Acts 26
26
Iyan-esel Si Paul Cha Sangoanan Ari Agrippa
1Et kigwan Ari Agrippa cha Paul i “Mebedin a man-a-sel ka niman say songbathan moy maypangkep na engicharoman ched si-kam.” Isonga, iyanchingjas si Paul cha tothoon man-a-sel a kigwan to i 2“Afo Ari Agrippa, salamat a si-kam i mengiki-ngel na songbat ko niman maypangkep na engicharoman iren ma Hodjos cha si-kak. 3Tep amtam a emiin i ogadi thayon Hodjos tan sema iren naiyansongbathan tayo. Isonga, pangaasim a man-anos a mengi-ngel na konen ko.
4“Sema emiin a Hodjos, amta riy nainpasing kon iyanbiyag manipod na kanga-ngak. Amta ra i nainpasing kon iyanbiyag cha iyay-anahan ko tan cha Jerusalem. 5Ebayag a iyamta ra i ekika-chomak cha Pharisees a nagwariy kay-ingesan cha pengonod na inpasing tayon Hodjos a manchejaw cha Afo Chiyos. Mebedin a paneknekan cha i podnoy kowan kona no piyan cha. 6Et niman man-ak-akgwathak chiyay say mekowisak kagol na sigoradon namnamak a tongpalen Afo Chiyos i kari thod afo-afo thayo len panpawil toy iyangketiy. 7Et setan ngoy namnama iren ma emiin a Hodjos a nainpasnek chen manchayaw cha Afo Chiyos na gwiya-gwa-gwa tan diyagwi-dagwi. Afo Ari, kagol niya namnamen sema iren Hodjos, chiyan pabasoliak. 8Si-kayon manki-ki-ngel, niyana edigat a patien jo i panpawil Afo Chiyos i iyangketiy?
9“Si-kak ngo nontan, kin ko i ipahat ko komiy kabaalan kon mengontra ired ma naematid Jesus a i-Nazareth. 10Et seman i imag kod Jerusalem. Chakel i ematid Jesus a inpakalebos ko babaen na karebengan kon in-i-kan na aafo na papari. Et idi kiyowis cha ira ma emati a kigwan cha i pathiy i chosa ra, intolok kod si-kara. 11Eminchakel a kimowanak cha synagog a naiyanchayawan iren ma emati say chosaen ko ira et say ipilit kon bebnekan chiy pamati red Jesus. Kagol na epaladon bonget ko ired ma emati, ina-inap ko ira angken cha echom a ili-ili say pedigathan ko ira.
12“Setan i kagol na iyanbiyahian kod Damascus a engegchi na solat a in-i-kan na aafo na paparid si-kak. Kigwan tod ma solat i gwariy karebengan kon mengikalebos ira na ematid Jesus. 13Et Afo Ari, idi gwara kawid kalsara na alas dosi, gwariy sini-neng kon nihal a edafo did dangit a mas onsila iy say akow. Sinilowan to kawin echom kon ekibiyahid si-kak. 14Et idi iya-kas kawi wen emiin cha pithek, gwariy inki-ngelan kon esel a kigwan tod ma esel na Hebrews i ‘Saul, Saul, niyana mowan padigathiak? Angel mo ngoy mowan padigathid pengontram cha si-kak.’ 15Et insongbat ko i ‘Afo, siya ka aya?’ Et kigwan na Afo i ‘Si-kak si Jesus a mowan padigathi. 16Akgwat ka wa tep sema kagol a iyanparangan kod si-kam, pinispis tahen manbalin na bagaen ko. Ipaamtam cha tothoo i sini-neng mo niman maypangkep cha si-kak tan sema ibiybiy kod si-kam no sa-ki din akow. 17Sa-dinan taha ired ma Hodjos tan Gentiles a pengito-noan kod si-kam. 18Kowan ito-no ka say sema korab cha maypangkep cha si-kak, ma-kal et say bebnekan chiy ngaaw, et say mesilowan ngoy nemnem cha. Et no bebnekan chiy pantorayan Satanas cha si-kara et sangoen ches Afo Chiyos babaen na pamati red si-kak, mepekawanan i basol cha, et mayka-chom ired ma pinispis Afo Chiyos a tothoo tho.’
19“Isonga Ari Agrippa, piyatik inpaamten Jesus cha si-kak babaen na singen kokip a edafo did dangit. 20Iyankasabaak nin cha tothood Damascus tan cha Jerusalem tan cha intiro ngon sahop na Judea, tan iyankasabaak ngod Gentiles. Sema kigwan kod si-karen emiin, mesepol a manbabawi ira na basol cha et sangoen ches Afo Chiyos. Kigwan ko ngod si-kara i mengemag koma ira na mapteng say ibiybiy chen agpayson iyanbabawi ira. 21Kagol a nainkasabak ira man, chinmet chaak na Hodjos cha timplo et inparas chen bonoen chaak. 22Nem intoloy Afo Chiyos a tiyolongan toak ingkathod niman. Isonga man-ak-akgwathak chiyay a ipaamtak si Jesus cha si-kayon emiin, pati iyangkekayang tan iyangkebaba. Sema nainpaamtak, agpayson inges toy kigwan Moses tan sema iren profita i mepesamak. 23Tep inpadto ra i mesepol a mandigat si Cristo et metiy. Et si-kathoy mengidagwas a manpawil say silowan toy nemnem na Hodjos tan Gentiles et say amtaen chen maysalakan.”
24Idi kigwan men Paul iwan, inpekes Festus i esel ton kigwan to i “Paul, ebang-ag ka! Sema iren chakel a iyachal mo, inpabang-ag toka.” 25Nem insongbat Paul i “Afo Festus, si-kam a epateg, nat ebang-agak, no diket sema emiin a kowan kona, ainposoan tan podno. 26Iyamtaan Ari Agrippa ira jay, isonga mahaeselak a inges to jay cha si-katho. Tep sigoradoak a iyamtaan to ira jay maypangkep Jesus tep naechamag. 27Ari Agrippa, napiyatim i kigwan iren ma profita? Amtak i napiyatim.” 28Et insongbat Agrippa i “Kin mo aya i panbalin moak a chakos na Kristiyano?” 29Et kigwan ngon Paul i “Sema ikararag kod Afo Chiyos, angken mageno ono mebejag, si-kam tan emiin a manki-ki-ngel cha si-kak niman a akow, memati kayod Jesus say ingesen joak, malaksid a nat mekadinaan kayo.”
30Et sema ari, gobirnador, si Bernice, tan echom a ekitokkong cha si-kara, imakgwat ira, 31et idi bimetik ira, iyantabtabal iren kigwan cha i “Sema too, nagwariy imag ton iyaybagay cha kaykalebosan to ono ketiy to.” 32Et kigwan Agrippa cha Festus i “No nat inbagen ma too i si Caesar i mengowis cha si-katho, mebedin a megwayaan.”
Currently Selected:
Acts 26: KAR
Highlight
Copy
Compare
Share
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.