ejire aakuumisya joone jinu Nyamuwanga aariga akarariiye okukora ku‑mwanya gwa riyimbo ryaye, ˆnaafwa, ˆnaamaama nyombe na bha esemwene, omubhiri gwaye nigubhora. 37Nawe unu, Nyamuwanga ꞉aamusuuruuye, omwene ꞉ataabhorere.

38“Woori abhayiri bhaasu, eneenda muntegeresye kisi! Echibharaasisya ati, ku‑njira ya Yeesu Kirisito kuri‑wo okufwirwa echigongo ebhibhiibhi. 39Okutura ku‑mwene era, bhuri muunu unu kaamwikirisya, kaabharirwa ati ni murengeresi imbere ya Nyamuwanga, omusango gunu gutakuturikana kw‑imwe kwa okuruubha ebhiraagiro bhya Muusa. 40Kurwa ejo mwiyangarire kisi korereki mwasiga okugwatwa na emisango jinu ꞉jaakaamirwe mu‑bhitabho bhya abharagi ati,

41‘Emwe bhanu omugaya, muringire!

Muruguure, rindi musingaarike,

kwa okubha enikora omusango mu‑siku jeemwe

gunu mutarigwikirisya, noorwo omuunu akabhasomboorera!’#13:41 Ringira Abhakuuki 1:5.”

42Bhunu Pawuro na Bharinaabha, bhaariga nibhasooka mu‑nju ya eriikofyanyo rya Abhayawudi, abhaanu nibhabharemberesya bhasubhe ku‑Sabhaato inu ꞉yaaruubhiiye, korereki bhaayike inguru ya emisango ejo rindi. 43Omwanya gunu abhaanu abho ꞉bhaanyarambukire, Abhayawudi bhaafu, aamwi na abhaanu abhandi bhanu ꞉bhaagwateene na Abhayawudi bhanu bhaaramyaga Nyamuwanga, nibharuubha Pawuro na Bharinaabha. Abheene wone nibhasimura na abhaanu abho nibhabhakomeeresyaga ati, bhagenderere okwiyikanya obhwitiriranya bhwa Nyamuwanga.

44Orusuku rwa Isabhaato inu ꞉yaaruubhiiye, abhaanu bhaafu bha mu‑musi ogwo, nibhaaja okutegeresya Emisango ja Ekisi inguru ya Raatabhugenyi Yeesu. 45Nawe omwanya gunu abhatangasya bha Abhayawudi ꞉bhaarorere echise echinene cha abhaanu, nibhabha na orwiso muno. Niwo nibharema jinu Pawuro aayikaga, enu nibhamufumaga.

46Noorwo kutyo, Pawuro na Bharinaabha nibhabhasubhya kwa ribhaasi nibhaayikaga ati, “Jaariga jiiyire omusango gwa Nyamuwanga, guraasibhwe kw‑imwe, emwe Abhayawudi okwamba. Nawe kwa okubha mwagurema na okwiramura abheene ati muteeyire obhuwanga bhwa akajaanende, woori echibhasiga echigenda okuraasisya abhaanu bhanu bhatari Bhayawudi. 47Okubha Raatabhugenyi ꞉aachiragiriiye ati,

‘Naakutuura‑wo ubhe obhweru ku‑bhaanu bhanu bhatari Bhayawudi,

korereki ureete obhuchungusi ku‑bhaanu mu‑chaaro choone.’”#13:47 Ringira Iisaya 49:6.

48Abhaanu bhanu bhatari Bhayawudi bhejire bhoongwa emisango ejo, nibhakonderwa na okukuuya Raatabhugenyi ku‑musango gwaye. Bhoone bhanu ꞉bhaasorerwe okubha na obhuwanga bhwa akajaanende, nibhamwikirisya Raatabhugenyi Yeesu. 49Nikwo kutyo Emisango ja Ekisi inguru ya Raatabhugenyi Yeesu jaariga nijiswira mu‑chaaro echo choone.

50Nawe Abhayawudi nibhakungirisya abhagasi bha echibharo bhanu bhaaramyaga Nyamuwanga aamwi na abhatangasya bha omusi ogwo. Abho nibhaamba okunyaasya Pawuro na Bharinaabha na okubhabhirimya bhasooke mu‑chaaro cheebhwe. 51Kutyo, Pawuro na Bharinaabha nibheekuukumura oruteeri rwa ku‑maguru geebhwe, korereki okubhagaanya. Niwo nibheemuka, nibhaja mu‑musi gwa Yikoniya. 52Nawe abheeyigisibhwa bha Yeesu bha Atiyookiya ya Pisiidiya eyo, nibhabha na rikonderwa enene nibhagendereraga okwijusibhwa Mwoyo Mweru.

Currently Selected:

Ebhikorwa bhya Jitumwa 13: jit

Highlight

Copy

Compare