ठीक्नल 17
17
पावल् धङ् सीलास् थीस्सलोनीका सार्ल ॱलीब १-९
1हुनी पावल्सो अम्फीपोलीस् सार् धङ् अपोल्लोनीया सार्नी फल्ल झ्यीन फीन्नी थीस्सलोनीका सार्ल ॱलीब बेत्। उन यहुदीगी छ्यो़गी छोगङ् च्यीक् यो़प्प बेत्।
2ॱनी एल्लागी डस्सीरङ् पावल् हुगी छोगङ् दील स्युन हुदु दी़न्डक् ॱसुम् थुक्की ङीत्तुवे ङीङ्गी यङ्ल ॱसुङ्रप्की केच्च्यल हुगी मी घयेत्तङ् तम्स्यु लप्री चीय बेत्। 3को़न्ज्योक्की च्यप्को़ल्ल को़न तङे ख्रीष्ट्ल दुक्स्यी गुर् गो़ ॱस्यर्केन् बेत्। ॱनी ढोङ् गो़ ॱस्यर्केन् बेत्। हुनी यङ् ॱसोम्बुल लोङ्गेन् बेत् सीर हीगो ॱसुङ्रप्ल आक् दुक् सीन्न पावल्की ॱसुङ्रप्की धो़न् ॱस्येत्न टेप्प बेत्। हुगी ख्रीष्ट् दी ङे खीत्रङ्ल ॱस्येत्न टो़क्केन् येशु बेत् सीन्न पावल्की ॱस्येत्न टेप्प बेत्। 4ॱनी हुगी यहुदी यरीब धङ् को़न्ज्योक्ल धेप्प मो़ब झ्यीक्केन् ग्रीक्की ज्यी़क्की मी गज्येन् हुल ॱलो खीन, पावल् धङ् सीलास्की छ्योल युङ बेत्। ॱनी हुगी दल भुमु ढक्पा अक् गज्येन् युङ बेत्।
5हीनी हुगी यहुदी ॱयोङ्म घयेत् दीब हुल सीगुक् लङ्न, ठोम् छुसनी मी अयेक्प घयेत् ॱयप्न मी छेत्मीत् जोप् झ्यीन हुट्ट ॱलङ्न सार् दीरङ् हुट्टे ॱस खो़ब बेत्। हुनी हुबे पावल् धङ् सीलास् सुङ्न हुगी मी जोम्ब घयेत् दी च्येल्ल ठीक्च्येल यासोन् सीक्केन् च्यीक्की खीम्ल घप्न युङ बेत्। 6ॱनी हुदु हुब ॱङीबु ॱमत् ॱङीबल मी घयेत् दीगी यासोन् दी धङ् पी़न्ज्या ॱयोङ्म दीब सुङ्न ढी़त्न सार्की पेम्बु घयेत् दी च्याल च्येन हुबे केत् ज्यप्न जम्बुलीङ् दीरङ् घयो़ थप्तु ची़क्केङ्गी मी हज्यरङ्गी सार्ल अक् ॱलीत्तुक्। 7हुब ॱङीबु यासोन् हीगी खीम्न स्यक्न दुक्। हीब घयेत् सीजर् ज्याबी़ क घयेत्ल ॱमीत् चीय, हुगी डल लोङ्न ज्याबु ॱयोङ्मा येशु सीक्केन् च्यीक् यो़क्केन् बेत् सीगुक् सीन्न पोला ज्यब बेत्। 8हीगो ॱह घोनी हुगी पेम्बु दीब धङ् हुदु जोम्बे मी घयेत् दी हुट्ट लङ बेत्। 9हुनी पेम्बु दीबे यासोन् दी धङ् हुगी दगु दीबल डीक्क स्योक्तु ची़त्न तङ बेत्।
पावल् धङ् सीलास् बेरीया सार्ल ॱलीब १०-१५
