Matiu 6
6
Pari p'as
1 #
Mat 23:5. Pavv'ahur kam'i a ti mavtuvn a sei anr m'ertu siar ihei arna nah nelnal kavrn ti apavp'a kam'i, imahei ti a Tetiam'i ilak eia ikaul kam'i sanan. 2Sena si lera, naran patuvn a sei anr m'ertu siar ihei, maiv natav sanan kanep'a m'ertu avp'ip'en lamuru al nmah tamat, v'aha arna navanel, kavrn ti m'ertu apavani nahar ipav'a eia. Nvrdaui, nvr a kam'i, hir atvlev' sera ulienar. 3V'eti naran nakm patuvn a sei anr m'ertu siar ihei, m'ir na lm'am imarndu sei m'ldu lm'am iani, 4Arna ti patutuan pari p'asam. Laha, a Tetiam la ila si udlani itutuah ha, hin ipulh sanan arna nah nelnal.
Tamatan a Iesu
(Luk 11:2-4)
5 #
Luk 18:10-14. Naran nakm patu tamat, manep'a m'ertu avp'ip'en lamuru, sena ti hir avrn ip'as naran avp'tir kavtu tamat al nmah tamat v'aha arna nut navanel iru ip'lt, a ti m'ertu apavp'ar. Nvrdaui, nvr a kam'i, hir atvlev' sera ulienar ra. 6V'eti nakm, naran patu tamat, pav'a a m'lnam kap'leskar liu, katu tamat asn a Tetiam, la ilak a nut tutuah ha, laha, a Tetiam la ila si udlani itutuah ha, ipulh sanan arna nah nelnal. 7V'eti kam'i, naran pavtu tamat, mavspsapa m'lv'i v'nenam'i ipanep'a nut v'anudl avani inap'ei, sena ti hir avv'ah ti atuar iparn v'nenar sena ti avv'ana istudau.
8Kam'i mavnap'ar, sena ti a Tetiam'i itrndu sera si udlani ihei asnm'i, naran kdavmiman ani. 9Sena si lera, kam'i pavtu tamat ipanap'i laha, kavvr ti a, Tetiam'em' klak eia, nvrn ti naham ipav'a eia. 10Nvrn ti v'anuam ipama. Nvrn ti sei krni ipaiak arna nadep' kanap'ei eia. 11Patu kam'em' dika tim'ah ipaviviln a kam'em'. 12Kamhmah a kam'em' arna si stuam'em' inep'a ti nvmhmah a m'ertu uraur arna si stu avan a kam'em'. 13Mam'ahu a ti si kinkin ipandina kam'em', v'eti palev'la kam'em' arna nut huan a Sitan. Sena ti v'anu p'as iv'i nkam, nut hua iv'i nkam, si p'sp'as iv'i nkam, ikahiris naran.
14 #
Mak 11:25,26. Sena ti ipavr ti kvmhmah a m'ertu arna si stu avan a kam'i, a Tetiam'i ilak eia ipamhmah a kam'i arna si stuam'i. 15V'eti ipavr ti kaavmhmah a m'ertu arna si stu avan a kam'i, a Tetiam'i ikamhmah a kam'i arna si stuam'i.
Naran pavln tim'ah
16Naran kam'i pavln tim'ah a ti pavtu tamat, mavnep'a m'ertu avp'ip'en lamuru kavm'er nahr sena ti m'ertu apavla ti avln tim'ah. Nvrdaui, nvr a kam'i, hir atvlev' sera ulienar ra. 17V'eti nakm, naran paln tim'ah a ti patu tamat, patu pumat arna nilm, kasila nahm. 18A ti m'ertu akavrndu ti kln tim'ah a ti patu tamat, v'eti a Tetiam la ilak arna nut tutuah ha, hin uaki iparndaui. Laha, a Tetiam la ila si udlani itutuah ha, ipulh sanan.
Pavtupien si p'sp'asam'i arna nut eia
(Luk 12:33,34)
19 #
Sim'is 5:2,3. Mavtupien si p'sp'asam'i arna nadep' ka, sena ti arna nut laha kakrus ihapapr sei nakl, v'aha nadei iua aian, v'aha m'ertu na v'nv'nahien avkapr nmah kavv'nah sei. 20V'eti kam'i pavtup'lten si p'sp'asam'i arna nut eia. Arna nut lera kakrus ikahapapr sei nakl, v'aha nadei ikaua aian, v'aha m'ertu na v'nv'nahien akavkapr nmah kavv'nah sei. 21Sena ti nut si p'sp'asam'i iter, iv'i nut v'ahienam'i ipater nakl.
22M'eta natei iv'i lait na p'ak natei. Sena si lera, ipavr ti m'atam ilvlvar, p'akm ipalini a nut ren. 23V'eti ipavr ti m'atam ipastu, p'akm udlani ipalini a m'alk. Ipavr ti pla nut ren iter a nlm iv'i m'alk uaki, m'alk lera im't ihuadau.
24M'ertu kinkin ikav'i m'ertu na m'akarienar mlin iru, sena ti ipalep'la tv'aln, kalap'as a tv'aln, v'aha ipasapa tv'aln, v'eti ikav'ah tv'aln. Mkav'i m'ertu na m'akarienan Atua kav'i m'ertu na m'akariena nav'et.
Mavv'ahur parndau a sei
(Luk 12:22-31)
25Sena si lera, nvr a kam'i, mavv'ahur par a silv'ienam'i kavvr ti a, ‘?P'vhan v'ata?’ v'aha ‘?P'vm'n v'ata?’ Mavv'ahur par a p'akm'i ml kavvr ti a, ‘?P'vua v'ata ipav'i klusad?’ Sena ti silv'iena natei ilil mau kasiv' tim'ah, p'ak natei ilil mau kasiv' heia natei. 26Pavp'a m'anh avtetv eia arna p'knaran. Hir ahavlu sei, ahavlev' sei al pitvet, ahavtupiani al nmah nen, v'eti a Tetiam'i ilak eia imsnanr nakl, v'eti kam'i kvlil mau istudau kavsiv'r. 27?Hin ak asnm'i irndu ti ipav'ahuri kani ti silv'ienan ipap'arei mau napn ipamk?
28?Kam'i kvv'ahur klusam'i sena v'ata? Pavv'ahur plaua iter al lili. ?Isi inap'i? Hir ahavm'akar ki, ahavlili klusar. 29#1 Armlin 10:4-7; 2 Krun 9:3-6.V'eti Kana nvr a kam'i, hin a Sulumun arna si p'sp'asan udlani, iaua klus kinkin ip'as inep'a plaua lera. 30Sena si lera, ?Ipavr ti Atua itu heia nina iter al lili ip'as inap'i lera, la iter dika v'eti apasrani al nep'v'en m'ih ha, kvv'ah ti ikatu klus a kam'i? U, kam'i v'ahienam'i isusupadau.
31Sena si lera, mavv'ahur par ani, kavvr ti a, ‘?P'vhan v'ata, v'aha p'vm'n v'ata, v'aha p'vua klus v'ata?’ 32Sena ti v'anudl avtala a si udlani lera nakl, v'eti a Tetiam'i ilak eia irndu ti kvrn si udlani lera. 33V'eti kam'i pavtala a v'anuan Atua m'a p'kl p'asan ipatauamu, laha, Atua ipatu si udlani lera a kam'i ml. 34Sena si lera, mavv'ahur par a m'ih, sena ti m'ih iv'i naran na ti pavv'ahur sei ipatu hin aranan. Der ier kam'i arna napn iamk iviviln a napn lera uaki.
Currently Selected:
Matiu 6: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia