Matiu 12
12
A Iesu iv'i Mlin na Sapat
(Mak 2:23-28; Luk 6:1-5)
1 #
TVH 23:25. Arna naran lera, iv'i Sapat iamk, A Iesu iv'el al pitvet na uit. V'eti arm'ertuan avrn nam'er kavnardina navan kavhani. 2V'eti naran arvarisi avla si lera avvr ani kavvr ti a, “Palei, m'ertuam avan sei v'nen hua ivrkari ti m'ertu apavani arna Sapat.”
3 #
1 Sam 21:1-6. V'eti ivr anr kavr ti a, “?Kam'i kaavv'ana arna Paivul sei a Divt iani tituei naran irn nam'er m'er m'ertuan avlak m'ei? 4#Livai 24:9.Hin iv'a al nmahan Atua kahan p'ret ataui nakl arna nahn Atua, la iaviviln a ti hin m'er m'ertuan apavhani ha, v'eti arpris uaki. 5#Nut Kaka 28:9,10.?V'aha kaavv'ana arna v'nen hua a ti arpris al nmah tamat avkapr Sapat nakl, v'eti ahavan si stu? 6V'eti Kana nvr a kam'i, arna nut laha M'ertu iamk ilak, ilil kasiv' nmah tamat. 7#Mat 9:13; Usia 6:6.V'eti amvr ti mvrndu v'nen laha, ivr ti a, ‘Nrn ti m'ertu apavrn istu a tv'alr, narn ti apavtrp'n si slm katu Kana,’ imahei mdavv'ana hua m'er m'ertu ahavan si stu. 8Sena ti Kana nv'i Net M'ertu, kav'i Mlin na Sapat.”
A Iesu ien mamh m'ertu arna Sapat
(Mak 3:1-6; Luk 6:6-11)
9Sarei, iln nut lera kadav'a al nmah tamatar. 10Laha, pavrni, dui iamk ilak atlera, lm'an im'a. Avmiman an a Iesu kavvr ti a, “?Iviviln a ti apamhmah a p'ak m'ertu arna Sapat?” Avmimani sena ti apavv'ana hua m'ei.
11 #
Luk 14:5. V'eti ivr anr kavr ti a, “?Hin ak asnm'i iua sivsivan iamk, naran ipars al tah p'arei arna Sapat, v'eti ikauadei karv'lei aut? 12V'eti m'ertu ilil mau kasiv' sivsiv istudau. Sena si lera, iviviln a ti p'van si p'as arna Sapat.” 13Sarei, ivr a dui lahara kavr ti a, “Palmlm lm'am.” Laha, ilmlm lm'an, laha ima kap'as ml kanep'a tv'aln. 14V'eti Varisi udlani avrav'a av'aran kavp'lt kavmlani kavvrur navanel na ti apavrpi.
!Pavlei, Dui na m'akarienak!
15V'eti a Iesu irndu si lera karuh atlera, laha nelnal avstudau avsapei. Sarei, imhmah anr udlani arna sei ianr. 16Kavrkarr a ti amavvruri a m'ertu kinkin. 17A ti sei Aisaia, iv'i pruvet, ivri ipatu hin, ivr ti a, 18#Aisaia 42:1-4.“Pavlei, Dui na M'akarienak, la ntv'li sarei ha. Hin iv'i dui nlap'as ani, nlk irn ip'as ani istudau. Kana p'etu M'im'ilk aranan, laha Hin ipavrp'ep'a navanel viviln anr v'anudl. 19Ikav'lv'al, ikav'ara eia, akarn drln arna navanel. 20Ikaprus viep' iter kinkini. Ikakam't lait ien ilthpat, ipaier naran p'kl viviln ipasiv' si udlani itukari. 21Laha, v'anudl apavv'ah nahan.”
Nl nam'el itupr hin ikap'tir
(Mak 3:20-30; Luk 11:14-23; 12:10)
22Dav'a, auirv'a dui iamk asnn, m'im'iln stu iuei kani ti iv'i m'etapis kav'i napt. Laha, imhmah a dui lahara iv'i m'etapis kav'i napt kani ti iv'ana kala sei ml. 23Laha, nelnal udlani avtah ani kavvr ti a, “?Inap'i? Nsarei dui lera iv'i a Natn a Divt.”
24 #
Mat 9:34; 10:25. V'eti naran arvarisi avrn si lera, avvr ti a, “Aulera ikasran m'im'iln stu, v'eti arna nut huan a Pielsipup uaki, iv'i mlinar m'im'iln stu.”
25A Iesu irndu v'ahienar kavr anr, kavr ti a, “Ipavr ti m'ertu arna v'anu iamk apavtupr hir, v'anu lera ipars, v'aha ipavr ti m'ertu arna v'anu lil iamk v'aha nmah iamk apavtupr hir, akavp'tir. 26Laha, ipavr ti a Sitan ipasran a Sitan, hin ipatupr hin. ?V'anuan ipap'tir ipanap'i? 27?Ipavr ti Kana nsran m'im'iln stu arna nut huan a Pielsipup, a netm'i avsran m'im'iln stu arna nut huan ak? Inap'i lera, hir apavv'ana hua m'a kam'i sanan. 28V'eti ipavr ti kana nsran m'im'iln stu arna nut huan a M'im'iln Atua, v'anuan Atua itama sarei asnm'i. 29?V'aha, m'ertu kinkin irndu ti ipav'a al nmaha dui hua kav'nah sian ipanap'i? Irn ti ipahuda sera dui hua nen ipatauamu, sarei, kav'nah sian udlani iter al nmahan. 30#Mak 9:40.M'ertu iasapa Kana, imlen Kana. M'ertu iap'lt ma Kana katupien m'ertuak, iani ti avamkma.