10हीनी हुगी गोङ् दीरङ् ढीम्सी झ्यीन हुगी पी़न्ज्या दीबे पावल् धङ् सीलास् बेरीया सार्ल तङ बेत्। ॱनी बेरीया दीदु ॱलीत्नी, हुब हुगी यहुदीगी छ्यो़गी छोगङ्ल फीम्ब बेत्। 11ॱनी हुगी यहुदी घयेत् दीब थीस्सलोनीकागी यहुदी डस्सी मेम्ब, हुले गज्येङ्गी गा यो़प्प बेत्। पावल्की ॱस्येप्पे तम् दी हुबे गस्सी छोर्न, हुगो को़न्ज्योक्की ॱसुङ्रप्तङ् डीक् मीत् डीक् ङीन् रीम फो़स्स्यी ॱसुङ्रप् डोन तेब बेत्। 12ॱनी हुगी यहुदी गज्येङ्गी, ग्रीक्की ज्यी़क्की भुमु ढक्पागी धङ् छ्योगो गज्येङ्गी छ्य स्यक्न युङ बेत्।
13हीनी पावल्की बेरीयादु को़न्ज्योक्की केच्च्य ॱस्यो़क्कुक् सीर थीस्सलोनीकागी यहुदी घयेत् दीबे ॱह घोनी, हुब घयेत् हुदु उक् युङ्न हुट्ट ॱलोङ्ज्ये ॱनो़न हुगी मी घयेत् दी पावल्सो़ डल ॱलोङ बेत्। 14हुनी हुगी पी़न्ज्या घयेत् दीगी ढीम्सी झ्यीन पावल् छ्यु ज्यम्जो छ्यीम्मी़ छीग ङो़ल तङ बेत्। ॱनी सीलास् धङ् तीमोथी हुदु देत् तङ बेत्। 15पावल् च्यो़गेन् दीबे एथेन्स् सार्ल ते च्येब बेत्। ॱनी हुब लोक्पे यङ्ल पावल्की सीलास् धङ् तीमोथील ज्योक्सी झ्यीन हीदु ॱस्योक् झ्यी सीन्न लो़न् तङ बेत्।
पावल् एथेन्स् सार्ल ॱलीब १६-३४
16हीनी पावल् हुदु सीलास् धङ् तीमोथील गुक्कीन् दो़प्पे यङ्ल हुगी सार् दील कु छेत्मीत् यो़प्प थोङ्नी, पावल्की ॱसीम्ल दुक्नङ् झ्युङ बेत्। 17ॱनी पावल् हुगी यहुदीगी छ्यो़गी छोगङ् दील फीन्न हुदु जोम्न युङे यहुदी घयेत् धङ् को़न्ज्योक्ल धेप्प मो़ब झ्यीक्केन् ग्रीक्की ज्यी़क्की मी घयेत्तङ् तम्स्यु लप्री चीय बेत्। ॱनी ङीन्दङ् फो़स्स्यी ठोम् छुसल आक् फीन्न हुदु ॱसु ठेत्न आक्, हुगोदङ् तम्स्यु लप्री चीय बेत्।
18हीनी इपीकुरी सीक्केन् धङ् इस्तोइकी सीक्केन् छ्योगी झ्यी़रीक् च्येम्मे चयेलम यरी पावल् च्येल्ल युङ्न हुबदङ् पावल् केच्च्य थुक्री चीय बेत्। ॱनी हुब यरीगी हीगी पोयोब हीगी घन्डे तम् लप्कुक्क? सीन्न ढीब बेत्। ॱनी यरीगी यङ् हीगी ॱल्ह ॱयोङ्मा ॱयोङ्मागी केच्च्य ॱस्यो़क्को़प्प डयेत् सीन्न झ्यीब बेत्। घन्ड हीन् सीन्न पावल्की येशुगी ढीक्की केच्च्य धङ् ॱस्यीनी यङ् ॱसोम्बुल लोङ्गेङ्गी केच्च्य ॱनेम्बु ॱस्येप्प हीङ्गो़प्प बेत्। 19हीनी हुब घयेक्की पावल् अरीयोपागस् सीस्से ॱसने च्यीक्ल ठीक्न रङ्गी ॱस्यो़क्केङ्गी छ्यो़लु ॱसम्ब हुगो ङीत् नेन्ज्ये ॱनो़गुक्। 20रङ्गी तम् हुगो ॱह लेसी यो़प्पेत्। ङीत्ल हुगी धो़न् दी ॱस्यो़त्रो झ्यी सीन्न झ्यीब बेत्। 21हुगी एथेन्स्की मी घयेत् धङ् उन यो़क्केन् छ्योबा घयेक्की मीजी दीलरङ् केच्च्य ॱसम्ब ॱसम्ब घयेत् नेन्न हुगी ढीक्ल तम्स्यु लप्री चीगो़प्प बेत्।
22हुनी पावल् अरीयोपागस् झ्यीस्स दीदु लोङ्न हुगी मी घयेत् दील हीन्दुक् सीन्न ॱस्येप्प बेत्। खीत्रङ् एथेन्स्की मी घयेस्सो, खीत्रङ् छ्यो़सीम् ॱसम्गेङ्गी मी दुक्। 23ङ हीगी सार् हील गीर्न खीत्रङ्गी छ्यो़गी योज्येत् घयेत्ल तये यङ्ल छ्यो़प्प पुस च्यीक् थोङ्ज्युङ्। ॱनी उन यीगी च्यीक्ल ङु ॱमीत् ॱस्यीगेङ्गी ॱल्हल छ्यो़प्प पुस च्यीक् बेत् सीन्न चोन दुक्। खीत्रङ्गी ङु ॱमीत् ॱस्यीगेन् हुगोल छ्यक् छ्यो़प्प पुगुक्। ॱनी हुगो ॱसु बेक्क ङे खीत्रङ्ल ॱस्येत्न बीन् योङ्।
24ॱस जम्बुलीङ् धङ् हीन घङ् यो़प्प घयेत् कुरीक् छ्यादु ची़क्केन् दी को़न्ज्योक् बेत्। खोङ् तेङ् यी़ धङ् ॱस जम्बुलीङ्गी दक्पु झ्यीनी, कोलीमीगी लक्पे स्यङे ॱल्हगङ्ल मीत् स्युगेन् बेत्। 25ॱनी हरुङ् खोङ्ल कोलीमीगी स्यप्च्यी़गी घन्डे तोक्प यो़प्प बेक्क? कोलीमी घयेत्ल क खोङ्गी उ धङ् छी धङ् घङ् गो़ब घयेत् ॱनङ्गेन् बेत्। 26मी च्यीक्की होक्नी खोङ्गी ज्यी़त् कुरीक् थो़न्दु ची़प्प बेत्। हुनी ज्यी़त् घयेत् धर्न जम्बुलीङ् ॱसोस्सोदु दो़च्च्ये यो़प्पल एल्लादु खोङ्गी छम् री दो री धङ् धी़दोक् को़न स्यक्प बेत्। 27हज्यरङ् कोलीमी घयेक्की को़न्ज्योक् चर च्येत्न ॱस्युप्न ॱयेङ्न खोङ् ॱङीच्च्ये यो़प्पल खोङ्गी हुगो जेङ् छ्यादु ची़प्प बेत्। ॱनी म दी खोङ् हज्यरङ् रीदङ् री च्येन्नी नन्दक्की ज्यङ मीप्प बेत्। 28घन्ड हीन् सीन्न हज्यरङ् ॱसोम्बु यो़प्प हीगो, डो छुगेन् हीगो धङ् हज्यरङ् छ्यादु ची़त्न यो़प्प हीगो खोङ्गी च्यानी झ्युङ्न यो़क्केन् बेत्। ॱनी खीत्रङ्गी पीज्य स्योङ्गेङ्गी मी च्यीक्की इक् हज्यरङ् घयेत् खोङ्गी ज्यी़त् बेत् सीन्न ढीन स्यक्तुक्। 29ॱनी हज्यरङ् को़न्ज्योक्की ज्यी़त् झ्यीनी, ॱनी को़न्ज्योक् हज्यरङ् कोलीमीगी रीक्स्यीगी ॱसीर्, ॱङु धङ् दोलोक्पल सो़बदङ् छ्येत्मीत् यो़प्प ब अक् ॱनो़ब ॱमत् ॱसम्ज्यीत्। 30हीन्दुक् झ्यीबे ॱस्यो़च्च्ये मीप्पे ले घयेक्की ढीक्ल को़न्ज्योक्की हजो़त् थुक्ल गोङ्ब ॱमत् चोङ, गुर बेत्। ह हीनी झ्यीब दी मी कुरीक् घल यो़त्न अक्, ॱएङ्गी लम्नी ॱसीम् ज्युर्च्यीत् सीन्न क ॱनङ्न यो़क्केन् बेत्। 31जम्बुलीङ् जेङ्ल को़न्ज्योक्की ठीम् ढङ्बु च्यो़च्च्येमे ङीन् खोङ्गी स्यक्न यो़क्केन् बेत्। ठीम् दी खोङ्गी को़बे ठीम्बो़ङ्गी च्यो़क्केन् बेत्। हीगो दीम्बरङ् हीम्ब हज्यरङ् कोलीमी घयेक्की ॱह घोज्ये यो़प्पल, को़न्ज्योक्की खोङ् ढोङ्नरे ॱसनेनी ॱसोम्बुल ॱलोङ बेत् सीन्न ॱस्येप्प बेत्।
32मी ॱस्यीन खुर यङ् ॱसोम्बुल लोङ बेत् सीर ॱह घोनी मी यरीगी हील छ्यस्सी़त् ज्यब बेत्। ॱनी यरीगी यङ् हीगी ढीक्ल तीङ्ला आक् ङीत् नेन्ज्ये ॱनो़गुक् सीन्न झ्यीब बेत्। 33हुनी पावल् हुबदङ् घीन टप्नर बेत्। 34हुगी मी यरी पावल्की छ्यल युङ्न छ्य स्योक्केल्ल झ्युङ बेत्। उन अरीयोपागस्की छोक्तेङ्गी मी डीयनुसीय सीक्केन् च्यीक्, ॱनी भुमु डामारीस् सीक्केन् च्यीक् धङ् ॱयोङ्म आक् युङ्न यो़प्प बेत्।
Currently Selected:
ठीक्नल 17: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
ठीक्नल 17
17
पावल् धङ् सीलास् थीस्सलोनीका सार्ल ॱलीब १-९
1हुनी पावल्सो अम्फीपोलीस् सार् धङ् अपोल्लोनीया सार्नी फल्ल झ्यीन फीन्नी थीस्सलोनीका सार्ल ॱलीब बेत्। उन यहुदीगी छ्यो़गी छोगङ् च्यीक् यो़प्प बेत्।
2ॱनी एल्लागी डस्सीरङ् पावल् हुगी छोगङ् दील स्युन हुदु दी़न्डक् ॱसुम् थुक्की ङीत्तुवे ङीङ्गी यङ्ल ॱसुङ्रप्की केच्च्यल हुगी मी घयेत्तङ् तम्स्यु लप्री चीय बेत्। 3को़न्ज्योक्की च्यप्को़ल्ल को़न तङे ख्रीष्ट्ल दुक्स्यी गुर् गो़ ॱस्यर्केन् बेत्। ॱनी ढोङ् गो़ ॱस्यर्केन् बेत्। हुनी यङ् ॱसोम्बुल लोङ्गेन् बेत् सीर हीगो ॱसुङ्रप्ल आक् दुक् सीन्न पावल्की ॱसुङ्रप्की धो़न् ॱस्येत्न टेप्प बेत्। हुगी ख्रीष्ट् दी ङे खीत्रङ्ल ॱस्येत्न टो़क्केन् येशु बेत् सीन्न पावल्की ॱस्येत्न टेप्प बेत्। 4ॱनी हुगी यहुदी यरीब धङ् को़न्ज्योक्ल धेप्प मो़ब झ्यीक्केन् ग्रीक्की ज्यी़क्की मी गज्येन् हुल ॱलो खीन, पावल् धङ् सीलास्की छ्योल युङ बेत्। ॱनी हुगी दल भुमु ढक्पा अक् गज्येन् युङ बेत्।
5हीनी हुगी यहुदी ॱयोङ्म घयेत् दीब हुल सीगुक् लङ्न, ठोम् छुसनी मी अयेक्प घयेत् ॱयप्न मी छेत्मीत् जोप् झ्यीन हुट्ट ॱलङ्न सार् दीरङ् हुट्टे ॱस खो़ब बेत्। हुनी हुबे पावल् धङ् सीलास् सुङ्न हुगी मी जोम्ब घयेत् दी च्येल्ल ठीक्च्येल यासोन् सीक्केन् च्यीक्की खीम्ल घप्न युङ बेत्। 6ॱनी हुदु हुब ॱङीबु ॱमत् ॱङीबल मी घयेत् दीगी यासोन् दी धङ् पी़न्ज्या ॱयोङ्म दीब सुङ्न ढी़त्न सार्की पेम्बु घयेत् दी च्याल च्येन हुबे केत् ज्यप्न जम्बुलीङ् दीरङ् घयो़ थप्तु ची़क्केङ्गी मी हज्यरङ्गी सार्ल अक् ॱलीत्तुक्। 7हुब ॱङीबु यासोन् हीगी खीम्न स्यक्न दुक्। हीब घयेत् सीजर् ज्याबी़ क घयेत्ल ॱमीत् चीय, हुगी डल लोङ्न ज्याबु ॱयोङ्मा येशु सीक्केन् च्यीक् यो़क्केन् बेत् सीगुक् सीन्न पोला ज्यब बेत्। 8हीगो ॱह घोनी हुगी पेम्बु दीब धङ् हुदु जोम्बे मी घयेत् दी हुट्ट लङ बेत्। 9हुनी पेम्बु दीबे यासोन् दी धङ् हुगी दगु दीबल डीक्क स्योक्तु ची़त्न तङ बेत्।
पावल् धङ् सीलास् बेरीया सार्ल ॱलीब १०-१५
10हीनी हुगी गोङ् दीरङ् ढीम्सी झ्यीन हुगी पी़न्ज्या दीबे पावल् धङ् सीलास् बेरीया सार्ल तङ बेत्। ॱनी बेरीया दीदु ॱलीत्नी, हुब हुगी यहुदीगी छ्यो़गी छोगङ्ल फीम्ब बेत्। 11ॱनी हुगी यहुदी घयेत् दीब थीस्सलोनीकागी यहुदी डस्सी मेम्ब, हुले गज्येङ्गी गा यो़प्प बेत्। पावल्की ॱस्येप्पे तम् दी हुबे गस्सी छोर्न, हुगो को़न्ज्योक्की ॱसुङ्रप्तङ् डीक् मीत् डीक् ङीन् रीम फो़स्स्यी ॱसुङ्रप् डोन तेब बेत्। 12ॱनी हुगी यहुदी गज्येङ्गी, ग्रीक्की ज्यी़क्की भुमु ढक्पागी धङ् छ्योगो गज्येङ्गी छ्य स्यक्न युङ बेत्।
13हीनी पावल्की बेरीयादु को़न्ज्योक्की केच्च्य ॱस्यो़क्कुक् सीर थीस्सलोनीकागी यहुदी घयेत् दीबे ॱह घोनी, हुब घयेत् हुदु उक् युङ्न हुट्ट ॱलोङ्ज्ये ॱनो़न हुगी मी घयेत् दी पावल्सो़ डल ॱलोङ बेत्। 14हुनी हुगी पी़न्ज्या घयेत् दीगी ढीम्सी झ्यीन पावल् छ्यु ज्यम्जो छ्यीम्मी़ छीग ङो़ल तङ बेत्। ॱनी सीलास् धङ् तीमोथी हुदु देत् तङ बेत्। 15पावल् च्यो़गेन् दीबे एथेन्स् सार्ल ते च्येब बेत्। ॱनी हुब लोक्पे यङ्ल पावल्की सीलास् धङ् तीमोथील ज्योक्सी झ्यीन हीदु ॱस्योक् झ्यी सीन्न लो़न् तङ बेत्।
पावल् एथेन्स् सार्ल ॱलीब १६-३४
