San Lucas 1
1
Te bi swentailuc la yich' pasel in jun to
1Ay bayal mach'atic la sts'ibuyiquix ta jun te bila c'oem ta pasel ta jwentatique. 2Jich nix te bit'il la yac'botic jnoptic te mach'atic la yil ta sitic ta xjajch'ibal to tel soc te la yich' yat'elic ta xcholel ta bayuc te bila c'ot ta pasele. 3Jich yu'un te jo'one, Teófilo,#Hch 1.1. te buen lecate, ya me jts'ibubat awil spisil te bila xmelmon c'ot ta pasel, melel la jojc'oix xan ta lec te bit'il ay tel te xjajch'ibale. 4Jich me ya ana' stojol a te smelelil te bila ac'bilat anope.
La yal te ch'ul abat te ya x'ayin te Juan J'ac'-ich'ja'e
5Te c'alal ochem ta muc' ajwalil ta bay sq'uinal Judea te Herodese, ay jtul sacerdote te Zacarías sbiile te ay ta jtijc' sacerdoteetic te yich'ojbeyic sbiil te Abiase.#1 Cr 24.10. Te yinam te Zacariase, Elisabet sbiil, ja' sts'umbal uuc te namey q'uinal sacerdote Aarone. 6Ta xchebalic lec yat'elic ta stojol te Diose, soc xch'uunejbeyic spisil smandal te Cajwaltique. Ma xwejt' ta leel te smulique. 7Ja'uc me to, ma'yuc yal-snich'anic, yu'un stalel ma x'alaj te Elisabete. Soc me'el-mamalix ta xchebalic.
8Jich c'ot ta pasel te c'alal ja' talemic ta abatinel ta stojol Dios ta bay templo soc sjo'tac ta sacerdoteil a te Zacariase. 9Jich te bit'il ay ta spasel yu'unic la yich' tsael ta numeroetic te sacerdote te ya x'och ta xchiq'uel pom ta bay yutil templo yu'un te Cajwaltique. Ja' c'ot ta swenta Zacarías. 10C'alal yac ta xchiq'uel te pome, spisil lum yacalic ta sc'oponel Dios ta bay yamac'ul te temploe. 11Chicnaj jtul ch'ul abat yu'un te Cajwaltic ta stojol te Zacariase. Teq'uel c'oel ta swa'el scajtijib xchic'jibal pom la yil. 12Te c'alal la yile, jajch' ta xiwel te Zacariase, soc nijc' yo'tan yu'un. 13Ja'uc me to, c'opoj te ch'ul abate:
—Zacarías, ma me xiwat. Melel la yaiybatix stojol te bit'il la ac'opon te Diose. Te awinam Elisabet ya me x'alaj. In te yale, Juan sbiil ya xc'ot awu'un. 14Ya me xbujts'naj awo'tan yu'un. Soc tsobol ta jtul ya xbujts'naj yo'tanic yu'un te c'alal ay to ta xch'ujt' a te sme'e. 15Yu'un muc' me ya xc'ot ta stojol te Diose. Xujt' ma xyuch' vino soc te yantic tulan uch'balile.#Nm 6.3. Nojelix ta yo'tan a te Ch'ul Espíritu te c'alal ya x'ayine. 16Ja' ta swenta te ay bayal alnich'anetic yu'un Israel te ya sujt'es yo'tanic ta stojol te Cajwaltic te Dios yu'unique. 17Ya me xneelaj ta yalel sc'oplal te Cajwaltique. Ja' me ya spajbey yo'tan soc yip yat'el te j'alwanej Eliase, swenta yu'un ya yac' junajuc yo'tanic te sme'-static ta stojol te alnich'anetique,#Mal 4.5-6. soc swenta yu'un ya me yac'bey snopic xch'uunel mandal te jc'axintayej-c'opetique. Jich me chapalix yo'tanic ta lec a te lume te ya yic' ta stojolic te Cajwaltique c'alal ya xtale —xi' te ch'ul abate.
18Te Zacarías la yalbey te ch'ul abate:
—¿Bit'il ya jna' stojol in to? Melel mamalonix soc me'elix te quiname —la yut.
19La yal te ch'ul abate:
—Jo'on Gabrielon#Dn 8.16; 9.21. te ayon ta abatinel yu'un te Diose. La sticunon tel ta atojol, yu'un tal calbat awaiy in lec yach'il c'op to. 20Te bit'il ma la ach'uun te bila la calbate, jich yu'un ya me xc'atp'ujat ta uma'. Ma xju' xc'opojat ja' to te c'alal ya sta yorail ya xc'ot ta pasel te bila la calixe —xi' te ch'ul abate.
21Yan te lume yacalic ta smaliyel ta yamac'ul templo te ya xloc' tel te Zacariase. Talel c'axel la sjojc'obey sbaic bi yu'un te jalajem ta yutil te temploe. 22C'alal loc' tel, ma ju' yu'un sc'oponel te lume. Jich la sna'ic stojol te yu'un ay bila ac'bot yil ta sit ta yutil templo. Ja' nax la sc'opon ta swenta seña sc'ab yilic te lume, melel taot ta uma'.
23C'alal ts'acaj te jayeb c'aal ay ta abatinel ta templo te Zacariase, bajt' ta sna. 24Patil la yic' yal te yiname, ja' te Elisabete. Jo'eb u ma ba loc' ta sna, yu'un jich la yal ta yo'tan: 25“Ay bila yac'ojbonix te Cajwaltique. Ya me xlecubix jc'oplal ta stojol te ants-winiquetique”, xi' ta yo'tan.
Ch'ul abat la yal te ya x'ayin te Jesuse
26Waqueb u ta patil te ch'ul abat Gabriel ticunot bael yu'un Dios ta bay lum Nazaret te ay ta sq'uinal Galilea. 27Ba sc'opon jtul jtec'tojom ach'ix, te María sbiile. Macbilix yu'un jtul winic te José sbiile, te ja' sts'umbal te namey q'uinal muc' ajwalil Davide.#Mt 1.18. 28Te ch'ul abat och bael ta banti ay te Mariae, jich la yalbey:
—Tal jpatbat awo'tan ja'at te c'uxtaybilat yu'un te Diose. Sjoinejat te Cajwaltique. Ma'yuc yan ants jich ac'bil bendición ta stojol te bit'ilate —xi'.
29Te c'alal la yil te ch'ul abat te Mariae, bayal xiw yo'tan yu'un te bila albot yu'une. Bayal la snop ta yo'tan te bi swentailuc te spatjibal yo'tan yu'un te ch'ul abate. 30Albot xan yu'un:
—María, ma me xiwat, melel awich'ojix c'uxtayel yu'un te Diose. 31Yo'tic, ya me awic' awal. Jich me ya x'ayin aquerem-al. Jesús sbiil ya xc'ot awu'un.#Mt 1.21. 32Muc' me ya xc'ot, soc “Snich'an te Ch'ul Dios te mero toyol aye” xi' me sbiil ya xc'ot. Te Cajwaltic Diose ya me yac'bey sjelolin ta ajwalil ta smuc'ul nac'tijib te Davide, ja' nix te namey q'uinal state. 33Sbajt'el me q'uinal ay ta ajwalinel yu'un te lum Israele. Ma'yuc bi ora ya xlaj yat'el ta muc' ajwalil#2 S 7.12,13,16; Is 9.7. —xi' te ch'ul abate.
34Te María jich la yalbey te ch'ul abate:
—¿Bit'il ay a te jich ya awalbone? Melel ma to ayuc jmamlal —xi'.
35Jich la yal te ch'ul abate:
—Ya xjul ta awenta te Ch'ul Espiritue. Ya me yaxintesat ta yu'el te Ch'ul Dios te mero toyol aye. Jich te ch'ul alal ya x'ayin awu'une, Snich'an Dios ya xc'ot te sbiile. 36Soc ya calbat awaiy: Te achapomal Elisabet ay me yic'ojix yal manchuc teme me'elixe. Albil sc'oplal te xujt' ma x'alaje, ja'uc me to, swaquebalix u yic'bel te yale. 37Melel te Diose ma'yuc bi ma xju' yu'un stuquel#Gn 18.14; Jer 32.16,27. —xi' te ch'ul abate.
38La yal te Mariae:
—Lec ay, ac'a yabatinon te Cajwaltique. Jich ac'a spasbon Dios te bit'il la awalbone —xi' te Mariae.
Jich sujt' bael te ch'ul abate.
Te Mariae bajt' ta yula'tayel te Elisabete
39Ma ba jal c'aal ta patil, ora bajt' te María ta bay ch'in lum te ay ta witstiquil ta sq'uinal Judea. 40Och ta sna te Zacariase, c'o spatbey yo'tan te Elisabete. 41C'alal patbot yo'tan te Elisabete, la stij sba te alal te ay ta xch'ujt'e soc noj ta yo'tan te Ch'ul Espiritue. 42Tulan jajch' ta c'op:
—Awich'oj bendición yu'un te Diose c'ax jich te bit'il yantic antsetique. Soc yich'oj bendición uuc te alal te ay ta ach'ujt'e. 43¿Bit'il ay a te ja'at tal awilon te sme'at te Cajwale? 44Yu'un te c'alal la caiy stojol te jul apatbon co'tane, bayal sbujts' yo'tan la stij sba ta jch'ujt' te cale. 45¡Bin nax me awutsil te la ach'uunbey sc'op te Cajwaltique, te melel ya me xc'ot ta pasel te bila la yalixe! —xi' te Elisabete.
46La yal te Mariae:
—Te co'tane ya sc'ajintaybey yutsil te Cajwale.#1 S 2.1-10; Sal 113.5-9.
47Bayal sbujts' co'tan ta swenta te Diose te Jcoltaywanej cu'une,#Is 61.10.
48melel la yilon te peq'uelon, jo'on te yabatone.
Ta ora bael to ya me yalic spisil ta cajalcaj alnich'anetic te bit'il bin nax cutsile,
49melel muc' te bila yac'ojbon te Diose te ay yu'el stuquele.
Ch'ul Dios sbiil stuquel.
50Te Diose ya me xc'uxtay ta lamalam spisil ants-winiquetic teme ya yich'ic ta muq'ue.
51Mero muc' te bila spasoj ta swenta te yu'ele: La spuquix bael te mach'atic stoyoj sbaique soc te ay bila snopoj ta yo'tanique.
52La sloq'ues ta smuc'ul nactijib te mach'atic tulanique;
ja' la stoyesbey sc'oplal te mach'atic peq'uel ayique.
53Te mach'atic ayic ta wi'nale, la snojesbeyix xch'ujt'ic ta lequil we'elil;
yan te jc'ulejetique, jochol sc'abic la sticunix bael.
54Tal scoltay te lum Israel te abat yu'une;
Ma ba ch'ay ta yo'tan te ya xc'uxtaye,
55jich nix te bit'il yalojbey te namey q'uinal tatiletic cu'untique,
ja' te Abrahame soc spisil sts'umbal#Gn 17.7. sbajt'el q'uinal —xi' te Mariae.
56Te Mariae ay wan oxeb u la sjoin te Elisabete. Patil sujt' bael ta sna.
Ayin te Juan J'ac'-ich'ja'e
57La sta yuil yajt'alul te ya x'ayin yal te Elisabete. Querem te yale. 58La yaiyic stojol te spat-xujq'ue soc te xchapomal te bit'il bayal c'uxtaybil yu'un te Cajwaltique. Jich tal ta ilel yu'unic. Bayal bujts'naj yo'tanic soc te Elisabete. 59Ta xwaxaquebal c'aal a tal yilic te ya yich' circuncisión ta sbaq'uetal te alale.#Lv 12.3. C'an yac'beyic sjelolin te state, ja' te Zacariase. 60Yan te sme' te alale, jich la yal:
—Ma xju'. Juan ya xc'ot sbiil —xi'.
61Albot yu'unic:
—¿Bi yu'un te jich ya awac'bey sbiile? Melel ma'yuc mach'a jich ay sbiil awu'unic —xiic.
62Jich la sjojc'obeyic te state ta swenta seña sc'abic te bi sbiil ya yac'bey te snich'ane. 63Jich te Zacariase la sc'an tel ch'in welel ch'ujte' yu'un ya sts'ibuy a te bi sbiil ya xc'ote. Tey la sts'ibuy a te Juan sbiil ya xc'ot te snich'ane. Spisilic cham nax la yaiyic yu'un. 64C'alal laj yo'tan ta sts'ibuyel, jam sti' ta ora. Jajch' ta c'op ta yalel te bit'il jelawen yutsil te Diose. 65Spisil te spat-xujq'ue jchajp nax q'uinal la yaiyic yu'un. La spucbeyic sc'oplal ta spamal witstiquil ta sq'uinal Judea te bila c'ot ta pasele. 66Spisil te mach'a la yaiyic stojole ma ba ch'ay ta yo'tanic, soc la sjojc'obey sbaic:
—¿Bi me yilel ya xc'ot ta loq'uel ta patil in alal to? —xiic.
Melel la sna'ic stojol te joinbil yu'un Cajwaltic te alale.
C'ayoj yu'un Zacarías
67Te Zacariase, te stat te alale, noj ta yo'tan te Ch'ul Espiritue. Jajch' ta yalel te sc'op Diose:
68—Jelawen yutsil te Cajwaltic te Dios yu'un Israele.
Yu'un tal scoltay ta libre te lum yu'une.
69La sticunbotic Jcoltaywanej te bayal yu'ele, te ja' sts'umbal David te abat yu'une.
70Jich te bit'il yaloj ta swenta te namey q'uinal ch'ul j'alwanejetic yu'une
71te ya scoltayotic loq'uel ta sc'ab te cajcontrotique soc ta sc'ab te mach'atic yilayejotique.
72Yaloj te ya xc'uxtay te namey q'uinal jme'-jtatique, soc te ma xch'ay ta yo'tan te ch'ul trato yaloje.
73Ja' te jc'axel yaloj ta stojol te namey q'uinal jtatic Abrahame,
74te ya me scoltayotic loq'uel ta libre ta sc'ab te cajcontrotique. Jich me ma'yuc xiwel ya caiytic te ya cac' jbatic ta abatinel yu'une.
75Ch'ulajem co'tantic soc toj co'tantic ta stojol te jayeb c'aal cuxulotique.
76In te ja'ate, ch'in jnich'an, j'alwanej ya xc'oat yu'un te Ch'ul Dios te mero toyol aye.
Melel ya me xneelajat ta xchajbanel sbe te Cajwaltique.#Mal 3.1.
77Ya me awac'bey sna'ic stojol te lum yu'une
te bit'il ya spasbotic perdón yu'un te smulique,
te jich me ya sta scolelic sbajt'el q'uinal.
78Melel ta swenta xc'uxul yo'tan cu'untic te Diose,
te ya yac' loc'uc tel c'alal ta ch'ulchan te mach'a ya yac' sacubuc q'uinal ta jtojoltic,
79swenta yu'un ya me yac' sacubuc q'uinal ta stojol te mach'atic ayic ta sc'ubulil te ijc' q'uinale#Is 9.2. soc ta bay yaxinal te lajele,
soc ya me stojtesotic bael ta sbelal te lamal q'uinale
—xi' te Zacariase.
80Ch'i te alale, soc la yich' yip te yo'tane. Ain ta jochol taquin q'uinal, ja' to te c'alal la sta yorail te bit'il la yac' sba ta ilel ta stojol te lum Israele.
Currently Selected:
San Lucas 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.