MAROMU 9
9
Mungu ɗe Monyewe utsahua
1Hari mwa uv̄umoja wangu na Kristi, nisurongoa ikweli, tsisurongoa trambo, tsena inafusi yangu yav̄ingwa na iRoho Ndzitwaharifu isuishadidisa: 2amba v̄anu tsina huzuni ɓole na utungu kausukoma rohoni hangu. 3Natsov̄endza wami yangu nilaãnishihe, niɓaushane na Kristi ha tanafu ya wananyangu, wao wa ikaɓila yangu uv̄andre wa shiuɓinadamu, 4wao walio Maisraila, wafanyiha wana, waonesewa utukufu, wav̄olwa yimikataɓa, iSharia, iĩɓada, na zinguwahadi. 5Wadzaɗe wawo ɗe wadzaɗe wa zamani wale, na uv̄andre wa shiuɓinadamu Kristi alawa hari mwa ikaɓila yawo, waye Monyewe uju na zitrongo piya, Mungu naɓarikishihe daima. Amina.
6Tsi amba urongozi wa Mungu kawafayi. Mana tsi piya wao wadzalwa na Israila#9:6 Israila: Dzina lini lisumurongoa ɗe Yaãkuɓu. Namusome tsena na yamaeledzo ju la Israila hari mwa zikandre za mwiso za ishio ini. walio Maisraila. 7Wala tsi piya zilembwe za Iɓrahima ɗe walio wana, mana uMuangishio urongoa: «Ɗe ha Isiaka ɗe v̄utsolawao zilembwe zitsohiriwao zaho.» 8Yaãni v̄av̄o, tsi ɗe uwana waja ha ndzia ya shiuɓinadamu walio wana wa Mungu, ɓadi uwana wa uwahadi ɗe walio hari mwa ihisaɓu ya zizilembwe. 9Tsunu urongozi wa uwahadi: «Wakati mauri ɗe unu nitsorudi, na Sara atsokana mwana mutruɓaɓa.»
10Wala tsi tu, ɓadi Reɓeka wajau alio amba amira wana mbiliju na mutru moja, ne ɗe Isiaka ɓaɓatru. 11Na kaɓula ya wana wahe udzalwa, raha kawafanya ndjema wala mbovu, ile pare umupango wahe uɓaki, ne ɗe uka amba waye ɗe atsahuao, 12wala tsi ha zitrendro, ɓadi ɗe ha Monyewe uhira, Reɓeka aambilwa: «uMuhu atsorumishia umutiti», 13mauri ɗe iheli yaangihwa: «Yaãkuɓu tsimuv̄endze, Ĩzu tsimuenge#9:13 tsimuenge: Yaãni, tsimuhara..»
14Ɓasi v̄av̄o ritsorongoa trini? Amba Mungu tsi wa haki? Ata hata! 15Mana amuambia Musa:
«Nitsorehemu uwo nitsomurehemuo,
niv̄orehe uwo nitsomuv̄orehaowo.»
16Ha izo, kayaketsi ha yamav̄endzeleo ya mutru, au ha idjitihadi yahe, ɓadi ɗe ha Mungu Monyewe urehemu. 17Mana uMuangishio umuambia Firiyauna#9:17 Firiyauna: Yaãni, ɗe umufalume wa Miswiri.: «Tsihuv̄a daradja ha kusudi, ile nionese haho ushindzi wangu na lidzina langu lijudziwe hari mwa ulemengu piya.» 18Ha izo, waye urehemu uwo waye atsahao, na ukaidisha#9:18 ukaidisha: V̄wa watru waelewao: ... na uzidi ukaidisha uwo waye atsahao uzidi ukaidisha. uwo waye atsahao.
iHadhaɓu na urehema wa Mungu
19Mukinishiha amba v̄wa mutru atsonidzisao: «Ɓasi manatrini ata alaumuo tsena? Mbani ɗe atsoshindrao andre kinyume na mav̄endzeleo yahe?» 20Ɓasi hewe wawe shiumbe mwanadamu, wawe mbani ata usuɓutuo umukanyushe Mungu? Hali shitru yaparangwa itsomudzisa muparangizi wayo amba: «Manatrini wanifanya namuna ini?» 21Afa muparangizi kasina ruhusa hari mwa liɗongo ata ajua arenga ɗongo wilo-wilo, afanya shiya ya sheo na shiya ndziv̄ungufu?
22Ɓasi neka Mungu utsaha yahe aonese hadhaɓu zahe na ujudza ushindzi wahe, astahamili ha suɓira ɓole ziya za hadhaɓu zatayarishiwa uangamifu? 23Au tsena, neka atsaha aonese utadjirifu wa utukufu wahe ha ziziya za urehema azitayarisha rangu kaɓula amba zike za utukufu? 24Wasi ra moni v̄av̄o wajau, wasi rilio amba arihiri, tsi tu amba hari mwa yaMayahudi, ɓadi tsena hari mwa zinishani zangina. 25Mauri ɗe inamuna airongoao moni na ishio ya mutrume Hozeya:
«Uwo ulio amba kawaka umati wangu,
nitsouhira umati wangu; na uwo kawaka muv̄endzewa,
nitsouhira muv̄endzewa.»
26Na tsena:
«V̄ahanu v̄ale wakoambilwa: ‹Wanyu tsi umati wangu›,
ɗe v̄ahanu kamwe watsohiriwao:
‹Wana wa Mungu alio hayi.› »
27Na Izaya waye, ajudza zahusu Israila:
«Ata neka amba ihisaɓu ya Israila ifanyiha
mauri ɗe umutsanga wa iɓahari,
ne washashi ɗe watsohuyiwao.
28Mana Mola atsotsimidza ha ukamilifu na ha upesi,
ihukuma yahe shiv̄andreju mwa tsi.»
29Tsena mauri ɗe iheli Izaya aka airongoa rangu kaɓula:
«Na djeli Mola Monyewe Ushindzi kaka arilisha
rakana zilembwe, ratsorendreha mauri Suduma#9:29 Suduma... Gomora: Yao malago yakoketsiwa na watru wendza taɓia za peu, makufurina.,
rifanyihe mauri Gomora.»
Israila ilatsiha hari mwa muhakisho mbeli za Mungu
30Ɓasi v̄av̄o rirongowe jeje? Watru wa zinishani zangina kawakodzishahilisa na umuhakisho ha Mungu wapara muhakisho ha ndzia ya uaminifu, 31wakati ulio amba Israila wakozunguha muhakisho ha ndzia ya sharia, ne kawaupara. 32Manatrini? Mana wakouzunguha, tsi ulawana na uaminifu, ɓadi mauri wakoja ha ndzia ya zizitrendro. Wakwala hari mwa liɓwe#9:32 liɓwe: Marongozi yanu yasumurongoa ɗe Insa-Kristi, uMutsahuliwa wa Mungu. likwalisao. 33Mauri ɗe iheli v̄uangihwa:
«Tsini, nisuhetsi ɓwe *Siyuna,
ɓwe la ukwalisa, tsena ɓwe-monye liusao;
na uwo amuaminio, katsotolewa itama.»
Currently Selected:
MAROMU 9: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