16हीनी पावल् हुदु सीलास् धङ् तीमोथील गुक्कीन् दो़प्पे यङ्ल हुगी सार् दील कु छेत्मीत् यो़प्प थोङ्नी, पावल्की ॱसीम्ल दुक्नङ् झ्युङ बेत्। 17ॱनी पावल् हुगी यहुदीगी छ्यो़गी छोगङ् दील फीन्न हुदु जोम्न युङे यहुदी घयेत् धङ् को़न्ज्योक्ल धेप्प मो़ब झ्यीक्केन् ग्रीक्की ज्यी़क्की मी घयेत्तङ् तम्स्यु लप्री चीय बेत्। ॱनी ङीन्दङ् फो़स्स्यी ठोम् छुसल आक् फीन्न हुदु ॱसु ठेत्न आक्, हुगोदङ् तम्स्यु लप्री चीय बेत्।
18हीनी इपीकुरी सीक्केन् धङ् इस्तोइकी सीक्केन् छ्योगी झ्यी़रीक् च्येम्मे चयेलम यरी पावल् च्येल्ल युङ्न हुबदङ् पावल् केच्च्य थुक्री चीय बेत्। ॱनी हुब यरीगी हीगी पोयोब हीगी घन्डे तम् लप्कुक्क? सीन्न ढीब बेत्। ॱनी यरीगी यङ् हीगी ॱल्ह ॱयोङ्मा ॱयोङ्मागी केच्च्य ॱस्यो़क्को़प्प डयेत् सीन्न झ्यीब बेत्। घन्ड हीन् सीन्न पावल्की येशुगी ढीक्की केच्च्य धङ् ॱस्यीनी यङ् ॱसोम्बुल लोङ्गेङ्गी केच्च्य ॱनेम्बु ॱस्येप्प हीङ्गो़प्प बेत्। 19हीनी हुब घयेक्की पावल् अरीयोपागस् सीस्से ॱसने च्यीक्ल ठीक्न रङ्गी ॱस्यो़क्केङ्गी छ्यो़लु ॱसम्ब हुगो ङीत् नेन्ज्ये ॱनो़गुक्। 20रङ्गी तम् हुगो ॱह लेसी यो़प्पेत्। ङीत्ल हुगी धो़न् दी ॱस्यो़त्रो झ्यी सीन्न झ्यीब बेत्। 21हुगी एथेन्स्की मी घयेत् धङ् उन यो़क्केन् छ्योबा घयेक्की मीजी दीलरङ् केच्च्य ॱसम्ब ॱसम्ब घयेत् नेन्न हुगी ढीक्ल तम्स्यु लप्री चीगो़प्प बेत्।
22हुनी पावल् अरीयोपागस् झ्यीस्स दीदु लोङ्न हुगी मी घयेत् दील हीन्दुक् सीन्न ॱस्येप्प बेत्। खीत्रङ् एथेन्स्की मी घयेस्सो, खीत्रङ् छ्यो़सीम् ॱसम्गेङ्गी मी दुक्। 23ङ हीगी सार् हील गीर्न खीत्रङ्गी छ्यो़गी योज्येत् घयेत्ल तये यङ्ल छ्यो़प्प पुस च्यीक् थोङ्ज्युङ्। ॱनी उन यीगी च्यीक्ल ङु ॱमीत् ॱस्यीगेङ्गी ॱल्हल छ्यो़प्प पुस च्यीक् बेत् सीन्न चोन दुक्। खीत्रङ्गी ङु ॱमीत् ॱस्यीगेन् हुगोल छ्यक् छ्यो़प्प पुगुक्। ॱनी हुगो ॱसु बेक्क ङे खीत्रङ्ल ॱस्येत्न बीन् योङ्।
24ॱस जम्बुलीङ् धङ् हीन घङ् यो़प्प घयेत् कुरीक् छ्यादु ची़क्केन् दी को़न्ज्योक् बेत्। खोङ् तेङ् यी़ धङ् ॱस जम्बुलीङ्गी दक्पु झ्यीनी, कोलीमीगी लक्पे स्यङे ॱल्हगङ्ल मीत् स्युगेन् बेत्। 25ॱनी हरुङ् खोङ्ल कोलीमीगी स्यप्च्यी़गी घन्डे तोक्प यो़प्प बेक्क? कोलीमी घयेत्ल क खोङ्गी उ धङ् छी धङ् घङ् गो़ब घयेत् ॱनङ्गेन् बेत्। 26मी च्यीक्की होक्नी खोङ्गी ज्यी़त् कुरीक् थो़न्दु ची़प्प बेत्। हुनी ज्यी़त् घयेत् धर्न जम्बुलीङ् ॱसोस्सोदु दो़च्च्ये यो़प्पल एल्लादु खोङ्गी छम् री दो री धङ् धी़दोक् को़न स्यक्प बेत्। 27हज्यरङ् कोलीमी घयेक्की को़न्ज्योक् चर च्येत्न ॱस्युप्न ॱयेङ्न खोङ् ॱङीच्च्ये यो़प्पल खोङ्गी हुगो जेङ् छ्यादु ची़प्प बेत्। ॱनी म दी खोङ् हज्यरङ् रीदङ् री च्येन्नी नन्दक्की ज्यङ मीप्प बेत्। 28घन्ड हीन् सीन्न हज्यरङ् ॱसोम्बु यो़प्प हीगो, डो छुगेन् हीगो धङ् हज्यरङ् छ्यादु ची़त्न यो़प्प हीगो खोङ्गी च्यानी झ्युङ्न यो़क्केन् बेत्। ॱनी खीत्रङ्गी पीज्य स्योङ्गेङ्गी मी च्यीक्की इक् हज्यरङ् घयेत् खोङ्गी ज्यी़त् बेत् सीन्न ढीन स्यक्तुक्। 29ॱनी हज्यरङ् को़न्ज्योक्की ज्यी़त् झ्यीनी, ॱनी को़न्ज्योक् हज्यरङ् कोलीमीगी रीक्स्यीगी ॱसीर्, ॱङु धङ् दोलोक्पल सो़बदङ् छ्येत्मीत् यो़प्प ब अक् ॱनो़ब ॱमत् ॱसम्ज्यीत्। 30हीन्दुक् झ्यीबे ॱस्यो़च्च्ये मीप्पे ले घयेक्की ढीक्ल को़न्ज्योक्की हजो़त् थुक्ल गोङ्ब ॱमत् चोङ, गुर बेत्। ह हीनी झ्यीब दी मी कुरीक् घल यो़त्न अक्, ॱएङ्गी लम्नी ॱसीम् ज्युर्च्यीत् सीन्न क ॱनङ्न यो़क्केन् बेत्। 31जम्बुलीङ् जेङ्ल को़न्ज्योक्की ठीम् ढङ्बु च्यो़च्च्येमे ङीन् खोङ्गी स्यक्न यो़क्केन् बेत्। ठीम् दी खोङ्गी को़बे ठीम्बो़ङ्गी च्यो़क्केन् बेत्। हीगो दीम्बरङ् हीम्ब हज्यरङ् कोलीमी घयेक्की ॱह घोज्ये यो़प्पल, को़न्ज्योक्की खोङ् ढोङ्नरे ॱसनेनी ॱसोम्बुल ॱलोङ बेत् सीन्न ॱस्येप्प बेत्।
32मी ॱस्यीन खुर यङ् ॱसोम्बुल लोङ बेत् सीर ॱह घोनी मी यरीगी हील छ्यस्सी़त् ज्यब बेत्। ॱनी यरीगी यङ् हीगी ढीक्ल तीङ्ला आक् ङीत् नेन्ज्ये ॱनो़गुक् सीन्न झ्यीब बेत्। 33हुनी पावल् हुबदङ् घीन टप्नर बेत्। 34हुगी मी यरी पावल्की छ्यल युङ्न छ्य स्योक्केल्ल झ्युङ बेत्। उन अरीयोपागस्की छोक्तेङ्गी मी डीयनुसीय सीक्केन् च्यीक्, ॱनी भुमु डामारीस् सीक्केन् च्यीक् धङ् ॱयोङ्म आक् युङ्न यो़प्प बेत्।
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society