Livai 12
12
Sei tav'et ipani naran ilev' sei
(Luk 2:22-24)
1Laha, a Mlin Eia iv'ana m'ei a Musis, kavr ti a, 2“Pav'ana m'er arm'ertu a Isrel, kavr anr, kavr ti a, ‘Ipavr ti tav'et itkar, sarei, kalev' a natn dui iamk, tav'et lera ipastu arna nahn a Mlin Eia napn ipasaru. Ipasapa napn la ilak uaki sena ti p'akn irer ha, ipanap'i lera, ipastu arna nahn a Mlin Eia. 3#Ap'u 17:12; Luk 2:21.Sarei, naran dui pa lera itsilv' sarei napn isatl, apan p'au ani. 4Sarei, tav'et ipalak uaki, dav'a ti din ipahiris, sarei, p'akn ipama kap'as ml. Ipalak napn ipaneltl pln itl (33). Ikaier si kinkin iv'i si p'sp'as na nmah tamat, ikahv'a eim al nmah kanuis na tamatan Atua, dav'a ti napn a ti p'akn ipama kap'as ml ipahiris. 5V'eti, ipavr ti ipalev' a natn tav'et ipamk, sarei, tav'et lera ipastu arna nahn a Mlin Eia napn ipanal lman iv'a (14). Ipasapa napn la ilak uaki sena ti p'akn irer ha. Ipalak uaki, dav'a ti din ipahiris, sarei, p'akn ipama kap'as ml. Ipalak napn ipanellm'sei pln ilm'sei (66).
6Sarei, naran napn a ti p'akn ipama kap'as ml ipahiris, ipavr ti a natn iv'i dui v'aha tav'et, ipauirv'a net sivsiv ipamk, la paian idahmk ha, asn pris, ipav'i uvrin aali. Sarei, ipauirv'a vntau pa ipamk, v'aha navimar ipamk, ipav'i uvrin sena si stu. Ipataui a karliu na nmah kanuis na tamatan Atua. 7Sarei, pris ipataui ipav'i uvrin arna nahn a Mlin Eia, a ti tav'et ipalak arna tamat m'ei Atua. Ipanap'i lera, sena ti din ithiris, ipaviviln uaki. V'nen laha iv'i v'nen hua ier tav'et ilev' a natn dui v'aha a natn tav'et. 8#Luk 2:24.V'eti, ipavr ti iarndu ti ipauirv'a net sivsiv ipamk, ipauirv'a navimar iparu, v'aha vntau iparu. Nki iamk ipav'i uvrin aali, tv'aln ipav'i uvrin sena si stu. Ipanap'i lera, pris ipani ti ipalak arna tamat m'ei Atua, kaviviln.’ ”
Currently Selected:
Livai 12: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
