Hebreos 1
1
Dios techonnotza ica niConetzin
1Ya uehcau, Dios micpa uan tlatlamantli oquinnotz in toyauehcautahuan ica nintlahtol in teotlanauatanih.
2Pero axan, itich niyacatlamilis in tonalmeh, Dios techonnotza ica niConetzin, naquin ocaxcatih nochi, uan naquin ica Yehuatzin oquichiu nochi tlen cah.
3Itich Yehuatzin niConetzin monextia quen tlailiuis mouisticatzintli Dios, uan itich monextia yec quen ameh Dios. Uan nochi tlen cah, niConetzin icchicautoc ica in chicaualis tlen icpia nitlahtoltzin. [Ica nimiquilitzin] otechonchipau den totlahtlacol, uan omotlalihtzinoh iyecmapantzinco in Dios Ueyihcatzintli ompa iluicac campa motlanauatilia Dios.
Jesucristo ocachi ueyihcatzintli uan amo in iluicactlatitlanten
4Uan ohcon niConetzin ocachi tlapanauihtoc uan amo in iluicactlatitlanten, nic ocaxcatihqueh se toocaatl tlen ocachi tlapanauihtoc uan amo yehuan.
5Pues Dios amo queman oquiluih se iluicactlatitlantli:
Touatzin tonnoconeu,
neh axan inmitzontiquiuahcatlalia.#0.0 Sal. 2:7
Dion amo queman oquihtoh de se iluicactlatitlantli:
Neh nisqui nipapan,
uan yeh isqui noconeu.#0.0 2 S. 7:14; 1 Cr. 17:13
6Uan noiuqui ihcuac Dios oconteixmatiltih nisintiConetzin nican tlalticpac, ocmihtaluih:
Ixtlacachiuacan Yehuatzin, nochtin iiluicactlatitlancauan Dios.
7Uan den iluicactlatitlanten ihquin ictoua:
Yehuatzin quinchiua niiluicactlatitlancauan quemeh in ehecatl,
nitiquitcauan quinchiua queh tlitl tlen mocuicuitoc.#0.0 Sal. 104:4
8Pero de niConetzin conmihtaluia:
Tonmotlanauatilia, Tehuatzin Dios, ica in sintitl nochipa;
campa Tehuatzin tonmotlanauatilia cah yec tlanauatilis.
9Itcontlasohtla in yecchiualistli
uan itconcocolia in tlen amo cuali chiualis,
ica non Dios, naquin moDios,
omitzonpihpin tonueyitiquiuahtlayacanqui
uan moyolo contemitia ica paquilis
ocachi uan amo nocsiquin naquin mouantzin cateh.#0.0 Sal. 45:6-7
10Noiuqui conmihtaluia:
Tehuatzin toTecotzin, ipeuyan nochi, otcomochiuilihtzinoh in tlalticpactli,
uan in iluicac ica momatzitzin otcomochiuilihtzinoh.
11Nochi nin yacatlamis, masqui ohcon, Tehuatzin nochipa tonmetztias.
Nochi non ihsoliutas quemeh se tlaquemitl.
12Uan itcontotolonos quemeh se tlaquemitl,
uan itquimonpatlas.
Masqui ohcon Tehuatzin ayic mopatla mochiualitzin,
uan moyolilitzin ayic yacatlamis.#0.0 Sal. 102:25-27
13Dios amo queman oquiluih se iluicactlatitlantli:
Xonmotlalihtzino noyecmapan,
uan inquintlalis itlampa mocxitzitzin aquihqueh mitzoncocoliah.#0.0 Sal. 110:1
14Pues tlamilauca, nochtin in iluicactlatitlanten yeh espíritus itlamatlancauan Dios, tlatitlanten maquinmatlanican naquin imaxcatis in temaquixtilis.
Currently Selected:
Hebreos 1: nhi
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.