Matiu 9
9
A Iesu ien mamh dui iamk pna p'akn im'a
(Mak 2:1-12; Luk 5:17-26)
1Sarei, iv'a al nauak iamk kalu naui lil kadav'a a tv'eliel kadama arna v'anu lilan. 2Laha, pavrni, avuirma dui iamk asnn, pna p'akn im'a, im'atr uaki al pap. Naran a Iesu ila ti avv'ahi ivr a dui pna p'akn im'a, kavr ti a, “Natk, madedrn, Kana ntmhmah sarei anh arna si stuam”.
3Laha, pavrni, dui na v'nen hua kinkin avv'hv'ah si lera a nlr, kavvr ti a, “Aulera itsip'len nahan Atua.”
4V'eti a Iesu irndu v'ahienar kavr ti a, “?Inap'i hin kvv'ahur si stu a nlm'i? 5?V'ata ihua mau? ‘?Ihua a ti p'evr ti a, Atua itmhmah sarei anh arna si stuam,’ v'aha ihua mau a ti p'evr ti a, ‘Pap'tir kav'el?’ 6V'eti nrn ti pavrndu ti Kana, nv'i Net M'ertu, nut huak iak arna nadep' a ti p'elev'la si stu.” Sarei, a Iesu ivr a dui pna p'akn im'a, kavr ti a, “Pap'tir kaua pap nam kadahau.” 7Laha, hin ip'tir kav'el kadahau.
8Naran nelnal avla si lera, avtah ani kavpatei Atua la itu nut hua ilil inap'i lera a m'ertu ha.
A Matiu, dui na takis
(Mak 2:13-17; Luk 5:27-32)
9Laha, a Iesu iv'el kala dui iamk, nahan iv'i a Matiu. Hin ilak arna nut alev' takis. Laha, ivr ani, kavr ti a, “Pasapa Kana.” Sarei, hin ip'tir kasapei.
10 #
Luk 15:1,2. Naran a Iesu ilak kahatat al nmahan a Matiu, pavrni, ardu na takis avstudau m'er m'ertu stu uraur avrama kavlak kavhatat m'ei a Iesu m'er m'ertuan. 11Naran arvarisi avla si lera avvr anr m'ertuan a Iesu kavvr ti a, “?Inap'i hin tisam'i ihatat m'er dui na takis m'er m'ertu stu?”
12V'eti a Iesu irn v'nen lera, kavr anr kavr ti a, “M'ertu avhua ahavrn tukta, v'eti m'ertu si ianr uaki. 13#Mat 12:7; Usia 6:6.V'eti kam'i pavrav'a kavrndu sei Paivul ivri, ivr ti a, ‘Kana nrn ti m'ertu apavrn istu a tv'alr. Narn ti apavan sakrivais uaki.’ Sena ti Kana nahma a ti p'ev'ara a m'ertu p'as, v'eti nma a ti p'ev'ara a m'ertu stu uaki, a ti apavrn istu sena si stuar.”
Amiman a Iesu kavrur naran apuln tim'ah
(Mak 2:18-22; Luk 5:33-39)
14Laha, m'ertuan a Sun Paptais avrama asnn, kavvr ti a, “?Inap'i hin kam'em' m'er arvarisi nvln tim'ah nakl, v'eti m'ertuam ahavln tim'ah?”
15V'eti a Iesu ivr anr kavr ti a, “?Naran dui ien lheien, kv'ah ti ip'as a ti tv'aln ipatakal naran idlak uam asnr? V'eti naran nen ipama a ti apalev'la dui nen asnr. Arna naran lera tv'aln apavln tim'ah. 16M'ertu kinkin ikalev' niv'es kalik m'dah kalilai arna mnu klus, sena ti niv'es kalik m'dah ipaiapr mnu klus kani ipamaur ipalil mau. 17V'aha m'ertu kinkin ikatv'en naui m'iel m'dah al putel, iv'i nila p'ak nani, itater dav'a, sena ti ipavr ti ipanap'i lera, putel nen ipamaur, naui m'iel ipararev', laha putel nen ipastu. V'eti apatv'en naui m'iel m'dah al putel m'dah. Laha, putel, iv'i nila p'ak nani, m'a naui m'iel, ipater ipap'as.”
A Iesu iani ti tav'et pa isilv' ml, kan mamh tav'et ier klusan
(Mak 5:21-43; Luk 8:40-56)
18Naran a Iesu idvr si lera anr uam, pavrni, elta iamk ima kasisihpu kaiaul asnn, kavr ti a, “A natk tav'et ip'hm'a, v'eti nakm pama katu lm'am aranan a ti ipasilv' ml.” 19Sarei, a Iesu ip'tir kasapei, Hin m'er m'ertuan.
20Laha, pavrni, tav'et iamk m'etiena tav'et iani din irarev' iel dav'a pai inal lman iru, v'eti iahiris. Hin ima katauatah an a Iesu kaier kaka klusan. 21Sena ti iv'hv'ah a nln, kavr ti a, “Imvr ti m'ier klusan uaki, m'ama kap'as ml.” 22V'eti a Iesu ivav hin kalei, kavr ti a, “Vnpak, parn ipap'as, v'ahien p'asam iani kp'as ml.” Iv'amk m'a ti tav'et lera ima kap'as ml.
23Naran a Iesu ima al nmahan elta lahara, kala m'ertu aviv ner m'er m'ertu la avtakal ha, ivr anr kavr ti a, 24“Kam'i pavruh, sena ti tav'et pa lera iahm'a, v'eti im'etrdul uaki.” Laha, avvtma kavsip'lani. 25V'eti naran atap'er avrav'a av'aran, a Iesu iv'a eim kauada lm'an, laha tav'et pa ithal. 26Laha, v'nen ivrur si lera iunanut kaier nut udlani arna v'anu lera.
A Iesu ien mamh m'etapis iru
27A Iesu iln nut lera, laha dui arru arv'i m'etapis arsapei karv'ara eia, karvr ti a, “Nakm kv'i a Natn a Divt, parn istu a kam'em'.”
28Naran ima al nmah, m'etapis lahara arma asnn. Laha, a Iesu ivr anr kavr ti a, “?Krv'ah ti Kana nrndu ti p'en si lera?” Arvrprani karvr ti a, “Aau Mlin.”
29Sarei, a Iesu ier m'atar, kavr ti a, “Nrn ti ipanep'a nut krv'ahi inap'ei.” 30Laha, arledu sei ml. V'eti a Iesu ivr anr ihua kavr ti a, “Marm'ahu a ti m'ertu kinkin iparndu si lera.” 31V'eti hir arln nut lera karvrp'ep'a v'nen ivrur a Iesu arna v'anu udlani lera.
Napt iv'ana ml
32Laha, naran ap'hrln nut lera uaki, pavrni, auirma dui iamk asnn, iv'i napt, m'im'iln stu iuei. 33Naran a Iesu isran m'im'iln stu, napt lera iv'ana ml. Laha, nelnal avtah ani istudau, kavvr ti a, “Adamulela si kinkin inap'i lera arna nut a Isrel naran kinkin.”
34 #
Mat 10:25; 12:24; Mak 3:22; Luk 11:15. V'eti arvarisi avvr ti a, “Aulera isran m'im'iln stu arna nut hua mlinar m'im'iln stu.”
A Iesu irn istu anr m'ertu
35 #
Mat 4:23; Mak 1:39; Luk 4:44. Laha, a Iesu iv'el kunanut arna v'anu lilil ma v'anu papa udlani, kav'iv'en v'nen pas anr m'ertu al nmah tamatar, kavrp'ep'a v'nen p'as na v'anuan Atua, kamhmah anr arna m'etienar m'a si udlani ianr. 36#Nut Kaka 27:17; 1 Armlin 22:17; 2 Krun 18:16; Esikiel 34:5; Mak 6:34.V'eti naran ila nelnal avstudau avp'lt, irn istu anr, sena ti np'r istu, avamkma kavnep'a sera sivsiv dui ip'aurr ihei. 37#Luk 10:2.Laha, ivr anr arm'ertuan kavr ti a, “Tim'ah istudau iter al pitvet. Itier sera naran apalav'i, v'eti dui na parei avdakrdau. 38Sena si lera, pavtu tamat asn Mlin na pitvet a ti ipatep'a m'ertu na parei apavlev' si udlani iter al pitvet.”
Currently Selected:
Matiu 9: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia