Parei 26
26
A Pul ivrp'ep'a silv'ienan arna nahn a Mlin Akripa
1Sarei, Akripa ivr an a Pul kavr ti a, “Hilaha, nakm pavr sei krn ti pavri.”
Laha, a Pul iah lm'an kav'ana, kavr ti a, 2“Mlin Akripa, kana nrn ip'as ilil a ti p'evrpren si udlani ardu a Isrel avmlen kana sanan arna nahm dika. 3Nrn ip'as mau sena ti nakm krndu mamh p'klr ardu a Isrel m'a v'nen hapr avvruri nakl. Sena si lera, nmiman anh a ti nlm ipap'arei, pav'rn a kana.
4Ardu a Isrel udlani avrndu p'klk, naran nsusupa dav'a ier hilaha. Avrndu ti itauamu nlak asnr tv'alk arna nut a Serusalem. 5#Parei 23:6; Vilipai 3:5.Hir udlani atvrndu sera ti itauamu nv'i Varisi, la avv'i m'ertu ihua ihuadau arna sas ha. Hir udlani, ipavr ti apavrni, avrndu ti apavvrp'ep'a si lera. 6Hilaha np'tir atlaha a ti pandina kana, sena ti nv'ah turanien la Atua ittu sarei anr a tetiad tituei ha. 7Turanien lera, nl nam'elad inal lman iru (12) avpatei Atua ihua sanan ren m'a lihat, kavtrah ti ipama katu hin. Mlin Akripa, sena ti ntrah turanien lera, ardu a Isrel avmlen kana. 8?Inap'i hin kam'i kaavv'ah ti Atua ipani ti m'ertu ipathal ml arna m'ien?
9 #
Parei 8:3; 22:4,5. Tituei, kana nv'ah ti ip'as a ti p'en sei ipanelnal iputakm a nahan a Iesu a Nasaret. 10Nen si lera arna nut a Serusalem. Arpris lil avtu nut hua nen a kana, laha nsranr m'ertuan a Iesu inelnal al p'resin. Naran avrpep'nr, kana np'lt m'er kamlanr. 11Nutakm anr istudau iel al nmah tamat udlani, katp'r a ti apavsip'len a Iesu. Nlk irer anr istudau dav'a ti nv'a ml katp'av'r arna v'anu lilil uraur.
A Pul ivrur naran ima kav'ah a Iesu
(Parei 9:1-19; 22:6-16)
12Laha, arpris lil avtu kana nut hua m'a v'nen nen, sarei nv'a a Tamaskas a ti p'ani ml. 13Mlin Akripa, naran nsapa navanel lihalm'au, nut ren lil iamk ier isiv' neiel iaan eia kertalu a kana m'er nelnal avsapa kana. 14Kam'em' udlani nvrars a nadep'. Laha, nrn nadl iamk iv'ana m'a kana, kavri arna v'nen a Isrel, kavr ti a, ‘?Sul, Sul, ktp'ev' Kana sena v'ata? Ihua a ti panep'a pluk ispa nai ihnhan ashs ani.’ 15Laha, nvr ani, kavr ti a, ‘?Mlin, Nakm kv'i a hin ak?’ Ivr a kana kavr ti a, ‘Kana nv'i a Iesu, la nakm ktp'ev' Kana ha. 16V'eti nakm pathal kap'tir, sena ti Kana nv'iv'en Kana anh a ti p'etauh pav'i m'ertu na m'akarienak, a ti pavrp'ep'a sei ktla sarei m'a sei p'ev'iv'en Kana anh aranan uam. 17Kana p'elev'lah al lm'ar ardu a Isrel m'er v'anudl. Hilaha p'etap'ah pav'a asnr, 18a ti paiela m'atar, a ti apavvav nlr kavln m'alk kavrama arna nut ren, kavruh arna nut huan a Sitan, kavrama asn Atua, a ti ipalev'lar arna si stuar, sena ti apavlev' si udlani m'ertu p'as avv'ah Kana apavlav'i.’
A Pul ivrur silv'ienan naran itv'ah sarei a Iesu
19Sena si lera, Mlin Akripa, kana naan ptk arna sei nlei idan eia. 20#Parei 9:20,28,29.V'eti nvrp'ep'ei anr itauamu arna nut a Tamaskas, a Serusalem, m'a nut udlani a Sutia. Sarei, nv'a asnr v'anudl kavr ti apavvav nlr kavrama asn Atua, kavan sei iv'iv'en ti atvvav sera nlr. 21Sena si lera ardu a Isrel avuada kana al nmah tamat, kavrn ti apavrpep'n kana. 22V'eti Atua isr lm'ak iel. Sena si lera, nvrp'ep'a v'nenan asnr nelnal, m'ertu lil m'er m'ertu unanut, dav'a ier dika, kavr sei uaki pruvet m'ei a Musis atvvrp'ep'a sarei tituei, kavvr ti ipama katu hin. 23#1 Kurin 15:20; Aisaia 42:6; 49:6.Avvr ti a Kristu ikrn istu pr arna p'akn kadam'a, katauamu pr a ti ipathal ml arna m'ienen, kav'iv'en nut ren anr arm'ertu a Isrel m'er v'anudl.”
A Pul irn ti iparv' Akripa ti ipav'ah a Iesu
24Naran ivrur parian inap'i lera, hin a Vestas iv'ara eia kavr ti a, “Pul, nakm kdilin. Kp'a parndau a puk, iani ti kdilin.”
25V'eti a Pul ivr ti a, “Mlin lil a Vestas, kana nadilin, v'eti sei nvrp'ep'ei iviviln kav'i v'nen dau. 26A Mlin Akripa irndu si udlani lera. Namamih a ti p'evrp'ep'a si lera arna nahm, sena ti nrndu mamh ti hin itrndu sera si udlani lera, sena ti avan si lera, ahavtutuani. 27?Mlin Akripa, nakm kv'ah v'nenar arpruvet? Nrndu mamh ti kv'ahi.”
28Laha, hin Akripa ivr an a Pul kavr ti a, “Nsarei kv'ah ti pani ti p'ev'i Kristin ipalahml sarei.”
29Laha, a Pul ivr ti a, “Ntu tamat asn Atua sena ti imav'i nakm uaki, v'eti nelnal avv'rn a kana dika, apavnep'a kana ipalahml v'aha ikalahml. V'eti sen laha uaki, narn ti ipahu kam'i.”
30Naran itv'ana sarei inap'i lera, mlin lil, kavman, a P'ernis m'er nelnal avlak asnr, avp'tir. 31Kavruh kavvrvr a hir kavvr ti a, “Aulera iaan si stu kinkin iviviln a ti ipam'a v'aha ipap'resin sanan.”
32Laha, Akripa ivr an a Vestas kavr ti a, “Ipavr ti aulera imav'ara an a mlin lil a Rum, imahei m'truln sarei.”
Currently Selected:
Parei 26: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia