ISAIAH 1
1
A Khial Minam
1Judah gam kumpi ahi Uzziah, Jotham, Ahaz, le Hezekiah-te’ hun lai-in Amoz’ tapa Isaiah in Judah gam le Jerusalem khua tawh kisai a maangmuhnate:#2Kum 15:1-7; 15:32-16:20; 18:1-20:21; 2Khang 26:1-32:33.
2Vantungte aw, na za un;
leitung aw, na ngai in;
bang hang hiam cih leh
Topa in thu hong gen khinzo a,
“Ka pattahsa ka tate in
kei hong lehdo uh hi.
3Bawng in amah a nei pa thei a,
la in zong a topa’ an piakna mun
thei buang hi.
Ahih hangin Israel in bangmah thei lo a,
keima mite in thei thei lo uh hi,” a ci hi.
4Ah, a khial minam,
mawhna in a nencip mite,
siatna a bawlte’ suanlekhakte,
a gamtatsia tapate!
Amaute in Topa nusia khin uh a,
amaute in Israel-te’ Siangtho Pasian
simmawh khin uh hi.
Amaute in
lam khial khin taktak uh hi.
5Bang hangin note
hong kisat theih nadingin
lehdo teitei na hi uh hiam?
Israel aw, na lutang khempeuh
liamma dim a,
na lungsim le na ngaihsutna
gim mahmah hi.
6Khenuai a kipan luzang dong nangawnin
a cidamna mun om lo a,
sanim gawpnate, meimapite,
le siluang liammate a om hi.
Tuate pen a nai kisal lo,
kitun lo, sathau tawh zong kinomsak lo hi.
7Na gam uh khing a,
na khuapite uh mei tawh kihal hi.
Na muh tangpi mahun gamdang mite in
na gam uh hong laksakin
na khempeuh susia gawp hi.
8Jerusalem khuapi bek omlai a,
leenggui lo-a buk,
tangmai lo sunga om hampheng bangin
kuama don lohin kinusia a,
a ki-umcip khuapi bangin kinusia hi.
9Vanglian Topa in eite tawmno khat
a nungta-in hong siit hikeileh,
eite pen Sodom khua bang khinin
Gomorrah khua i bang khinta ding hi. #Pian 19:24; Rom 9:29.
Kisik Takpi Ding Kutna
10Sodom a uk mangte aw,
Topa’ thu na za un!
No Gomorrah mite aw,
i Pasian’ hihna na ngai un!
11 Topa in hih bangin ci hi:
“Note’ biakpiakna a tampite pen
kei’ tungah bang hi leltak ahi hiam?
Tuutalte le ganhing thaute’ sathau tawh
meihal biaknate ka kham ta hi.
Bawngtalte, tuunote, le
keelte’ si tawh kei ka lungkim kei hi.
12Kei’ mai-ah a kilaak dingin
na hong pai uh ciangin
hih bangin ka huangsung
na tuatcil gawpna uh
kua’n hong deih ding ahi hiam?
13Bangmahin a kimang lo piaknate
hong paipih nawn kei un.
Paknamtui halna ka kih hi.
Khadet ni, Sabbath ni, le
thupi takin na kikhopnate uh
mawhna tawh kidim ahih manin
ke’n ka thuakzo kei hi.
14Note’ Khadet nite le
na pawite uh ka mudah hi.
Tuate pen kei a dingin
vangikpi khat suakkhin a,
tuate khempeuh
ka puakna-in ka gim hi. #Amos 5:21-22.
15“Thungenin na khutte uh
nong zaak uh ciangin
note kong en kei ding a,
thu tampi na nget uh hangin
ke’n ka ngai tuan kei ding hi.
Bang hang hiam cih leh
sisan tawh note’ khut kidim hi.
16Note kisil tawm unla,
a siangtho-in kibawl un.
Keima muhna-ah
na gamtat siatnate uh paikhia-in,
siatna na bawlte uh khawl un.
17Gamtat hoih ding kisin un.
Thumanin gamta unla,
kinetniamna kheel un.
Pa nei lote hu unla,
meigong numei panpih un,” ci hi.
18 Topa in hih bangin ci hi:
“Tu-in hong pai unla,
thu kikumkhawm ni.
Na mawhnate uh puansan a bat hangin
vuk bangin hong ngo ding hi.
Na mawhnate uh si bangin a san hangin
tuumul bangin hong kang ding hi.
19Note in utna lungsim nei-in
thu na man’ nak-uhleh
lei pana piang a gah hoihte
na ne ding uh hi.
20Ahih hangin note in kei hong nialin
na hong lehdo uhleh
namsau in note hong vatmai ding hi.
Bang hang hiam cih leh Topa in
hih thu gen khinzo hi,” a ci hi.
Jerusalem Tungah Thukhenna le A Hotkhiatna
21A thutak, thutang tawh
a kidim ngeisa khuapi,
bangci-a a paktat numei tawh
kibang ta ahi hiam?
Ama sungah thumanna om ngei napi-in
tu-in mi thatte bek a om ta hi.
22Jerusalem khuapi aw,
nguntang na bang ngei a,
tu-in ahihleh ngun-ek na suakta hi.
Leenggahzu limci na bang ngei a,
tu-in ahihleh
tui mawkmawk na bangta hi.
23Na uliante, mi lehdote hi a,
gutate tawh a kikhawlte ahi hi.
Mi khempeuh in
sumgolh le letsong a deih uh hi.
Amaute in pa nei lote panpih lo uh a,
meigongnu’ thu amaute in sang lo uh hi.
24Tua ahih ciangin, Topa, Vanglian Topa,
Israel-te’ Vanglian Pasian in
hih bangin ci hi:
“Ah, ka lang ahi note’ tungah
ka hehna kong khahkhia ding a,
ka gal ahi note tungah
keimah in kong thuk ding hi.
25Note tungah na kong sem ding a,
meikhukah haltui bangin
na saam-ek teng uh tuikhia sakin,
na kihelpih na nin khempeuh uh
ka lakhia ding hi.
26A masa-a bangin na thukhente,
a kipat cil-a bangin na upate
ka koihkik ding hi.
Tua khit ciangin nang pen
thuman khuapi, thutak khuapi,
hong kici ding hi,” a ci hi.
27 Topa thutang ahih manin
Jerusalem khuapi honkhia ding a,
a sungah a teng a kisik mi khempeuh zong
a honkhia ding hi.
28Ahih hangin a lehdo mite le
a khial mite kisusia khawmin
Topa a nusiate pen
kibeimangsak ding hi.
29Bang hang hiam cih leh
tawsaw kungte na biakna hangun
note na maizum ding uh a,
biakna huan na bawlna hangun
zahhuai-in na mai uh san ding hi.
30Bang hang hiam cih leh note pen
a teh a vul tawsaw kung le
tui a ngah lo huan tawh
na kibang ding uh hi.
31A thahat mipa pen
patlom tawh kibang ding a,
ama nasepna pen mei-ek suak ding hi.
Kuamah in phelhzo loin
amau tegel kangtum khawm ding uh hi.
Currently Selected:
ISAIAH 1: TDB
Highlight
Share
Copy
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.