Si stu la a Mlin Eia ikamhmah ani ha
31Sena si lera, nvr a kam'i, Atua ipamhmah a m'ertu arna si stu udlani m'a v'nen stu ururaur udlani avri kavmlen m'ertu aranan, v'eti ikamhmah a m'ertu avv'ana stu kavmlen M'im'iln P'as. 32#Luk 12:10.Ipavr ti m'ertu kinkin ivr v'nen stu kinkin iamk imlen Kana, nv'i Net M'ertu, Atua ipamhmah ani, v'eti m'ertu kinkin iv'ana stu kamlen M'im'iln P'as, Atua ikamhmah ani, arna naran laha, v'aha arna naran ipama uam.
Avrndu nai arna navan
(Luk 6:43-45)
33 #
Mat 7:20; Luk 6:44. Pavvr ti nai ip'as naran navan ip'as, v'aha pavvr ti nai istu naran navan istu, sena ti avrndu nai arna navan. 34#Mat 3:7; 23:33; Luk 3:7; Mat 15:18; Luk 6:45.!Net nmat! ?Inap'i hin kam'i, kvv'i m'ertu stu, kvrndu ti pavvr si p'as? Sena ti m'ertu avvr si udlani v'ahienar ilini ani. 35M'ertu p'as, nln ilini a si p'as, hin ipan si p'as, v'eti m'ertu stu, nln ilini a si stu, hin ipan si stu. 36V'eti Kana nvr a kam'i, a ti v'nen kaka udlani m'ertu avvri apavrp'ep'ei pr arna napn Atua ipav'ana hua m'a m'ertu udlani. 37Sena ti arna v'nenam'i, pavviviln, v'aha arna v'nenam'i, pavmln.”
Artisa na v'nen hua avmiman pari lil kinkin
(Mak 8:11,12; Luk 11:29-32)
38 #
Mat 16:1; Mak 8:11; Luk 11:16. Sarei, tisa na v'nen hua kinkin m'er arvarisi kinkin avvr ani kavvr ti a, “Tisa, nvrn ti p'vla pari lil ki ipamk Nakm pani ipav'iv'en nut huam.” 39#Mat 16:4; Mak 8:12.V'eti ivrpranr kavr ti a, “Kam'i kvlak hilaha kvstu kavv'nah tav'et kavrn ti pavla pari lil, v'eti nkav'iv'en pari lil kinkin a kam'i. P'ev'iv'en pari lilak ipanap'ei a Suna uaki. 40#Suna 1:17.Sena ti ipanep'a nut a Suna ilak nut ren itl m'a nut lihat itl al nap'el inap'ei, ipanap'i lera ml kana nv'i Net M'ertu p'elak nut ren ipatl m'a nut lihat ipatl a nv' nadep'. 41#Suna 3:5.M'ertu a Nineva apavp'tir kavv'ana hua m'a kam'i kvlak hilaha kavvr ti kvan si stu, sena ti hir avvav v'ahienar naran a Suna ivrp'ep'a v'nenan a Mlin Eia, v'eti pavlei, Kana nlil mau kasiv' a Suna. 42#1 Armlin 10:1-10; 2 Krun 9:1-12.Tav'et iv'i mlin arna Saut ipap'tir kav'ana hua m'a kam'i kvlak hilaha, kavr ti kvan si stu, sena ti hin ima dan arna pna nadep' a ti iparn v'nen p'asan a Sulumun, v'eti pavlei, Kana nlil mau kasiv' a Sulumun.
M'im'iln stu im'alet ml
(Luk 11:24-26)
43Naran m'im'iln stu iruh a nl m'ertu, iunanut arna nut kaka katala nut iparnrn hin, v'eti iapaslei. 44Sarei, ivr ti a, ‘Kana p'em'alet ml al nmahak ntruh sarei a nln.’ Naran im'alet ml, ila ti m'ertu ialak, athsrasr sarei katmhmah ani ip'as. 45Sarei, iv'a kalev' m'im'iln stu avsaru ml, la avstu kavsiv'i ha. Laha, avrav'a eim kavlak atlera. Laha, itauatah, silv'iena m'ertu lera istu isiv' itauamu. M'ertu avlak hilaha apavnap'i lera.”
A unian a Iesu m'er tv'aln avv'ara ani
(Mak 3:31-35; Luk 8:19-21)
46Naran Hin idv'ana uam m'er nelnal, pavrni, a unian m'er tv'aln avp'tir av'aran, kavrn ti apavv'ana m'ei. 47Laha, m'ertu iamk ivr ani, kavr ti a, “Palei, a uniam m'er tv'alm avp'tir av'aran kavrn ti apavv'ana m'ah.”
48V'eti ivrprani kavr a m'ertu iv'ana m'ei, kavr ti a, “Hin ak iv'i a uniak, hir ak avv'i tv'alk?” 49Laha, ilmlm lm'an katpilpalr arm'ertuan, kavr ti a, “Pavlei, a uniak m'er tv'alk hilaha. 50Sena ti m'ertu ien sei a Tetiak ilak eia irni, hin iv'i tv'alk kav'i a v'nk kav'i a uniak.”
Currently Selected:
Matiu 12: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia