Revelesen 17

Tav'et stu na navanel iua klus m'ielm't ilak arna si dm im'ielm't

1 # Seremaia 51:13. Laha, saru na ensel la avua dis isaru hara, ima kav'ana m'a kana, kavr ti a, “Pama atlaha, kana p'ev'iv'en der anh ipaier tav'et stu na navanel, la ilak arna naui inelnal irarev' ha. 2#Aisaia 23:17; Seremaia 51:7.Mlin arna nadep' atvan sera si stu m'ei, m'ertu avlak arna nadep' avm'n naui m'ielan kavm'nm'n kavan si stu inap'ei.”

3 # Rev 13:1. Laha, ensel ilev' kana arna nut hua M'im'iln P'as nrv'a arna nut kaka. Nla tav'et iamk ilak arna si dm iamk, iv'i m'im'iel. Si dm lera naha istudau iter arna p'akn isip'len Atua. Hin ptn isaru, kuman inal. 4#Seremaia 51:7.Tav'et lera iua klusan im'ielm't kam'iel, kukl hin kaua sei iv'i kul, m'a nav'et p'as, ulien nen ilil istudau, m'a neiau tva ier. Al lm'an iua panikin iamk iv'i kul, ilini a si stu m'a si stu hin iani m'a dui. 5Atulul sarei a naha iamk arna tana nahn, ivr ti a,

V'nen Tutuah,

Papilun Lil,

Iv'i A Unia Tav'et Na Navanel Udlani

M'a P'kl Stu Udlani Arna Nadep'.

6Nla ti tav'et lera im'nm'n istudau sena ti im'n di m'ertuan Atua kam'n di m'ertu arpep'nr sena ti avv'i m'ertuan a Iesu. Naran nlei, ntah ani istudau.

Ensel iv'iv'en v'nen tutuah ivrur tav'et lera m'a si dm

7Laha, ensel ivr a kana kavr ti a, “?Ktah ani sena v'ata? Kana p'evr anh v'nen tutuah ivrur tav'et lera, kavrur si dm ilak aranan, ptn isaru, kuman inal. 8#Taniel 7:7; Rev 11:7; Npin 69:28.Si dm klei, ilak tituei v'eti ialak hilaha. Hin ipama aut dan al tah lil la ip'arei dav'a dav'a ha, sarei, kadav'a arna nut ipamln. M'ertu avlak arna nadep', la ahaulul a nahar arna puk na silv'ien ha, naran Atua idaan nadep', hir apavtah ipastudau naran apavla si dm lera, sena ti ilak tituei, v'eti ialak hilaha, v'eti ipama uam.

9M'ertu ptn iak, ipav'ahur si laha. Pt si dm isaru lahara iv'i ptha isaru la tav'et lera ilak aranan ha. 10Mlin isaru iak. Nki ilm' atvrars sarei, nki iamk ilak uam, nki uraur idahma. V'eti naran ipama iklak pr iksusupa. 11V'eti si dm la ilak tituei v'eti ialak hilaha ha, hin iv'i satl na mlin, v'eti ip'lt m'a nki isaru hara, sarei kadav'a arna nut ipamln.

12 # Taniel 7:24. Kuma si dm inal klei hara, avv'i mlin inal la adavlev' v'anuar ha. V'eti hir apavua nut hua mlin kavp'lt m'a si dm, ipav'i m'etaneiel ipamk uaki. 13Hir v'ahienar iamk uaki, avtu nut huar a si dm kavvr ti hin uaki iv'i mlin. 14Hir apavan naur m'a Net Sivsiv, v'eti Net Sivsiv ipasiv'r, sena ti Hin iv'i Dui Lilar dui lilil udlani, kav'i Mlinar mlin udlani. M'ertu avlak m'ei avv'i m'ertu Atua itv'ara sarei anr katv'lair, kavv'i m'ertu avsapa mamahi.”

15Laha, ivr a kana kavr ti a, “Naui inelnal kla ti tav'et na navanel ilak aranan hara, avv'i m'ertu avlak a nut istudau, kavnelnal, kavv'i v'anu inelnal, kavv'i m'ertu avv'ana arna v'nen udlani. 16Si dm la klei hara, kuman inal apavlep'la tav'et na navanel kavutakm ani udlani kavani ipamalmal, kavhan p'akn kavali a nep'v'en. 17Sena ti Atua itaui arna nlr a ti apavan sei Hin irni, kavp'lt kavm'ahu a ti apavtu v'anuar al lm'a si dm, dav'a ipaier naran v'nenan Atua ipama katu hin. 18Tav'et klei hara, iv'i v'anu lil la nut huan iak arna mlin udlani arna nadep' ha.”

Currently Selected:

Revelesen 17: nmb

Highlight

Copy

Compare