Mataayo 1
1
Oruganda rwa Yeesu Kiriisitu
(Ruuka 3:23-38)
1Gunu nigwo omuroobhekano gwa amasiina ga oruganda rwa Yeesu Kiriisitu. Yeesu Kiriisitu ꞉aasookereeye mu-ruganda rwa omukama Dawudi na Bhurayimu.
2Bhurayimu ꞉eebhuuye Isaaka,
Isaaka ˆneebhura Yakobho,
Yakobho ˆneebhura Yuuda na abhamura bhaabho.
3Yuuda ˆneebhura Peereesi na Jeera ku-Tamaari,
Peereesi ˆneebhura Yejirooni,
Yejirooni ˆneebhura Raamu,
4Raamu ˆneebhura Aminadaabhu,
Aminadaabhu ˆneebhura Naashoni,
Naashoni ˆneebhura Sarumooni,
5Sarumooni ˆneebhura Bhowaaji ku-Rayabhu,
Bhowaaji ˆneebhura Obheedi ku-Ruutu,
Obheedi ˆneebhura Yese,
6Yese ˆneebhura omukama Dawudi.
Dawudi ˆneebhura Seremaani ku-mugasi unu ꞉aariga ari muka Uriya,#1:6 Muka Uriya. ꞉Aariga ˆnaatogwa Bheetisheebha. Dawudi ꞉eetire Uriya ˆnaagega muka Uriya ˆnaamugabhura. Ringira 2 Samweri 12:24-25.
7Seremaani ˆneebhura Rewobhowaamu,
Rewobhowaamu ˆneebhura Abhiya,
Abhiya ˆneebhura Asa,
8Asa ˆneebhura Yewoshafwati,
Yewoshafwati ˆneebhura Yooramu,
Yooramu ˆneebhura Ujia,
9Ujia ˆneebhura Yootamu,
Yootamu ˆneebhura Aaji,
Aaji ˆneebhura Ejekiya,
10Ejekiya ˆneebhura Manaase,
Manaase ˆneebhura Amooni,
Amooni ˆneebhura Yoosia,
11Yoosia ˆneebhura Yekoniya na abhamura bhaabho,
mu-kabhaga kanu Abhaijirayeeri ꞉bhaagegerwe mbabha bhagaya mu-kyaro kya Bhabheri.
12Bhunu Abhaijirayeeri ꞉bhaariga bhasirirwe eyo,
Yekoniya ˆneebhura Sherateeri,
Sherateeri ˆneebhura Jerubhabheri,
13Jerubhabheri ˆneebhura Abhiwudi,
Abhiwudi ˆneebhura Eriyakimu,
Eriyakimu ˆneebhura Ajoori,
14Ajoori ˆneebhura Saadooki,
Saadooki ˆneebhura Akimu,
Akimu ˆneebhura Eriwuudi,
15Eriwuudi ˆneebhura Eriyajari,
Eriyajari ˆneebhura Matani,
Matani ˆneebhura Yakobho,
16Yakobho ˆneebhura Yuusufu, omurume wa Maryamu,
na Maryamu ˆneebhura Yeesu unu ꞉aariga ari Kiriisitu.#1:16 Kiriisitu. Ringira riingʼana rinu mu-Mangʼana Amakomeeye.
17Mmbe, okusooka ku-Bhurayimu okuyikira okwibhurwa kwa omukama Dawudi ꞉bhaariga bhaaturire-wo bhaajaaji ekumi na bhana. Okusooka ku-Dawudi okuyikira ku-kabhaga kanu Abhaijirayeeri ꞉bhaagegerwe mbabha bhagaya mu-kyaro kya Bhabheri, ꞉bhaariga bhaaturire-wo bhaajaaji abhandi ekumi na bhana. Na, okusooka mu-kabhaga kanu ꞉bhaagegerwe eyo okuyika okwibhurwa kwa Kiriisitu, ꞉bhaariga bhaaturire-wo bhaajaaji abhandi ekumi na bhana.
Okwibhurwa kwa Yeesu Kiriisitu
(Ruuka 2:1-7)
18Okwibhurwa kwa Yeesu Kiriisitu ꞉kwariga kuri kutya. Maryamu nyira Yeesu, ꞉aariga asandirwe obhuko na Yuusufu. Nawe bhunu Yuusufu ꞉aariga akyari kumaama nawe, Maryamu ˆnaagega inda ku-bhuturo bhwa Mwoyo Omutaakatiifu.#1:18 Mwoyo Omutaakatiifu. Ringira riingʼana rinu mu-Mangʼana Amakomeeye. 19Yuusufu ꞉aariga ari murengeresi mu-meeso ga Nyamuwanga, ꞉ateendere okuswasha Maryamu, ˆnaaramura ati amusige bhujibhiiye.#1:19 ˆNaaramura ati amusige bhujibhiiye. Okuriingʼaana na gintungwa gya Bhayawudi, raabhe omumura na omuyara bhanu bhari na obhuko, ꞉bhaariga mbabharwa ati bhabheeye muunu na mukaaye. Nawe obhuko ꞉bhwariga mbubha-wo mwaka gumwi niwe mbagabhurana. Mu-kabhaga kayo koone kutyo ꞉bhateekirisibhwaga okwikara amwi okuyikira anu bharigabhurana. Okumusiga unu usandire obhuko ꞉kwasusanaga na okutaana na omugasi.
20Bhunu Yuusufu ꞉aariga akyeeganiirisha kutyo araakore, maraayika#1:20a Maraayika. Ringira riingʼana rinu mu-Mangʼana Amakomeeye. wa Raatabhugenyi Nyamuwanga ˆnaamwijira mu-kirooto, ˆnaamubhwira ati, “Yuusufu, omuyiiri Dawudi,#1:20b Omuyiiri Dawudi. Ringira riingʼana rinu mu-Mangʼana Amakomeeye. siga okuubhaya okugabhura Maryamu, kwa okubha inda iyo ayinyoorere ku-bhuturo bhwa Mwoyo Omutaakatiifu. 21Kaaja okwibhura omwana mumura, riisiina ryaye urimutoga Yeesu,#1:21 Yeesu. Insonga ya riisiina rya Yeesu ni ati, Yewobha (Raatabhugenyi Nyamuwanga) keerusha. kwa okubha uyo niwe aryerusha abhaanu bhaaye okusooka mu-bhikayo bhyebhwe.”
22Gayo ꞉gaabheeye kutyo, insonga riingʼana rinu Raatabhugenyi Nyamuwanga ꞉aaikire okuturira ku-muragi Isaaya rikuumire ati,
23“Ringira, omuyarajuma arigega inda,
ariibhura omwana mumura.
Riisiina ryaye bharimutoga Manweri.”#1:23 Ringira Isaaya 7:14.
Insonga ya riisiina riyo ni inu ati, “Nyamuwanga ari amwi na eswe.”
24Bhunu Yuusufu ꞉aaramukire, ˆnaakora kutyo maraayika wa Raatabhugenyi Nyamuwanga ꞉aamubhwiriiye. ˆNaagega Maryamu, 25nawe ꞉ataamaamire nawe okuyikira anu Maryamu ꞉eebhuriiye. Yuusufu ˆnaatoga omwana unu ꞉eebhuuywe, riisiina ati, Yeesu.
Currently Selected:
Mataayo 1: kya
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved