२ थेसालोनिकि 2
2
टाङ्बा फेरि उङ्ना बारे
1भुम्बु-झान्झाचि हिट्नुङ् आनो-आन्झोचि, आनि टाङ्बा येसु खिरिस्ट फेरि उङ्ना बारेङि हिट्नुङ् येसु टुब्मा माङ्हाङ्ङा आनि एक्के ठोङ् आछुम्ना बारेङि आन्याँ खानिलाउङ्सा बिन्टि चोगुम्टुम्मा॥#१ थेसालोनिकि ४:१५-१७ 2कोइङा खोना चा माङ्हाङ्लाम्माना रिङ् काचेक्बाचि, चेक्टिना रिङ् आथाबा छेप्बालाक् रिङ्लाम्मा टाङ्बा पाइले डोक् टामाहिडे पिक्सा ओमाट्टुए भोने, हिट्नागा रिङ् आन्याँलाम्मा टायाना नुङ् खानि निङ्ग्वा ओेभेन्नि चा आथाबा चिन्तित् लिनेनिन्॥ 3खानि साङा चा खोना रिङ्लाम्मा चा धोका मापिडिन्चा, पोङ्भोने माङ्हाङ्ङाना बिरुद्दाङि ठेना काचिङ्गाल मिलिए हिट्नुङ् जाखाम्ङि ठाना धारमाबिधि मानाँ काचोक्निबा मिठेट्ने सोम्मा टाङ्बाङाना हिट्ना लेम्बा टानिना॥ 4हिट्नाँ माङ्हाङ् बिरोध चोगुटु हिट्नुङ् याप्मिचिङा माङ्हाङ् नुङ् उमिट्टुगा ख्वाप्पा थोक्चि हिट्नुङ् माङ्ध्यान् ओचोगुगा सोब्बे थोक्ङाना बिरोध चोगुटु, हिट्नुङ् हिट्नाँ आप्पे लोङ्सा सोब्बे नुङ्ना ठेना चोगुटु॥ नाट्टेप्मा एरोक् माखाक्, हिट्ना माङ्हाङ्ङाना माङ्ठानाङि युङ्युक् हिट्नुङ् आङा डोक् माङ्हाङ् पिक्सा माट्टुटु॥#दानिएल ११:३६; इजिकिएल २८:२ 5आङा खानिलोक् युङाङ्ना बेला आङा नागा ख्वाप्पा रिङ् लोनानिगा, पाक् खानिङा आमुन्डुम्मे नि? 6हिट्नाङाना बेला लियुङ् हिट्ना धारमाबिधि मानाँ काचोक्निबा ठेट्युक्॥ हिट्ना खोना रिङ्ङा हाट्ले सोम्मा छाक्टुएसुएना, हिट्ना रिङ् खानिङा ठाहा आटोगुम्टुम्॥ 7हिट्ना भेन्ना याप्मिङाना ओबोल्ङाना टोॽवा पाइले डोक् सोगोप् चोगुएट्टु॥ टरो हिट्नाङाना ओबोल् जुन्ङा छाक्टुएसुए माङ्हाङ्ङा हिट्ना मिहोट्ङे सोम्मा हिट्नाडे डोक् लियुयाक्युक्॥ 8हिट्नुङ्ना धारमाबिधि मानाँ काचोक्निबा ठेट्युक्, टाङ्बा येसुङा ओयासिङाना ओसोक्माङा हिट्नुङ् उन् उङ्ना बेला ठेट्ना माहिमालाम्मा हिट्ना जाखाम् चोगुटु॥#यासैया ११:४
9हिट्ना धारमाबिधि मानाँ काचोक्निबा सैतानङाना साक्तिलोक् टायुक्, हिट्नुङ् हिट्नाङा सोब्बे पारिक्गा माङ्जोगा चिन्नाचि हिट्नुङ् डोङ् ठोङ्डिगा टोॽवाचि चोगुटु॥#मात्ति २४:२४ 10हिट्नुङ् जाखाम् लिसिना लाम्बोङि उलिगा सोब्बे हिट्नाँ ख्वाप्पा ओचाफेन्गा टोॽवाङा सुबुचिचि॥ हिट्नागा जाखाम् उलियुक्, पोङ्भोने हिट्नागाँ छेम्बाना रिङ् लाट्मा हिट्नुङ् हिट्नालाम्मा हिङिना रिङ् ओलाडुवाट्टुन्॥ 11हिड्डेउङ् हिट्नागाँ माङ्जोगा रिङ् डोक् बिस्वास ओचोग्वाक् नुङ् माङ्हाङ्ङा हिट्नागा उन्चि निङ्ग्वाङि फाम्लेङ् चोगुचिगा रिङ् ठेन्डुबिडुचिचि॥ 12हिड्डेउङ् छेम्बाना रिङ् बिस्वास ओचोगुन्गा, टरो ओभेन्गा टोॽवाङि डोक् हारका उलिगा सोब्बे याप्मिचि माङ्हाङ्ङा साजाए पिडुचिचि॥
मुक्टि टोक्माउङ्सा सेक्बालाक्चि
13टाङ्बाङा माया माचोगिगा भुम्बु-झान्झाचि हिट्नुङ् आनो-आन्झाचि, खानि लोङ्सा आन्याँ सोरोक् पोए-पोए ठाङ्मा डोक् कोन्युक्, पोङ्भोने उटुम्लाम्मा डोक् सेङ्सेङ्ना हाङ्साङा चोखो चोक्माना टोॽवालाम्मा हिट्नुङ् छेम्बाना खाबोरङाना बिस्वासलाम्मा हिङ्माउङ्सा माङ्हाङ्ङा खानि मासेगिए॥ 14ना रिङ् लोङ्सा डोक् आन्याँ लोनानिगा नुना खाबोरलाम्मा आनि टाङ्बा येसु खिरिस्टङाना साम्मान्ङाना ओभागा खानिङा चा टोक्मा माङ्हाङ्ङा खानि माछेम्डिए॥ 15नाड्डेउङ् भुम्बु-झान्झाचि हिट्नुङ् आनो-आन्झाचि, खानिङा बिस्वास आचोगुम्ना रिङ्ङि बोल्लेउ लिसानिउङ् युङानि, हिट्नुङ् आन्याँ यासिङा खानि लोनानि चा आथाबा चिट्ठि छेप्टुमुङ् हाक्नानि चा खानिङा आटोगुम्ना हिसिक्माना रिङ् बिस्वास चोगायाक्टानुम्॥
16हाट्ले आनि टाङ्बा येसु खिरिस्ट आप्पे हिट्नुङ् माङ्हाङ् आनि पाबा जुन्ङा आनि माया आचोगे, हिट्नुङ् उन्ङा दाया आचोक्युङ् खोना बेला चा लाट्निना आँट् लोक् छेम्बाना आसा आपियाक्॥ 17उन्ङा डोक् सोब्बे ओचेट्नुगा रिङ्चि चोक्मा हिट्नुङ् माप्मालाउङ्सा आँट् लोक् बोल् खानि मापिड्याक्॥
Currently Selected:
२ थेसालोनिकि 2: APH
Highlight
Copy
Compare
Share
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society