Números 1
1
Censo yu'un Israel ta wits Sinaí
1Te sba c'aalil yu'un xchebal u, te xchebal ja'wil c'alal c'axemix jtebuc ta jun ja'wil sloq'uel tel ta Egipto a te israeletic, te Cajwaltic jich la yalbey Moisés ta jochol taquin q'uinal ta Sinaí ta Nailpac' te bay ya yich' c'oponel, jich la yal:
2—Ac'a ta censo#Nm 26.1-51. spisil te israeletic ta chajbalchajp sts'umbal soc ta chajbalchajp snaic, swenta yu'un ya me xna'baj sbiilic soc yajtalul ta lec spisil te winiquetic 3te ayic ta jtab ja'wil bael te ya xju'ix yu'unic guerra. Najc'anbeya te sbiilic ta jun swenta soldado. Ja' me ya scoltayat te Aarón soc 4juju-jtul jtsobwanej yu'un ta chajbalchajp sts'umbal Israel. 5Ja' lista sbiilic te jtsobwanejetic te ya scoltayexe:
“Ta swenta sts'umbal Rubén: ja' te Elisur snich'an Sedeur.
6“Ta swenta sts'umbal Simeón: ja' te Selumiel snich'an Zurisadai.
7“Ta swenta sts'umbal Judá: ja' te Naasón snich'an Aminadab.
8“Ta swenta sts'umbal Isacar: ja' te Natanael snich'an Zuar.
9“Ta swenta sts'umbal Zabulón: ja' te Eliab snich'an Helón.
10“Ta swenta sts'umbal José: ja' te Elisama snich'an Amiud ta swenta sts'umbal Efraín; soc Gamaliel snich'an Pedasur ta swenta sts'umbal Manasés.
11“Ta swenta sts'umbal Benjamín: ja' te Abidán snich'an Gedeoni.
12“Ta swenta sts'umbal Dan: ja' te Ahiezer snich'an Amisadai.
13“Ta swenta sts'umbal Aser: ja' te Pagiel snich'an Ocrán.
14“Ta swenta sts'umbal Gad: ja' te Eliasaf snich'an Reuel.
15“Ta swenta sts'umbal Neftalí: ja' te Ahira snich'an Enán —xi' te Cajwaltique.
16Ja'ic jtsobwanejetic yu'un chajbalchajp te tsabilic ta yolilic te israeletic. 17-18Ta sba c'aal te xchebal u yu'un te ja'wile, te Moisés soc Aarón la stsobic te winiquetic te ac'biliquix yat'elic yu'un te Diose. Jich la yaq'uic ta censo spisil lum, ta spisilic te israeletic ta swenta chajbalchajp sts'umbalic soc ta chajbalchajp snaic. Ja' la yich' ajtayel te winiquetic te ay jtab ja'wil bael, 19jich bit'il yaloj mandal Cajwaltic ta stojol Moisés. Ja' te censo la yich' pasel ta jochol taquin q'uinal ta Sinaí.
20-21C'alal pasbilix a te censo ta chajbalchajp sts'umbal soc ta chajbalchajp snaic, te ts'ibubilix sbiilic juju-jtul soc te yajtalul ta spisilic te jtab ja'wil baele, jich ayic:
Te sts'umbal Rubén te sba snich'an Israel, loc' yajtalul waqueb yoxwinic ta jmil soc jo'winic xcha'bajc' (46,500) winiquetic te ya xju'ix yu'unic guerra.
22-23Te sts'umbal Simeón, loc' balunlajuneb yoxwinic ta jmil soc jo'lajunwinic (59,300).
24-25Te sts'umbal Gad, loc' jo'eb yoxwinic ta jmil soc lajuneb yoxlajunwinic xcha'bajc' (45,650).
26-27Te sts'umbal Judá, loc' chanlajuneb xchanwinic ta jmil soc lajunwinic xcha'bajc' (74,600).
28-29Te sts'umbal Isacar, loc' chanlajuneb yoxwinic ta jmil soc jbajc' (54,400).
30-31Te sts'umbal Zabulón, loc' juclajuneb yoxwinic ta jmil soc jbajc' (57,400).
32-35Te mach'atic sts'umbal José, loc' cha'winic ta jmil soc jo'winic xcha'bajc' (40,500) sts'umbal Efraín; soc te sts'umbal Manasés loc' lajchayeb xcha'winic ta jmil soc lajunwinic (32,200).
36-37Te sts'umbal Benjamín, loc' jo'lajuneb xcha'winic ta jmil soc jbajc' (35,400).
38-39Te sts'umbal Dan, loc' cheb xchanwinic ta jmil soc jo'lajunwinic xcha'bajc' (62,700).
40-41Te sts'umbal Aser, loc' jun yoxwinic ta jmil soc jo'winic xcha'bajc' (41,500).
42-43Te sts'umbal Neftalí, loc' oxlajuneb yoxwinic ta jmil soc jbajc' (53,400).
44Ja' yajtalul te loc' te la spasic te Moisés, te Aarón soc te lajchaytul te la yich'ic tsael, ja' te jtsobwanejetic yu'un israeletic ta juju-jchajp sts'umbalic soc ta chajbalchajp snaic: 45Te israeletic te jtab ja'wil bael ya'wilalic te ya xju'ix yu'unic guerra, 46loc' oxeb sbuluchwinic xcha'bajc' ta jmil soc lajuneb swaxacwinic xcha'bajc' (603,550) ta spisil.
Ac'bot yat'el levitaetic
47Te levitaetic ma la yich'ic ajtayel soc chajbalchajp sts'umbalic te antiguo sme'-static, 48melel te Cajwaltic jich yalojbeyix a te Moisés:
49—C'alal ya awajtay te israeletic, ma x'atsac ta ajtayel te sts'umbal Leví. 50Te levitaetic ya me awac'bey swentainic abatinel ta ch'ul awilal yu'un trato. Ya me swentainic te bitic ay ta pasel ta xch'uunel Dios tey a, soc spisil bitic yu'un te ch'ul awilal. Ja'ic me ya yat'elinic sq'uechel bael te Nailpac' Templo soc spisil te sbiluquil, soc spisil te bitic ay ta tuuntesel tey a. Tey me ya xc'o yac' snailpaq'uic ta sjoyobal te ch'ul awilal. 51Te c'alal ya sq'uechic bael, ja'ic me ya spac'beyic spac'al, soc ja'ic me ya xcha'pasic xan te bay ya apas acampamentoique. Spisil te mach'atic jich nax ya xnoptsajic bael, ya me yil swocolic ta milel. 52Te yantic israeletic jun me yo'tanic ya yac' snailpaq'uic ta scampamento juju-jchajp, jich c'oemic te bit'il chajbalchajp soldadoetic ta yet'al te sbanderaique. 53Yan te levitaetic ja' me ya swentainic te ya yac' snailpaq'uic ta sjoyobal te ch'ul awilal yu'un trato, soc ya me scanantayic te ch'ul awilal, swenta yu'un ma me x'ilinon ta stojol te israeletique —xi' te Cajwaltique.
54Te israeletic jich la spasic spisil te bit'il nix yaloj mandal Cajwaltic ta stojol Moisés.
Currently Selected:
Números 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.