MAGALATWIYA 1

1Wami Ɓaulusu, Muv̄ingizi-Risala, trongo kayalawa ha wanadamu, wala ha indzia ya mwanadamu, ɓadi ha Insa-Kristi|Insa na Mungu Ɓaɓa, amuregeza hayi ulawa ha uwafu, 2na piya wananya wa shi uaminifu walio na wami, risumuangishiani wanyu ziDjama Ndziwaminifu za Galatwiya: 3Rehema na amani nazimuendreleyeni ulawa ha Ɓaɓatru Mungu na Raɓi Insa-Kristi, 4alio amba adzitoa fidia ha isiɓaɓu ya madhambi yatru, ile arikombowe na uwakati movu wa leo unu, ha uɗunga ya mav̄endzeleo ya Mungu watru amma Ɓaɓatru. 5Natukuzihe daimani aɓada. Amina.

Kav̄u Haɓari Ndjema yangina

6Nisushanga ha upesi trini muɓauhao Uwo alio amba amuhirini ha ineema ya Kristi, ha uendra hari mwa Haɓari Ndjema yangina. 7Tsi amba v̄wa Haɓari Ndjema yangina, ɓadi v̄wa wamuɓaɓanisaoni, watsahao wagaudze iIndjili ya Kristi. 8Ɓadi neka v̄wa mutru, wala ukana ɗe wasi, au malayika yalawa pev̄oni, amba asumujudzani Haɓari Ndjema yangina na ile ramujudzaniyo, ɓasi nalaãniwe. 9Madza riirongoa, tsena risurudi riirongowe raha av̄asa: neka v̄wa mutru amujudzaoni Haɓari Ndjema yangina na ile mwaipara, ɓasi v̄av̄o nalaãniwe!

10Ɓasi av̄asa, hali v̄anu nisutsaha muhakisho wa wanadamu, au wa Mungu? Hali nisutsaha nijiv̄idze wanadamu? Na djeli nakotsaha raha nijiv̄idze wanadamu, tsatsoka murumishi wa Kristi.

iNamuna Ɓaulusu adhwaminishiwa Uv̄ingizi-Risala

11Nisumuhakikishani, wananyangu, amba iIndjili nakoijudza, tsi ya shiuɓinadamu. 12Mana tsaipara ha mwanadamu, wala tsasomedzewayo na mwanadamu, ɓadi Insa-Kristi ɗe aniv̄enuliayo.

13Kweli amba madza mukia maendreleo yangu moni na idini ya shi Uyahudi|Muyahudi nyuma oho, namuna jeje nakotresa iDjama Ndziwaminifu ya Mungu, ha utsaha niiangamidze. 14Hari mwa itrongo ya uɗunga idini ya shi Uyahudi, nakov̄iria hirimu zangu nyengi wa kaɓila moja na wami, mana tsikana djitihadi ɓole zaidi na zimila za wadzaɗe wangu. 15Ɓadi wakati Mungu atsaha wamopara, waye alio amba anitsahua rangu mimbani ha mayangu, tsena anihira ha urehema wahe 16wa univ̄enulia uMwana wahe, ile nimujudze ha uwatru wa zinishani zangina kazimuji Mungu, ɓasi wakati uwo tsatsaha shauri ha mutru atsokao yotsi, 17ɓila ata uhea Yerusalemu amba naone wao waka Mav̄ingizi-Risala|Risala kaɓula ya wami, tsilawa tsendre Araɓiya, amwesa tsiregea Damasko.

18Ɓaanda ya maha miraru, tsihea Yerusalemu namujuwe Monye#1:18 Monye: iShigiriki isurongoa Sefasi., tsena tsiɓaki suku kumi na tsano hahe. 19Tsaona ata Muv̄ingizi-Risala wangina neka tsi ɗe Yakoɓu, mwananyahe wa Raɓi. 20Trongo zini nimuangishiaoni, nisumuambiani mbeli za Mungu amba tsisurongoa trambo. 21Ɓaanda ya v̄av̄o, tsilawa tsendre hari mwa yimikaɓala ya Siriya na Silisiya. 22Na v̄av̄o tsakojulihana sura na ziDjama Ndziwaminifu za Yudeya zilio ha Kristi. 23Ɓadi waka wakia tu amba: «Mutru ule akoritresa hale hule, av̄asa asuĩdhia uaminifu ule akotsaha auangamidze.» 24Na wao wakomutukuza Mungu ha siɓaɓu ya wami.

Currently Selected:

MAGALATWIYA 1: swb

Highlight

Copy