Rum 2
2
Atua iv'ana hua m'a m'ertu arna v'nen viviln
1 #
Mat 7:1; Luk 6:37. Sena si lera, nakm la kv'ana hua m'a m'ertu uraur ha, mkavr si kinkin ml. Sena ti naran kv'ana hua m'a m'ertu uraur, inep'a ti kv'ana hua m'ah uaki, sena ti nakm kaahan si lera kv'ana hua m'a m'ertu uraur sanan ra. 2V'eti nvrndu mamh ti Atua ipav'ana hua arna v'nen dau m'er m'ertu avan si lera. 3?Dui, nakm la kaahan sei kv'ana hua m'a m'ertu uraur sanan nakl ha, kv'ah ti Atua ikautakm anh sanan? 4Nsarei ksip'len vtmien lilan Atua. Hin nln iahrer ilahml. Itrahh ip'arei, v'eti nsarei nakm kaarndu ti vtmienan Atua irn ti iparv'h kani ti parn istu sena si stuam. 5V'eti nlm ihua. Kaarn istu sena si stuam arna nlm. Sena si lera, ktupien der lil ipaiarh arna nl reran Atua, arna napn la Atua ipav'ana hua m'a nelnal udlani arna v'nen viviln, kav'iv'en nl reran ha. 6#Npin 62:12; V'nen 24:12.Hin ipatau anr m'ertu udlani sei ipaviviln a nut avan sei inap'ei. 7Atua ipatu silv'ien ikahiris naran anr m'ertu avan si p'as, kavtala si p'as, m'a naha p'as, m'a sei ikahiris naran. 8V'eti Atua nln iparer kavuv anr m'ertu avv'ahur hir uaki. Ahavsapa v'nen dau, avsapa navanel iaviviln. 9Hin ipatu der anr m'ertu udlani avan si stu, kani ti apavrn istu ipahuadau, m'ertu a Isrel ipatauamu, sarei m'ertu a Kris.
10V'eti ipatu si p'as m'a naha p'as m'a tamat anr m'ertu udlani avan si p'as, m'ertu a Isrel ipatauamu, sarei m'ertu a Kris, 11#TVH 10:17.sena ti Atua iav'ahur nah m'ertu.
12Arv'anudl, v'nen huan a Musis ihei asnr. Naran hir avan si stu, apavmln naran ahavlak a nv' v'nen hua. V'eti m'ertu udlani avlak a nv' v'nen hua, v'nen hua lera ipav'ana hua m'er naran avan si stu. 13Sena ti iav'i m'ertu avrn v'nen hua avviviln arna nahn Atua, v'eti arm'ertu avan sei v'nen hua ivri apavviviln arna nahn. 14Sena ti naran arv'anudl, la v'nen huan a Musis ihei asnr ha, avsapa v'ahienar uaki kavan sei iter arna v'nen hua, hir avv'iv'en ti v'nen hua iak asnr, v'eti ahaviak a v'nen huan a Musis. 15Hir avv'iv'en a ti Atua itulul sarei a v'nen hua arna nlr. V'ahienar iv'iv'en si lera anr, kav'iv'en ti si kinkin iviviln v'aha iaviviln asnr. 16Arna napn lera, Atua ipav'ana hua m'a m'ertu kav'iv'en sei avtutuani, aranan a Iesu Kristu, ipanep'a nut v'nen p'asak ivri inap'ei.
V'nen huan Atua ikalev'la m'ertu a Isrel arna si stuar
17Parn, nakm kv'i m'ertu a Isrel, kap'tir arna v'nen hua, kuklh kavr ti kv'i m'ertuan Atua, 18kavr ti krndu sei Atua irni, karndu mamh sei iviviln v'aha iaviviln sena ti v'nen hua iv'iv'en si lera anh.
19Kav'ah ti nakm krndu ti pav'ev'a m'ertu iv'i m'etaprs kav'i nut ren asnr m'ertu avlak al m'alk. 20Kav'i tisar m'ertu ahavrndu sei, kav'iv'en sei anr mardel, sena ti arna v'nen hua, nakm krndu pla v'ahien p'as m'a v'nen dau. 21?Sena si lera, nakm la kv'iv'en sei a m'ertu uraur ha, inap'i hin kaav'iv'en sei anh? ?Nakm kvrp'ep'a v'nen p'as, kavr ti m'ertu imav'nah sei, v'eti nakm kv'nah sei? 22?Nakm kvr ti m'ertu imav'nah tav'et, v'eti nakm kv'nah m'ertu? ?Nakm klep'la aitul, v'eti nakm kv'nah sei al nmahan aitul? 23?Nakm kuklh sena v'nen hua, kani ti nahan Atua iv'a a nadep' sena ti kluvn a v'nen huan? 24#Aisaia 52:5.Sena ti v'anudl avsip'len Atua sena kam'i, inep'a nut Paivul ivri inap'ei.
M'ertu avan p'au ahavviviln arna nahn Atua sanan
25Sena ti ipavr ti m'ertu iuada v'nen hua kan p'au, si lera ipamhmah ani, v'eti ipavr ti ipaluvn a v'nen hua kan p'au, ima kanep'a ti iahan p'au naran kinkin. 26Sena si lera, ipavr ti m'ertu iahan p'au v'eti iuada p'kl viviln na v'nen hua, nsarei Atua ipav'ahuri inep'a ti itahau sarei. 27Laha, naran m'ertu, la ahatr p'akn a ti ipahau naran kinkin ha, isapa v'nen hua, nsarei hin ipav'ana hua m'ah. Sena ti nakm, v'nen hua iak asnm, kv'i dui ktahau sarei, v'eti kluvn a v'nen hua. 28Sena ti ipavr ti m'ertu kinkin iv'i m'ertu a Isrel arna p'akn uaki, hin iav'i m'ertu a Isrel dau. V'aha ipavr ti m'ertu kinkin ihau arna p'akn uaki, hin iahhudau. 29#TVH 30:6.V'eti m'ertu a Isrel dau, hin iv'i m'ertu a Isrel arna nln. Laha, m'ertu ihudau, hin ihau arna nln, arna M'im'iln P'as, iav'i arna p'akn uaki. Hin, nahan iahv'a eia sena ti m'ertu avani, v'eti sena ti Atua iani ti nahan iv'a eia.
Currently Selected:
Rum 2: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia