Avruh 27
27
Tiv' na si slm aali
(Avruh 38:1-7)
1Sarei, pan tiv' ipamk ipav'i tiv' na si slm aali katau an Atua. Pani m'a nai iv'i akeisa. Tv'eliel ipaier tv'eliel ipav'i mita iru m'a pnen. Tv'eliel uraur ipaier tv'eliel uraur ipav'i mita iru m'a pnen. Ipanap'i lera, tv'eliel ier tv'eliel iru aparnap'amk. Sarei, eia ipaier a nadep' ipap'arei kav'i mita iamk m'a pnen. 2Arna kkan arv'a, patu kuman, v'eti ipav'i nai ipamk uaki. Sarei, patau aian v'il aranan, kahiris ani m'ei. 3Patu nut ipamk a nv'n, a ti tih nap' nen ipars aranan. Sarei, pan savel nen, kan dis nen, kan nai la uk nen iak ha, m'a dis apatu ienap' a nln. Si udlani lera pani m'a aian v'il. 4Sarei, pan si ipamk apatu nap' a sei aranan, ipav'i aian v'il, kanep'a sera nit na tilau. Patu rin aani a aian v'il arna kkan. 5Sarei, pataui a nv' nut eia na tiv' na si slm aali katau an Atua, a ti ipater a p't nut nen. 6Sarei, palev' nai iv'i akeisa, katr nai sena tiv' na si slm aali katau an Atua, katau aian v'il aranar. 7Patu nai lera al rin lahara. Patu nai lera arna tv'eliel arru na tiv' na si slm aali katau an Atua, a ti aparmani. 8Pan tiv' na si slm aali katau an Atua lera m'a nai, v'eti si kinkin ikahter a nln. Inep'a nut ntv'iv'en sarei anh arna ptha lil, pani ipanap'i lera.
Nut av'aran na Nmah Kanuis na Tamatan Atua
(Avruh 38:9-20)
9Sarei, pan nut av'aran na nmah kanuis na tamatan Atua. Pav'et kalik la ip'eset ha kani ipalal arna tv'eliel iv'a arna Saut. Ipap'arei kaier mita ipanellm' (50). 10Pan nakal p'arei nen m'a nut apatu nai a nln nakl m'a aian v'il aparnelru (20). Patu uk arna nakal p'arei lera m'a sei iuadar uk lera arna nakal, v'eti pani m'a silva. 11Sarei ml, arna tv'eliel iv'a arna Nut, patu kalik p'arei ml ipap'arei kaier mita inellm', m'a nakal p'arei nen aparnelru (20), m'a nut atu nai a nl nakl p'arei m'a aian v'il aparnelru (20). Sarei, patu uk arna nakal lera m'a sei iuadar uk lera arna nakal p'arei, pani ml m'a silva.
12Sarei, tv'eliel ier tv'eliel na nut av'aran na nmah kanuis na tamatan Atua iv'a arna Ues ipanap'i laha: patu kalik p'arei ipap'arei kav'i mita ipanelru pln ilm' (25). Nakal p'arei nen aparnal, m'a nut atu nai a nl nakal aparnal. 13Tv'eliel ier tv'eliel na nut av'aran na nmah kanuis na tamatan Atua iv'a arna Is ipap'arei mita ipanelru pln ilm' (25). 14Arna tv'eliel ipamk na karliu, patu kalik p'arei ml. Tv'eliel ipaier tv'eliel ipav'i mita ipasaru m'a pnen. Nakal nen apartl, m'a nut atu nai a nlr nakl apartl. 15Arna tv'eliel uraur, patu kalik p'arei ml. Tv'eliel ipaier tv'eliel ipav'i mita ipasaru m'a pnen. Nakal p'arei nen apartl, m'a nut atu nai a nlr nakl apartl.
16Pan liu sena nut av'aran na nmah kanuis na tamatan Atua. Ipap'arei kaier mita ipanal. Pani m'a kalik p'arei p'as av'ati. Pav'ati m'a tret iplu, kam'ielm't, kam'iel. M'ertu irndu mamh navanel a ti apav'et sei ipani. Nakal p'arei nen aparv'a, m'a nut atu nai a nlr nakl aparv'a. 17Naran kan nakal p'arei na nut av'aran na nmah kanuis na tamatan Atua, patu sei ipamlden nakal kauada uk nakl apavv'i silva, m'a uk arna nakal apavv'i silva. Sarei, nut atu nai a nlr nakl apani m'a aian v'il. 18Nut av'aran na nmah kanuis na tamatan Atua ipap'arei kaier mita ipanellm' (50). Tv'eliel ipaier tv'eliel ipav'i mita ipanelru pln ilm' (25). Sarei, eia ier a nadep' ipav'i mita iparu m'a pnen. Pani m'a kalik p'as av'ati, m'a nut atu nai a nlr apani m'a aian v'il. 19Si udlani auadei a ti apam'akar al nmah kanuis na tamatan Atua, m'er nil la avuada mamh nahau na nmah kanuis ha, pani m'a aian v'il.
Nut apap'aur mamh nap'
(Livai 24:1-4)
20Laha, pav'ana hua m'er arm'ertu a Isrel, a ti apavuirma ueil p'as avlav'i naran avth nava nai iv'i uliv, a ti apavali, kani ti nap' ipav'en nakl. Nap' lera apali, ipav'en ikahiris naran. 21Patu nap' lera al nmah kanuis na tamatan Atua. V'eti ipater av'aran na kalik p'as la itukar pukiset na turanienan a Mlin Eia. Hin a Erun m'er a natn apavp'auri lihat ipaier m'etav'aran arna nahn a Mlin Eia. Ipav'i v'nen hua ipamk asnr arm'ertu a Isrel m'er a natr la apavtauatah anr ha, ikahiris naran.
Currently Selected:
Avruh 27: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
