MUV̄ENULIO 20

Mufungo wa Iɓilisa muda wa maha alifu

1Amwesa tsiono malayika yakoshuka ulawa pev̄oni, na wiyo ikana umufunguo wa Uzimu na silisili ɓole muhononi. 2Isiki ishinyama ɓole mufano wa vwayi, inyoha ya ãswili ilio ɗe Iɓilisa amma Shetwani, aitratria muda wa maha alifu. 3Aivutsu Uzimu, auɓala, amwesa aufungu na utria muhuri uju mwaye, ile asudanganye tsena zinishani mupaka yimaha alifu yitsimidzihe. Ɓaanda ya v̄av̄o ilazimu ajeledzewe mwana muda.

4Amwesa tsiono ziri za shiufalume. Wao waziketsia, wav̄olwa wahukumu. Tsiono tsena ziroho za wao wapulwa zizitswa ha siɓaɓu ya ushahidifu wa Insa na Urongozi wa Mungu, wao kawasudjudia ishinyama mbovu wala lisanamwe layo, tsena kawaka wapara iãlama hari mwa uuso wala hari mwa umuhono. Waregea hayi, amwesa watawala v̄umoja na Kristi muda wa maha alifu. 5uWafu wangina kawaregea hayi mupaka maha alifu yile yitsimidzihe. Uwo ɗe umuregezeo hayi wa handra. 6Waɓarikishiha na utwaharishiha wao waliona fungu hari mwa umuregezeo hayi wa handra. Hari mwao, ufa wa v̄ili kauna ushindzi, ɓadi watsoka Matolezi-Masadaka wa Mungu na wa Kristi, tsena watsotawala v̄umoja na waye hari mwa yimaha alifu yiyo.

uMuangamidzio wa Shetwani

7yiMaha alifu ukoma yayo, Shetwani atsojeledzewa shiv̄ani hahe. 8Na waye atsolawa adanganye piya zinishani hari mwa zinyonga nne za ishiv̄andre ya tsi, ne ɗe Gogu na Magogu, ile azingulidze za kondro. Indadi yawo mauri mutsanga wa iɓahari. 9Wahea hari mwa piya ishiv̄andre ya tsi, wazingidzia makao ya watwaharifu, liɗago dziv̄endzewa. Ɓadi moro ushuku ulawa pev̄oni, uwaangamidza. 10Na Iɓilisa akowadanganya#20:10 Na Iɓilisa akowadanganya... daima: Namuangaliye Muv̄ 19:20. ne avutswa moni na lidzaha la moro na vu la shidzaha, v̄ahanu ishinyama mbovu na umushukidziwa-marongozi wa trambo walio. Watsotreswa uku na mutsana ha daima.

Nida yahusu ihukuma ya mwiso

11Amwesa tsiono shiri ya ufalume ɓole amwesa ndjeu, na uMonyewe aka aiketsia. iShiv̄andre ya tsi na uwingu zizimiha mbeli zahe, wala kav̄waparihana tsena ɓandza amba lawo. 12Tsiono tsena uwafu, rangu waɓole ata watiti waka wahimi mbeli na ishiri ya ufalume. V̄uɓulwa zio, na shio yangina iɓulwa, ilio ɗe ishio ya uhayati. uWafu wahukumulwa ha uɗunga izo zaka zaangihwa moni na zizio ulawana na zitrendro zawo. 13iƁahari iregeza uwafu waka moni mwayo, tsena ufa na Uzimu wa wafu ziregeza uwafu waka moni mwazo, na wao wahukumulwa, kula moja ulawana na zitrendro zahe. 14Amwesa ufa na Uzimu wa wafu zivutswa moni na lidzaha la moro. Uwo ɗe ufa wa v̄ili, lidzaha la moro. 15Mutru yotsi kaparihana amba aangihwa moni na ishio ya uhayati, avutswa moni na lidzaha la moro.

Currently Selected:

MUV̄ENULIO 20: swb

Highlight

Compare

Copy