Roma 3
3
Kakalabhiando miendo Yahudi bhe kataino lalono Lahataꞌala
3:1-8
1Ane peda naꞌa ⸤ bheanea bhe so meenano⸥ , o ae bhahaa kakalabhiando miendo Yahudi? O ae bhahaa fahalaano kasuna? 2Ingka nobhahi sepaliꞌa, tanofegiu. Katandaꞌano ne miendomo Yahudi katiposahunaꞌaoꞌano bhoasaono Lahataꞌala. 3Tamaka peda aꞌe bhahaa? Ingka nandoo miendo Yahudi tapa marasaeano bhe tapa tumaino lalo ne Lahataꞌala. Bhahaa pata kaparasaeando bhe kataino lalondo naꞌa namosali dua kataino lalono Lahataꞌala? 4Ingka teteweimo paise, kapaꞌamo tabeano damandeꞌaane Lahataꞌala sadhia nobanara, tamaka kotika manusia liwuno paha. Anaꞌa noposahataa bhe tibuhino weo Kitabi ⸤ nopulaoꞌao Lahataꞌala⸥ peda ini,
“Naetaa sabhaha nekobhoasaꞌaomu nakobukutiimo kakotuꞌuno,
ane dasumangkatiko tetewei fotalo.” #Mzm 51:4
5Tamaka ane kaꞌadhilino Lahataꞌala sedhuluꞌa kantaleano hampano habu modaintoomu, kaowu damugauꞌomu nada amai bhahaa? (Pugauku ini aangkafi kaowu fekihindo manusia.) Bhahaa damugau putae Lahataꞌala miina naꞌumadhilia ane namondawu kaita kahukumuno? 6Ingka teteweimo paise. Kapaꞌamo ane Lahataꞌala pae naꞌumadhilia, nada amai nabhotusi dhunia ini? 7⸤ Bheanea nandoo dua so meenano⸥ . Ampamo kaowu ane hampano pahaku kabanarano Lahataꞌala dhulu kantalea sampe kakalabhiano dhulu katifosibhala, noafaꞌao dua Lahataꞌala nabhotusi kanau peda mie kodhosa? 8Noafa dua pae naembaliꞌao damugauꞌomu, “Mehabu kaitaomu modaiꞌano so notiwohaꞌao kataa.” Daanumo nandoo umumbu kanau apugau peda anaꞌa, tamaka mie mugauno medando naꞌa nopantasimo nahumukumuda Lahataꞌala.
Kosasawindo manusia sanea kodhosano
3:9-20
9Kaowu pedamo ae bhahaa intaodiomu miendo Yahudi? Dofoliuda intaodi ini bhahaa bhe bansano liwu sigaoꞌano? Ingka miina! Saꞌituini pada afetanaanda, naetaa miendo Yahudi naetaa bansano liwu sigaoꞌano saneamo deate weo kuhumano dhosa. 10Kapaꞌamo weo Kitabi notibuhi peda ini,
“Miina bhe mie banara, maumo naseemie.
11Miina bhe kofekihino,
miina bhe umondofino Lahataꞌala.
12Kosasawindo manusia dekapingkamo kaangkaꞌando,
miinamo dakofahalaaꞌa,
miina bhe humabu metaano, maumo naseemie. #Mzm 14:1-3, 53:1-3
13Kagodu-godundo ⸤ nefolimba wamba mobuhu bhe timohakuno⸥
pedamo kobuhu ngkamanga-manga,
lelando sakabhohe-bhoheꞌi,
wiwindo tapedamo ule kobisa. #Mzm 5:9, 140:3
14Wobhando sabhata-bhatata fodai-daino. #Mzm 10:7
15Aꞌendo nehimba nobhingkala so damotuhuꞌao heando bhaindo.
16Ne amai kaangkaꞌando deowa kahansuru bhe kakadee-dee.
17Kaangkaꞌano pometaa miina damandeꞌaanea. #Yes 59:7-8
18Mie pedando maitu miina bhe kateꞌia ne Lahataꞌala.” #Mzm 36:1
19Tamaka dopandeꞌaaneomu bhahi-bhahiꞌae tibuhino weo Kitabino tubhono agama Yahudi mbali mie dumadino weo tubhono agama naꞌa. Pedamo anaꞌa kosasawindo manusia paemo dakowobhaa ⸤ dapotunduꞌao wutondo ne wiseno Lahataꞌala⸥ , kapaꞌamo kosedhuniaꞌae ini nabhotusie Lahataꞌala. 20Hampano bhe naseemie miina bhe netahimano Lahataꞌala peda mie banara mbaꞌinomo nodhalangi tubhono agama Yahudi; tamaka hampano nandoo tubhono agama maitu manusia dopandeꞌao wutondo dokodhosa.
Manusia notahimada Lahataꞌala peda mie banara hampano kaparasaeando
3:21-31
21Tamaka ampa aitu Lahataꞌala padamo nofosusuꞌao kaangkaꞌa so datitahimaꞌao peda mie banara, o kaangkaꞌa tapa pokaiꞌano bhe tubhono agama Yahudi. Gahaꞌaitu kaangkaꞌa anaꞌa daanumo dosambilie dua weo Kitabino anabii Musa bhe Kitabindo anabii sigaoꞌano. 22Kafotahimaꞌano Lahataꞌala peda mie banara naꞌa noangka weo kaparasaea ne Yesus Kristus. Kaangkaꞌa aini notilengka so kosasawindo manusia, hampano manusia miina dapoꞌala-alaa. 23Kapaꞌamo kosasawindo manusia sanea dokodhosa, miina dahumato ne kakalabhiano Lahataꞌala. 24Hampanomo kaowu rahamatino Lahataꞌala, manusia notahimada Lahataꞌala peda mie banara noangka ne Kristus Yesus fobebasino. Rahamati aini o kawaꞌao pata koꞌoli. 25Lahataꞌala padamo nofotantue putae Yesus nembali kapopanga mosalino amahano Lahataꞌala, noangka ne tuhuno heano. Kapometaa naꞌa datumahimae ane damarasaea ne Yesus. Aini nohabue Lahataꞌala so notiwohaꞌao kaꞌadhilino, kapaꞌamo padamo nosabahakie sabhaha dhosando manusia endefiꞌini, patamo katihukumuꞌando. 26Tamaka ampa aitu Lahataꞌala nobhotusiemo dhosando manusia so notiwohaꞌao kaꞌadhilino, neanomo nentaleaꞌao putae Wutono nobanara bhe nofobanara manusia marasaeano ne Yesus Kristus.
27Ane peda anaꞌa naembali bhahaa o manusia dasumangke-sangke wutondo ⸤ hampano dosalamati⸥ ? Ingka pae naembalia. Tamaka noafa pata kaembaliꞌano? Mbaꞌinomo habunto bhahaa? Ingka miina. Bhahi-bhahiꞌae nengkoha kaowu ne kaparasaea ⸤ ne Yesus Kristus⸥ . 28Kaopuliꞌano manusia dotahimada Lahataꞌala peda mie banara hampano kaparasaeando, suano mbaꞌinomo dodhalangi tubhono agama. 29Bhahaa Lahataꞌala maitu o Lahataꞌalando kaowu miendo Yahudi? Suano dua Lahataꞌalando bansano liwu sigaoꞌano? Ingka anoamo, Lahataꞌalando dua bansano liwu sigaoꞌano. 30Lahataꞌala ingka Kaseemie-mieꞌano, dadiꞌanomo Anoamo tumahimano miendo Yahudi peda mie banara hampano kaparasaeando, Anoamo dua tumahimano bansano liwu sigaoꞌano peda mie banara hampano dua kaparasaeando.
31Ane peda naꞌa bhahaa nokomaꞌana hampano doparasaea kaowu ne Yesus Kristus, doꞌohoemoomu tubhono agama Yahudi? Ingka miina! Bhahamoa tanodhulu dofosibhalae.
Currently Selected:
Roma 3: mnbSD
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.