Ɛseta 2
2
Ɛseta jigi ka-pɛ
1Ko na wora ko wora to, Pɛ Zeregese bane ma to. O laam ma yɔɔre o boŋe Vasiti na ke tei, dedaane ni delo o na pɛ we, o daa yé taa ye ka-pɛ to. 2Pɛ wom nakwa balo na me ded‑o to ma bwɛ ded‑o ba we, “Nmo ná pɛ chwoŋa, dé wó pa se ba beeri bukɔ-pwoli selo na lana ye ba yeiri baara to. 3Kuri dedɛɛra n paare dim laŋa kam jei maama ne, se n pa-ba ni we ba ja bukɔ-pwoli sento ba ba Susa ne ywo-seeni. Ba maa wó pa se bukwa bam konto zo pɛ sɔŋɔ di selo ba na jege pɛ kaana ŋwaane to, se ba maŋe da. Nmo dedɛɛro Hegayi wolo na nii n kaana to#2:3, 14 dedɛɛro: Ba déem lwe dedɛɛro wom konto. wó taa nii-ba, ye o pa se ba kwei terale nuga ba kwɛ-ba se ba taa lana. 4Nmo laam ma‑n wó nii bukɔ-laaro tem konto wone, n le wolo na tiini o su n yi to se o ji ka-pɛ o leiri Vasiti yuu ne.”
Pɛ wom na maane we boboŋe dem lana to, o ma sɛ-de.
5Juu tu dedoa de déem tɔge o zoore Susa dam jei sem ne. O yere ye Modekayi mo. O maa ye Jayira bu, ye o nwoŋi Benjamin dwi dem wone. Kisi dedaane Simeyi de déem ye o nabaara mo. 6Maŋa kalo Babilon teo pɛ Nebukadeneza déem na di Judah teo pɛ Jehoyachin,#2:6 Jehoyachin: Hiburu = Jekonia ye o chwooli o de o nɔɔna o le Jerusalem ne o ja vo o tete teo to, Modekayi de déem tɔge o wo ba wone mo.#2 Pwa 24:10-16 7O nam ya jege o choro yere na ye Ɛseta. Wonto Hiburu yere déem ye Hadasa mo. O nam ya ye bukɔ-pwola kalo na lana chekke to mo, ye o ya-tega de lana. Ɛseta kwo de o nu déem na tege to, mo Modekayi lɛɛre o kwei‑o o ji o tete bukɔ, o jege‑o o kɔna.
8Pɛ wom ni-doore dem ŋwaane, ba déem ma ja bukwa dedɛ ba vo Susa dam jei sem, ye Ɛseta de déem wo ba wone. Ba déem kwei o de ba ke pɛ sɔŋɔ di selo wone Hegayi na nii ba maama baŋa ne to mo. 9Ɛseta kikia ma su Hegayi yi, pa o lage o ni taane. Hegayi ma pa se ba taa mae nuga ba turi Ɛseta yera, ye o daare o pa‑o wodi-laao se o di. Hegayi ta kwei‑o o ke sɔ-fɔrɔ kom mɛ na jege zula chekke to ne mo, ye o daare o kuri pɛ sɔŋɔ ka-nyaana barepɛ se ba taa nii o baŋa ne.
10Modekayi nam ya maŋe o ta de Ɛseta se o yé pa nɔɔn-nɔɔno lɔre we o ye Juu tu, naa ba lɔre o na nwoŋi sɔŋɔ kolo wone to. 11Dɛ maama wone, Modekayi déem yeini o kare pɛ kaana di sem konkɔlɔ ni ne mo o kekara. O nam ke konto se o taa yei ko na ye tei Ɛseta yera ne to, dedaane kolo na wó yi‑o to mo.
12Bukwa bam lam kwɛɛm yeini de kwei bene mo. Ba mae Mura nuga mo ba wei ba yera yam chane seredo, se ba daa kwei terale nuga ba turi-ba chane seredo. Konto kwaga ne, ba laam wó ja ka-bwona bam mo dedoa dedoa ba zo Pɛ Zeregese tei. 13Ka-bwom wolo ná ye se o nwoŋi kaana bam di sem ne o vo pɛ tete diga kam, kotu wó wane o taa zoore gwaaro telo maama o na lage to. 14Ba nam jege se ba ja ka-bwom wom konto ba vo ba zo pɛ tei mo dedaan-ni maŋa ne. Tega maa ná poore, ba wó ja‑o ba daa vo di sedwonna sem mɛ pɛ kaana badwonna bam na zoore da to mo. Saasegaza nam mo ye dedɛɛro wolo na nii pɛ ka-bi sem konto to. Pɛ wom ná wo mɛ ka-bwom wolo yere o jwoori o bwoŋi‑o, ko bere we o yi wo su kotu. O maa daa bá jwoori pɛ tei.
15Ko ma yi se Abihali bukɔ Ɛseta de zo pɛ wom tei. Wonto ye Modekayi choro mo, ye Modekayi ya kwei‑o o ji o tete bukɔ. Nɔɔna maama maa lage Ɛseta ni taane. Ɛseta na lage o zo pɛ wom tei to, o zo gwaaro telo yerane pɛ dedɛɛro Hegayi na bere‑o se o zo to mo. O wo kwei kolokolo o woli da. 16Ko ye Zeregese paare dim bena yarepɛ bene dem wone chane fuga kam ne, mo ba déem jaane Ɛseta ba zo pɛ-sɔŋɔ kom ne se o zo Pɛ Zeregese tei. Chana kam konto yere ye ‘Tebefa’ chana mo. 17Pɛ wom boboŋa maa tɔge Ɛseta se ko dwoni ka-bwona babam bam de o kaana bam maama. Ɛseta keim de ma su pɛ wom yi, ye pɛ wom ke‑o zaane. O ma kwei ka-pɛ yipuga kam mo o pu o yuu ne, se o taa ye ka-pɛ o leiri Vasiti yuu ne. 18Ko kwaga ne mo pɛ wom dɛ Ɛseta ŋwaane o ke kuri-fɔrɔ. O ma bwoŋi o teo nakwa, de o dedɛɛra maama se ba jeeri ba di kuri dem. O ta ma pa ni we de dɛ dem ye kuri siu dɛ mo, ye o daare o kwei pɛɛra na maŋe de pɛ to o pa o nɔɔna bam.
Modekayi chege pɛ wom toone
19Ka-bwona bam daa na jeeri daane to, dedaane Modekayi yeini o jei pɛ-sɔŋɔ ni ne o toŋe o pa pɛ wom mo. 20Ko daare, Ɛseta wo pɛ se nɔɔn-nɔɔno lɔre sɔŋɔ kolo o na nwoŋi to naa ba lɔre we o ye Juu tu, ne Modekayi na maŋe o bere‑o se o seigi o dwi dem tei to mo. O na sɛ o ni dem konto to tɔge o déem na maŋe o ke tei ye Modekayi kɔne‑o to mo.
21Modekayi déem na wo pɛ sɔŋɔ kom ni ne o toŋe o totoŋa to, mo dɛ dedwe Bigetana, de Terese bwɛ se ba go pɛ wom, ba na done‑o to ŋwaane. Ba maa ye pɛ sɔŋɔ dedɛɛra balo na yere o di sem to mo. 22Modekayi ma ni ko ŋwa ye o vo o ta de Ɛseta. Wonto de ma pa se pɛ wom lɔre Modekayi na tage kolo o bere‑o to. 23Ba ma toŋe nɔɔna se ba yɛ taane dem wone ye ba daare ba maane we ko ye chega mo. Ba ma kuuni nɔɔna balei bam konto de ŋone ba go. Pɛ wom ma pa se ba popone keina yam konto ba tiŋi ba teo pwa yera seina twanno tem wone.
Currently Selected:
Ɛseta 2: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)