2 TIMUTAUSU 4

1Nisuhurayi mbeli za Mungu na mbeli za Kristi-Insa atsohukumuo wao walio hayi na wao wafa, tsena ha siɓaɓu ya umuv̄enulio wahe na utawalizi wahe, amba: 2judza Urongozi, parilia kula wakati, neka mwema au tsi mwema. Fundra na urudi watru, tria ɓari na usomedza v̄umoja na suɓira ndzikamilifu. 3Mana v̄utsoja wakati amba watru kawatsostahamili uvulishia musomo mwema. Ɓadi ha ushauku wa ukia izo ziwawao makio yawo, watsodziparia wengi wa mafundi. 4Watsoɓuzudza makio yawo yasukiye ikweli, wadzizingise hari mwa mahadisi maruv̄u. 5Ɓadi wawe, kana fahamu laho hari mwa piya zitrongo, stahamili yamaondo, fanya ihazi ya mutrangizi wa iHaɓari Ndjema, tsimidza ha ukamilifu urumishi waho.

6Na wami v̄angu, damu yangu isujotsomolwa amba kafara, na wakati wa ulawa wangu uwaswili. 7Tsiwana ikondro ndjema, tsimalidza umwendro, tsisiki uaminifu. 8Rangu v̄anu tsihetsiwa ihishima ya muhakisho mbeli za Mungu. Raɓi, hakimu wa haki, atsoniv̄ayo iSuku iyo; wala tsi wami tu, ɓadi wajau na piya wao wakolindra v̄umoja na huɓa muv̄enulio wahe.

Haɓari zamuhusu Ɓaulusu

9Fanya haraka unijiliye. 10Mana Demasu anipuka ha uv̄endza wa lidunia la leo, andre Tesalonika. Kresensi andre Galatwiya, na Titusa waye Dalmatiya. 11Lukasi weke ɗe alio na wami. Murenge Markusi, umuv̄inge v̄umoja na wawe, mana waye unifayi ha kusudi hari mwa ihazi. 12Tsimuv̄eleha Tihikusa Efeso. 13Wamoja, v̄inga inguo ya ɓaridi nailisha Troasi ha Karpusu, na zizio, hususwani zile zilio ha ngwezi.

14Mufua-zuma Alisandrusa anirendre mbovu ha uwengi; Mola ɗe atsomuliv̄ao na izo azirendra. 15Dzifahamishe na waye wawe wajau, mana ahimi kinyume ha kusudi na marongozi yatru.

16Udziwanilia yangu mara ya handra, kav̄u ata mutru aka ɓavu moja na wami; piya wanipuka. Mungu asuwahasiɓiye kosa lilo. 17Ɓadi Raɓi ɗe aka na wami, anihodarisha ile pare ha wami, umutekelezio wa iHaɓari ufanyishihe ha ukamilifu, tsena ukilihwane na piya zinishani kazimuji Mungu. Ɓasi tsikombolwa na ihanyo ya simba. 18Raɓi atsonikomboa na kula shitrendrwa mbovu, tsena atsonihuyi ile ningiye ha usalama salimina hari mwa Utawalizi wahe pev̄oni. Utukufu naumuendreleye ha daima. Amina.

19Nisalimiye Priskila na Akila, na umuraɓa wa Onesiforu. 20Erastusa aɓaki Korintiyo, tsena Trofimusu, tsimulishi muwaɗe ɗagoni Miletu. 21Fanya djitihadi uje kaɓula ya uwakati wa ɓaridi. Eɓulusu, Ɓudensu, Linusa, Klodiya, v̄umoja na piya wananya wa shi uaminifu wasuhusalimu.

22Raɓi nake v̄umoja na iroho yaho. Urehema naumuendreleyeni.

Currently Selected:

2 TIMUTAUSU 4: swb

Highlight

Copy