Yohanes 20

Kawanuꞌano Yesus

20:1-10

Mat 28:1-10; Mrk 16:1-8; Luk 24:1-12

1Same-samentaeno ne oleono Ahadhi, nandoo nohohondo, Maria Magdalena nokalamo we kobuhu. Gahaꞌa nowohamo kontu kaꞌontono wobhano lia kafokobuhuꞌa naꞌa padamo dodolee. 2Lasao notende nopoꞌawaꞌao Simon Petrus bhe anaguhu sigaoꞌano, kamoasiꞌaono Yesus. Nofohatoda ambano, “Ompu padamo doalae mie maiꞌao weo kobuhu, maka miina tamandeꞌaanea bhahaꞌi doowae ne amai.” 3Petrus bhe anaguhu sigaoꞌano naꞌa lasao dokala we kobuhu. 4Kohoduando dotende, tamaka nehimba anaguhu sigaoꞌano naꞌa bhe Petrus, sampe paꞌindulu nohato se kobuhu. 5Anoa nofeonga we lalono kobuhu, tanowoha kawalu, tamaka miina namesua. 6Nohato dua Simon Petrus, lasao nopesua weo kobuhu. Anoa nowoha dua kawalu. 7Gahaꞌa kabhia-bhia kakompono fotuno Yesus miina napohompu bhe kawalu naꞌa, tamaka nogaati nomoisa, padamo dolupie. 8Anaguhu maꞌindulu humatono saꞌituini nopesuamo dua weo kobuhu. Anoa nowohae bhe noparasaeamo dua, 9kapaꞌamo kaomponano ini miinaꞌo dalumosangiea wambano Kitabi putae Yesus tetewei namanu namaiꞌao ne mate. 10Pada aitu kohoduando dosulimo se lambu.

Yesus nofotiwoha Wutono ne Maria Magdalena

20:11-18

11Tamaka Maria neehe-ehe ne owano kobuhu bhe noꞌae. Poowa noꞌae nofeonga weo kobuhu. 12Gahaꞌa tanowohamo dua malaꞌekati dohodua, pakeando sakapu-kapute. Dengkoha ne katifondoleꞌano maeatino Yesus, seemie te fotu, seemie we aꞌe. 13Dofeenaemo malaꞌekati naꞌa ambado, “Waꞌina noafa gahaꞌa moꞌaeꞌao?” Notobhoosimo Maria ambano, “Ompuku doalae mie, miina amandeꞌaanea bhahaꞌi doowae ne amai.” 14Pada nopugau peda naꞌa nodolimo we kundo, gahaꞌa tanowohamo dua Yesus neehe-ehe ne itu, tamaka miina namandeꞌaanea Anoamo itu Yesus. 15Ambano Yesus, “Waꞌina, noafa gahaꞌa moꞌaeꞌao? Ondofi laꞌae bhahaa?” Weo fekihino Maria mie amaitu dhagano kaendea, sampe nopugau ambano, “Waompu, ane alae hintu, fohato kanau owae ne amai, amalaeꞌao.” 16Ambano Yesus ne anoa, “Maria!” Maria nodoli bhe nopugau weo wamba Ibrani, “Rabuni!” (Rabuni maꞌanano Guru). 17Ambano dua Yesus, “Koise dampasi kanaua, kapaꞌamo miinaꞌo akumala te Amaku. Aitu sulimo se bhahitieꞌiku, fohatoda Idi akumalamo te Amaku bhe Amamiu dua, Lahataꞌalaku bhe Lahataꞌalamiu dua.” 18Dadiꞌanomo Maria Magdalena nokalamo nofohato anaguhuꞌi ambano, “Idi padamo awoha Ompu!” Anoa nekapunaanda dua putae Yesus mohatoane kosasawiꞌae maitu.

Yesus nofotiwoha Wutono ne anaguhuꞌino

20:19-23

Luk 24:36-39, 47-49

19Nohondo kaowu oleo ne oleono Ahadhi naꞌa, anaguhuꞌino dopohompu-hompumo ne seꞌonu lambu. Fointono padae dokunsie hampano doteꞌi miendo Yahudi. Gahaꞌa tanosihatoꞌamo Yesus neehe-ehe ne wunta-wuntando bhe nopugau ambano, “Katohopono dadi so hintimiu!” 20Pada nopugau peda naꞌa nofotiwohaandamo limano bhe tompano kaha-kahano. Anaguhuꞌino nowula sepaliꞌa lalondo dowoha Ompu. 21Nopugaumo toha Yesus ambano, “Katohopono dadi so hintimiu! Pedamo Amaku notudu kanau, atudukoomu dua kumalaomu.” 22Pada nopugau peda naꞌa nobusodamo, ambano “Tahimamo Rohino Lahataꞌala. 23Ane dhosando mie umamponidaomu, Lahataꞌala naꞌumamponida dua. Tamaka ane pugauꞌomu dhosando sadaa-daa, dhosando sadaa-daaꞌe.”

Yesus nofotiwoha Wutono ne Tomas

20:24-29

24Tomas nekonando dua Didimus (maꞌanano Kalopo) seemie dua ne olotando anaguhuꞌino ompulu hoduano maitu, tamaka miina bhe anoa wakutuuno Yesus nomai. 25Ambado sabhangkaꞌino, “Insaodi padamo tawoha Ompu.” Tamaka Tomas tanopugau ambano, “Ane paeꞌo amoha angkaꞌano paso ne limano, maka amotumpuane wunano limaku, pakade amedampa tompano kaha-kahano, pae sepaliꞌa amarasaea.”

26Nopalusi alu oleo anaguhuꞌino Yesus dopohompu-hompumo toha ne lambu anaꞌa, wakutuu anaꞌa bhe Tomas dua. Fointo dopadae dokunsie. Gahaꞌa tanosihatoꞌamo Yesus neehe-ehe ne wunta-wuntando bhe nopugau ambano, “Katohopono dadi so hintimiu!” 27Pada anaꞌa nopugaumo ne Tomas ambano, “Ondo limaku ini, fotumpu wunano limamu ne ini. Fonsoho limamu, fedampa tompano kaha-kahaku ini. Koemo nopoibhahaa lalomu, parasaeaꞌo toha!” 28Ambano Tomas ne Yesus, “Ompuku bhe Lahataꞌalaku.” 29Ambano Yesus, “Hampano padamo woha kanau hintu parasaea. Dokodawua mpuu mie tapa moha kanau tamaka doparasaea.”

Patudhuno Kitabi aini

20:30-31

30Daanumo nandoo nobhahi tanda-tanda sigaoꞌano nehabuno Yesus ne wisendo anaguhuꞌino, tamaka miina natibuhi weo Kitabi aini. 31Ampamo kaowu kosasawiꞌae ini padamo dobuhie neanomo hintimiu ⸤ mebasano bhe metingkeno⸥ marasaeaꞌomu putae Yesus maitu Omputo Fosalamatino, Anano Lahataꞌala; neanomo dua hampano kaparasaeamiu ne Anoa meꞌawaomu dadi.

Currently Selected:

Yohanes 20: mnbSD

Highlight

Copy

Compare