MAKOLOSIYA 3

Muendreleo muv̄ia hari mwa uv̄umoja na Insa

1Ɓasi ɓaanda mwaregezewa hayi v̄umoja na Kristi, namutsahe trongo za shi uju, v̄ahanu Kristi aketsi humeni ha Mungu. 2Namufikiri izo zilio uju, ɓadi tsi zilio shiv̄andreju mwa tsi. 3Mana wanyu mufu, na uhayati wanyu utsitsiha v̄umoja na Kristi ha Mungu. 4Wakati Kristi alio uhayati wanyu atsov̄enuhao, v̄av̄o wanyu wajau mutsov̄enuha v̄umoja na waye hari mwa utukufu.

5Ɓasi namuule zitrongo za itaɓia ya shiduniani mulionayo, mauri: uzani, utshafi, taɓia za shahawa, ngushauku mbovu na uv̄endza-upara, ilio sawa na uãɓudu masanamwe. 6Ɗe ha siɓaɓu ya izo ɗe ihadhaɓu ya Mungu ijiliao wao kawasumutuĩ. 7Yao ɗe maendreleo mwakanayo nyuma hule, wakati mwakoẽshi hari mwa trongo zile. 8Ɓadi av̄asa, wanyu wajau, namulatse piya zini: hasera, utukifu, upeu, uruhana, na marongozi maovu yalawao hanyoni. 9Musulaɓane wanyu na wanyu, rangu mwadzitsua utru wa hale na zitrendro zawo, 10mwadzipindrisa utru muv̄ia ulio amba usendra na ufanyiha muv̄ia hari mwa ujuzi ulinganao na umufano wa Uwo auumba. 11V̄anu kav̄u Mugiriki ɓila Muyahudi, mutahiriwa|utahiri au katahiriwa, mushendzi ɓila mumatsaha#3:11 mumatsaha: iShigiriki v̄anu isurongoa Muskiteni. Wao watru wakoketsi kiɓulani mwa iƁahari Ndziɗu, amwesa wakoonehana amba wao wa kweli watru wa shi hale, watru walio ha kweli shidzani., murumwa ɓila munafasina, ɓadi Kristi ɗe alio piya, tsena ha piya.

12Ɓasi v̄av̄o wanyu mwatsahulwa na Mungu, amba watwaharifu amma wav̄endzewa, namudzipindrise mo wa poreho, uwema, uwekevu, umakini, na suɓira. 13Namustahamiliane wanyu na wanyu, tsena muswamihiane, neka amba v̄wa aliona trongo kinyume na munyahe. Mauri ɗe iheli Mola amuswamihini, namufanye namuna iyo wajau. 14Na iɓole zaidi ya piya trongo izo, ɗe wanyu udzipindrisa iuv̄endza, ilio ɗe umutsanganiso mukamilifu.

15Utrulivu wa Kristi ulio amba muhiriwa mukanewo ile mufanyihe mwili moja, nautawale rohoni hanyu. Namuke wendza himida. 16V̄av̄o urongozi wa Kristi nauke moni hanyu ha piya utadjirifu wawo; namusomedzane na ufahamishana ha piya zihikima. Namuhedze madjimbo, ngutende za sifa, na himbo za shiRoho. Namumuhimbiye Mungu v̄umoja na himida ha piya umo wanyu. 17Yotsi mufanyao, neka ha marongozi au shitrendro, namuifanye ha lidzina la Raɓi Insa, na ha ndzia yahe, mumushukuriye Mungu amma Ɓaɓa.

Maendreleo moni mwa zingudjama ziaminio

18Watruwashe, namudzihetsi watuĩvu ha waume wanyu, mauri ɗe inamuna yalazimu hari mwa uv̄umoja na Raɓi.

19Watruwaume, kula mutru nav̄endze mutrumushe wahe, wala mwasuke wahali na wao.

20Wanyu wana, namutuĩ wadzaɗe wanyu hari mwa piya, mana iyo umujiv̄ia Raɓi.

21Wanyu v̄anyu maɓaɓa, musutukize wana wanyu, pare wasuje wapuha ɓari.

Yahusu warumwa na warumisa

22Wanyu warumwa, namutuĩ warumisa wa shiulemenguni wanyu hari mwa piya, tsi tu amba matsoni hawo mauri musutsaha mujiv̄idze wanadamu, ɓadi ha umo warahara, na ha umuria Raɓi. 23Yotsi mufanyao, namuifanye ha piya umo wanyu, mauri musumufanyiayo Raɓi, ɓadi tsi wanadamu, 24ha wanyu ujua amba mutsopara ha Mola umwaratha ha zithawaɓu zanyu. Raɓi Kristi ɗe mumurumishiao. 25Mana monyewe udhulumu, atsoliv̄wa ha udhuluma wahe; kav̄usi utsahulivu.

Currently Selected:

MAKOLOSIYA 3: swb

Highlight

Copy