Romans 2
2
Sema Koston Pengowis Afo Chiyos Na Tothoo
1Angken siya kayon kakajem ko, nakiyowis joy echom no ngaaw i naimag cha, nem si-kayon mismo, nagwariy pangbal jo tep inges toy naimag jo. Et no kowisen jo ira, jowan kowisay angel jo ngo. 2Amta thayo i kosto no chosaen Afo Chiyos i naengamag iren man. 3Isonga, kakajem ko, no kowisen jo ira iy a-magen jo ngo i inges to man, kamali yo ngo nowan no konen jod nemnem jo i bebtihan joy chosen Afo Chiyos. 4Nadinisjon joy kaasi tan kaanos Afo Chiyos tep eg jo egwathan i nakiyaasian to kayon Afo Chiyos say gwariy gwaya jon manbabawi na basol jo. 5Nem kagol na kaingel jo tan eg jo piyan a manbabawi, jowan ma-maay chosen da-kamen jo no akow na pengibiybiy Afo Chiyos na bonget tod mabesol tan pesi-neng toy koston kowis tod tothoo. 6Tep sema kongkonen i-kan Afo Chiyos cha emiin a tothoo, maybagay chiwa imag cha. 7Sema iren echom a too, naiyan-ano-anos iren mengemag na mapteng say apolbaran iren Afo Chiyos tan say gwariy biyag chen nat maomas. I-kan Afo Chiyos cha si-kariy biyag a nagwariy pengingkaan to. 8Nem sema iren echom, naindagwas chiy piyan cha tan nabidaw chen onoran i podno, no diket naiyonoran chiy ngaaw. Da-kaman chiy banay a bonget Afo Chiyos tan chosa thon enbel-at. 9Emiin a naengamag na ngaaw, da-kaman chiy banay a sahit tan pandigat--pilmiro sema iren Hodjos et sema ira wen Gentiles. 10Nem emiin iren naengamag na mapteng, da-kaman chiy talna tan apolbar Afo Chiyos--pilmiro sema iren Hodjos et sema ira wen Gentiles. 11Tep nagwariy toon idasin Afo Chiyos no kowisen to ira.
12Tep emiin a naiyanbasol, mechosa ira. Sema iren Gentiles, eg cha amtiy dinteg Moses, isonga nat osalen Afo Chiyos a kowisen to ira, nem maysi-jan pay ired si-katho na ingked ingka tep iyanbasol ira. #2:12 Sema dinteg Moses i sa-kin ngaran na dinteg Afo Chiyos. Sema iren Hodjos, amta riy dinteg Moses, isonga osalen Afo Chiyos iwa dinteg a kowisen to ira. 13Tep sema ibilang Afo Chiyos a maronong, nat sema naiyanki-ngel bengat na dinteg Moses, no diket sema naemati. 14Nem angken sema iren Gentiles a eg cha amtiy dinteg Moses, naiyonoran chiy echom a bili-bilin tep amta ra i mapteng a ma-mag. Isonga, singen gwariy dinteg met laeng cha nemnem cha. 15Nainpabiybiy ched naimag chen iyaykamid ira ma bili-bilin na dinteg cha nemnem cha. Sema konsinsiya ra ngo, napiyaneknekan to i podno jay, tan cha nemnem cha, amta ra no ngaaw ono mapteng i naimag cha. 16Sema mapteng a chamag a nainkasabak, kigwan to i inges to man no akow a pekowis Afo Chiyos cha Cristo Jesus a emiin i aramid tan nemnem na tothoo, pati sema iren eg aamtaan.
Sema Iren Hodjos Tan Sema Dinteg
17Si-kayon echom kon Hodjos, nakigwan jo i si-kayoy tothoon pinispis Afo Chiyos. Napiniyal joy pengonod jod dinteg Afo Chiyos a mengisalakan cha si-kayo. Nainki-tek jo pay i amta yoy podnon Afo Chiyos. 18Amta yoy piyan Afo Chiyos a a-magen jo, tan mathekal kayon memispis na mas koskoston pesing jo tep iyachal joy dinteg. 19Sigorado kayon si-kayo ira ma mantoro na echom maypangkep Afo Chiyos. Cha nemnem jo, singen si-kayo ira ma mengibalnay na ekorab tan menidow iren ma gwared enbolinget. 20Singen si-kayo ira ma memidin na egwenggweng tan mantoro na toon inges toy nganga-nga tep eg ira etoroan maypangkep Afo Chiyos. Nakigwan jo tan tep amta yoy dinteg Afo Chiyos a kawad-an na emiin a pengamta tan emiin a podno. 21Si-kayon naiyantoro na echom, apay nga eg jo toroan i angel jo? Nainbilin jo i “Enog i kibot,” nem naengibot kayo met laeng. 22Nakigwan jo pay i “Enog i charog na nat imbaliy mo,” nem naenarog kayo na nat imbaliy jo met laeng. Enbala-balaw jo ira ma naechayaw a nat koston Afo Chiyos, nem nasingkep joy timplo ra say kibothen joy gwared man. 23Nainki-tek jo i gwared si-kayoy dinteg Afo Chiyos, nem nainbaing jos Afo Chiyos no chechalen jo ma dinteg to. 24Tep iyaysolat cha esel Afo Chiyos i “Say Gentiles ira, ngaaw i nakigwan cha maypangkep na ngaran Afo Chiyos kagol cha si-kayon Hodjos.” #2:24 Isaiah 52:5
25Sema pankogit jo, gwara nowan i panmaptengan to no onoran joy dinteg Afo Chiyos, nem no eg jo onoran, say kogit jo, nagwariy panmaptengan to tep nat egwathen to kayon Afo Chiyos. #2:25 Binidin Afo Chiyos i Hodjos a mekogit iren sinjal na pinispis ton tothoo to. (Naebased Genesis 17.) Sema ngo iren Gentiles, eg cha iyonoran i ogadi na pankogit. 26Sema iren Gentiles ngo, angken eg ira ekogit, no onoran chiy dinteg Afo Chiyos, egwathen iren Afo Chiyos a singen ekogit met laeng ira. 27Et si-kayon Hodjos, ibasolan cha kayo na Gentiles. Tep angken gwared si-kayoy dinteg Afo Chiyos a iyaysolat tan ekogit kayo, nachichal jo ma dinteg iy say sema iren Gentiles, naiyonoran chiy dinteg angken nat ekogit ira. 28Tep sema podnon Hodjo, nat sema toon inges toy Hodjod kasi-neng tan ogadi tho. Tan sema podnon kogit, nat sema aamag cha angel. 29No diket sema podnon Hodjo, sema toon naiyaypo-tok i nemnem tod kosto. Tan sema podnon kogit, sema pemado na nemnem na toon sema obda na Ispirito Santo, nat sema dinteg a iyaysolat. Sejay a too, angken nat chejawen na too, chejawen met laeng Afo Chiyos.
Currently Selected:
Romans 2: KAR
Highlight
Copy
Compare
Share
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.