Roma 4
4
Kaparasaeano Abraham mbali kasandaha
4:1-12
1Kaowu ane dasumambili Abraham awuantoomu, damugauꞌao ae? 2Ane ibahano katitahimaꞌano Abraham ne Lahataꞌala nengkoha ne habuno, tantumo bhe tingkuno so nasumangke-sangkeꞌao wutono. Gahaꞌaitu miina bhe tingkuno nosangke-sangke wutono ne wiseno Lahataꞌala. 3Kapaꞌamo notibuhi weo Kitabi, “Abraham noparasaea ne Lahataꞌala, maka hampano kaparasaeano naꞌa Lahataꞌala notahimae peda mie banara.” #Kej 15:6 4Mie kumahadhaano neꞌawa ponambo, tamaka ponambono maitu miina dakumonae o kawaꞌao, hampano ingka o hakunomo. 5Tamaka ane bhe mie tapa kumahadhaano, ampamo kaowu noparasaea ne Lahataꞌala tumahimano mie modai peda mie banara, maka mie anaꞌa notahimae Lahataꞌala peda mie banara hampano kaparasaeano. 6Pedamo dua Daud, nokonada dokodawua mie netahimano Lahataꞌala peda mie banara, miina nalumentu habundoa. 7Ambano Daud,
“Nokodawua mie tiꞌamponino sabhaha habu modaino,
tifosalino sabhaha dhosano.
8Nokodawua mie ane dhosano miina nalumentue Lahataꞌala.” #Mzm 32:1-2
9Bhahaa wambano dawua ini mbali kaowu mie nesuna, tawa mbali dua ne mie tapa nesuna? Ingka padamo tapugauane saꞌituini, Abraham notahimae Lahataꞌala peda mie banara hampano kaparasaeano. 10Saneafa bhahaa, Lahataꞌala notahimae peda mie banara? Padamo nesuna bhahaa miinaꞌo? Ingka miinaꞌo naesuna. 11Kasuna maitu notahimae peda sehonda tanda, o bukutii motangka putae Lahataꞌala notahimae peda seemie banara hampano kaparasaeano. #Kej 17 Gahaꞌaitumo ingka miinaꞌo naesunaa, noparasaeamo. Pedamo anaꞌa Abraham nembalimo amando kosasawindo mie tapa nesuna marasaeano, neanomo Lahataꞌala natumahimada peda mie banara. 12Abraham nembali dua amando mie marasaeano toka nesuna, sumanomo miina kaowu daesuna tamaka dotapi koinaꞌano kaparasaeano Abraham awuantoomu, tiwohano wakutuuno miinaꞌo naesuna.
Dhandino Lahataꞌala dotahimae mbaꞌinomo doparasaea ne Lahataꞌala
4:13-25
13Lahataꞌala nopodhandi ne Abraham bhe sampuꞌano namaꞌanda dhunia ini somo fehebuaꞌando. Dhandi aini nobhoasaane Lahataꞌala suano mbaꞌinomo Abraham noangkafi tubhono agama Yahudi, tamaka hampano kaparasaeano, sampe Lahataꞌala notahimae peda seemie banara. #Kej 17:4-6, 22:17-18 14Ane so tumahimano dhandino Lahataꞌala ampamo kaowu mie dhumalangino tubhono agama Yahudi, ingka nosia-siamo kaparasaea ne Lahataꞌala, pakade dhandino Lahataꞌala maitu miinamo nakofahalaaꞌa. 15Tubhono agama Yahudi neowa amahano Lahataꞌala, tamaka ane pae bhe tubhono agama, pae dua bhe nekangkalaꞌia.
16Kanandooꞌanomo dhandino Lahataꞌala nengkoha ne kaparasaea, neanomo naentalea putae dhandi maitu o kawaꞌaono Lahataꞌala bhe tetewei nokantaa-ntaa so kosasawindo sampuꞌano Abraham, suano kaowu so mie dumadino weo tubhono agama Yahudi, tamaka so kosasawindo mie dumadino weo kaparasaea, peda kaparasaeano wutono Abraham. Ingka anoamo awuanto kosasawintoomu ini. 17Weo Kitabi notibuhi, “Hintu asangkeko so amando bansano liwu bhahi.” #Kej 17:5 ⸤ Pedamo naꞌa Abraham nembalimo amantoomu⸥ ne wiseno Lahataꞌala neparasaeano. Anoamo Lahataꞌala mefodadino mie mate, Anoamo dua tanokobhoasaomo maka tapa ndumandooꞌano tanosinandooꞌamo. 18Abraham noparasaea bhe noposahunaꞌao kansuhu mahinggamo kao-kaomo kaposahunaꞌaono paemo nakoꞌula. Panda-pandano nembali amando bansano liwu bhahi peda tibuhino weo Kitabi, “Sampuꞌamu daembali bansano liwu bhahi.” #Kej 15:5 19Ne naꞌa Abraham nopandeꞌaanemo paemo nakosampuꞌaa, kapaꞌamo mbadhano nonalemo, maꞌomo moꞌono taꞌu. Pedamo dua Sara, mieno lambuno maitu, ingka nokekelemo tieno. Tamaka kaparasaeano Abraham miina naokongkoa. 20Anoa miina napoibhahaa ne dhandino Lahataꞌala, sadaa-daaꞌe kaparasaeano. Bhahamoa tanodhulu kamatangkano kaparasaeano bhe nofekakalabhia Lahataꞌala. 21Anoa noparasaea mpuu putae Lahataꞌala nokokuasa namekakoꞌula nedhandiꞌaono. 22Kanandooꞌanomo Abraham notahimae Lahataꞌala peda seemie banara. #Kej 15:6 23Wamba “Notahimae Lahataꞌala peda seemie banara” notibuhi suano kaowu so wutono Abraham, 24tamaka notibuhi so intaodiomu dua. Ingka intaodiomu nafotahima dua Lahataꞌala peda mie banara, hampano doparasaeaꞌomu ne Anoa mowanuno Yesus Ompuntoomu maiꞌao ne mate. 25Anoamo mada neowa ne limando fopongkono dhohono dhosantoomu, tamaka padamo dua nofowanue Lahataꞌala maiꞌao ne mate so naembaliꞌao dasumuli dapometaa bhe Lahataꞌala.
Currently Selected:
Roma 4: mnbSD
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.