Livai 10
10
A Mlin Eia iv'iv'en ti apani ipanep'a nut Hin uaki ivri inap'ei
1Laha, a Netap m'ei Apihu, arv'i a natn a Erun, arlev' sei la aal sida p'as a nln ha, karlev' nkar p'sev', sarei, kartu sida p'as a nlr, kartu nap' anr arna nahn a Mlin Eia, v'eti arani iuraur, iav'i sei a Mlin Eia itvr sarei anr a ti aparani ipanap'ei. 2Sarei, nap' idan asn a Mlin Eia, kani ti avhapu, kavram'a atlera arna nahn a Mlin Eia. 3Laha, a Musis ivr an a Erun, kavr ti a, “Si laha iv'i sei a Mlin Eia itvr sarei, kavr ti a, ‘M'ertu ipamima asnk ipav'ahur Kana, a ti np'eset udlani. Naran np'tir arna nahr arm'ertu udlani, apavani ti nahak ipav'a eia pr.’ ” Laha, a Erun iavr si kinkin.
4Sarei, a Musis iv'ara anr a Misael, m'ei a Elsapan, arv'i a natn a Usiel, iv'i a p'nien a Erun, kavr anr, kavr ti a, “Parmima, sarei, parrmanr tv'elm'i arna nah nutet, kavtaur av'aran na nut nvhl nmah kanuis.” 5Sarei, armima, karuada satar ardu lera, kartaur av'aran na nut avhl nmah kanuis, inep'a nut a Musis ivri inap'ei. 6Sarei, a Musis ivr anr a Erun, m'er a Eliesa m'ei a Iv'amar, la arv'i a natn ha, kavr ti a, “Mavlev'la kalik arna ptm'i, maviapr klusam'i, imahei ti pavram'a, sarei, nl reran a Mlin Eia ipama aranar arm'ertu udlani. V'eti pavm'ahu a ti tv'elm'i, la avv'i nl nam'el udlani a Isrel ha, apavtakal sena ti a Mlin Eia ittep'a sera nap', kattu nap' sarei a sei. 7Mkavrav'a av'aran na nmah kanuis na tamatan Atua, imahei ti pavram'a, sena ti ueil, la avisani arna m'ertu a ti apavan parian Atua ha, iter arna p'akm'i.” Sarei, avani inep'a nut a Musis ivr anr ti apavani ipanap'ei.
8Sarei, a Mlin Eia iv'ana m'ei a Erun, kavr ti a, 9“Mam'n naui m'iel v'aha naui hua uraur, nakm, m'er a natm, naran kvrav'a eim al nmah kanuis na tamatan Atua, imahei ti pavram'a. Ipav'i v'nen hua ipamk asnm'i, dav'a ikahiris naran, 10a ti pavrndu ti v'ata iv'i si p'sp'as, m'a v'ata iav'i si p'sp'as, a ti pavrndu ti v'ata iviviln arna nahk, m'a v'ata istu arna nahk, 11a ti pavv'iv'en v'nen hua udlani anr arm'ertu a Isrel, la a Mlin Eia itvr sarei, kattu sarei al lm'an a Musis a ti pavani ha.”
12 #
Livai 6:14-18. Laha, a Musis iv'ana m'ei a Erun, m'er a Eliesa m'ei a Iv'amar, arv'i a natn arsilv' uam. Laha, ivr anr, kavr ti a, “Pavlev' uvrin iv'i uit, la iv'i duanar uvrin attu sera nap' anr kavtau an a Mlin Eia ha. Sarei, pavhani, v'eti mavtu iis a nln. Pavhani asn tiv' na sakrivais, sena ti iv'i si p'as iamk arna nahk. 13Pavhani arna nut p'as ipamk, sena ti iv'i pna sakrivais aali asn a Mlin Eia, kav'i nkam, kav'i nkar a natm. Sena ti a Mlin Eia itv'ana hua sarei m'a kana, katvr sera ti ipanap'i lera. 14#Livai 7:30-34.Laha, pavhan mrna uvrin la asran lm'a natei eia m'ei ha, m'a liha uvrin armani eia, arna nut p'as, nakm, m'er a natm dui, m'er a natm tav'et, sena ti avv'i nkam, kavv'i nkar a natm dui, avv'i sei arm'ertu a Isrel avtau a kam'i, naran avtu sakrivais, iv'i uvrin sena tamat. 15Apavuirv'a liha uvrin armani eia, m'a mrna uvrin la asran lm'a natei eia m'ei ha, naran avuirv'a kris na uvrin aali, apavtaui ipav'i uvrin la asran lm'a natei eia m'ei ha, arna nahn a Mlin Eia. Laha, ipav'i nkam, kav'i nkar a natm dui, la avlak m'ah ha. Ipav'i v'nen hua ipamk, ipater ikahiris naran, inep'a nut a Mlin Eia itvr sarei inap'ei.”
16Laha, a Musis iklau a nani, la iv'i uvrin sena si stu ha, sarei, kala ti atvtu nap' sarei ani. Sarei, nln irer anr a Eliesa m'ei a Iv'amar, a natn a Erun, la arsilv' uam ha. Sarei, ivr anr, kavr ti a, 17#Livai 6:24-26.“?Kam'i kdarhan sera uvrin sena si stu arna nut p'as sena v'ata? Sena ti iv'i si p'as iamk, kav'i sei Atua ittu sarei a kam'i a ti si stuar arm'ertu ipater aranan, a ti apavp'tir arna nahn a Mlin Eia, kavlak arna tamat m'ei. 18!Palei! Adauirv'a din eim na nutet. Sena ti imp'as imvr ti kvhani al nut p'as, inep'a nut ntvr sarei a kam'i inap'ei.” 19Sarei, a Erun ivr an a Musis, kavr ti a, “!Palei, dika atrtu sera uvrin sena si stuar, m'a uvrin aali arna nahn a Mlin Eia, v'eti si udlani laha ier kana! ?Imvr ti kana nmhan uvrin sena si stu dika, ipaviviln arna nahn a Mlin Eia, v'aha ipanap'i?” 20Sarei, naran a Musis irn si lera, irn ip'as uaki.
Currently Selected:
Livai 10: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
