San Juan 10
10
Te jcanan-chijetique
1Soc la yal xan te Jesuse:
—Jamal ya calbeyex, te mach'a ma ti'corraluc ya x'och bael ta scorral te chijetique, ja' me j'elec' abi, ja' me j'uts'inwanej abi, melel bayuc ya xwil ochel ta corral. 2Yan te mach'a ya x'och bael ta ti'corrale, ja' jcanan-chij stuquel abi. 3Te jcanan-ti'corrale ya sjambey sti' te corrale. Te chijetique ya sna'beyic sc'op te jcanan-chije. Jich ya yic'tilay ta sbiilic te chijetic yu'une. Ya sloq'ues bael ta corral. 4Te c'alal loq'uemix ta corral spisil te chijetic yu'une, ya xneelaj bael yu'unic. Te chijetique ya sts'aclinic bael, melel ya sna'beyic sba te sc'ope. 5Yan teme ma ja'uc te yajwale, ma sc'an sts'aclinic bael. Ya x'anic bael yu'un, melel ma sna'beyic te sc'ope —xi' te Jesuse.
6Jich la yal ta seña-c'op te Jesuse, ja'uc me to, ma la sna'beyic swentail te bila la yale.
Lequil jcanan-chij te Jesuse
7Jich yu'un te Jesús la xcha'yalbey yaiyic xan:
—Jamal ya calbeyex, jo'on ti'corralon yu'un te chijetique. 8Spisil te mach'atic neel talic cu'une j'eleq'uetic soc j'uts'inwanejetic stuquelic, ja'uc me to, te chijetique ma la sc'an yaiybeyic stojol te sc'opique. 9Jo'on ti'corralon. Te mach'a ya x'och bael ta jwenta, ya me xcol. Jun yo'tan ya x'och soc jun yo'tan ya xloc' ta corral, soc ya me sta swe'el tey a.
10“Te mach'a j'eleq'ue, ja' nax ya xtal elc'ajuc, milawanuc, jinwanuc. Yan te jo'one ja' talon yu'un te ya cac'bey xcuxlejalique, swenta yu'un jich me ay yutsilal te xcuxlejalique. 11Jo'on te lequil jcanan-chijon. Te lequil jcanan-chije, ya yac' sba ta lajel yu'un te chijetique. 12Yan te mach'a tojbil naxe, teme tal te jti'awal ja'mal ts'i'e, ora ya yijq'uitay jilel te chijetique, melel ma yu'unuc. Ya x'an bael. Jich ya xlajic ta ti'el te chijetique soc ya xpujq'uic bael ta anel yu'un. 13Te mach'a tojbil naxe ya xbajt' ta anel, melel tojbil nax soc ma'yuc sc'oplal ta yo'tan te chijetique.
14-15“Jo'on te lequil jcanan-chijone.#Is 40.11; Ez 34; Lc 15.4-5; Heb 13.20. Ya sna'bon jba te Jtate soc ya jna'bey sba uuc.#Mt 11.27; Lc 10.22. Ja' nanix jich jna'bey sba te chijetic cu'une soc ya sna'bonic jba uuc. Soc ya cac' jba ta lajel yu'un te chijetique. 16Ay yantic chijetic cu'un te ma to ochemuc ta bay in corral to. Puersa me ya quic' tel. Jich me ya yaiybonic stojol te jc'ope. Jich jtsojp nax chij ya xc'otic ta spisilic soc jtul nax jcanan-chij ya xc'ot yu'unic.#Ef 2.11-22.
17“Te Jtate c'uxon ta yo'tan yu'un te bit'il ya cac' jba ta lajel, swenta yu'un ya jcha'quich' xan jcuxlejal. 18Ma'yuc mach'a ya spojbon jcuxlejal. Jo'on ya cac' jba ta spasemal co'tan. Ya xju' cu'un ya cac' jcuxlejal, soc ya xju' cu'un ya jcha'quich' xan jcuxlejal. Jich spasojon ta mandal te Jtate —xi' te Jesuse.
19Te c'alal la yaiy stojol te judioetic te bit'il jich la yale, jich ma junuc nax yo'tan sbaic yu'un. 20Ay tsobolic la yalic:
—¿Bistuc ya awaiybeyic stojol te sc'ope? Ay pucuj ta yo'tan. Mero jowejem sjol ta jyalel —xiic.
21Soc ay la yalic:
—Te mach'a ay pucuj ta yo'tane, ma jichuc ya xc'opoj te bit'il in to. ¿Soc ya bal xju' yu'un sjamel sit ma'sitetic te pucuje? —xiic.
Te Jesús ma ba ich'ot ta muc' yu'un te judioetique
22La sta yorail q'uin ta Jerusalén te ja' sna'jibal te bi ora ac'ot ta stojol Dios te temploe. Ja' yorail invierno a. 23Te Jesús yac ta beel ta templo ta bay ti'nail Salomón sbiile. 24Jich te judioetique la stsob sbaic tel ta sjoytayel. Jich la yalbeyic:
—¿Jayeb xan c'aal te ya awac' ayanuc co'tantic awu'une? Teme ja'at te Cristoate, albotic ta jamal caiytic —xiic.
25Te Jesús la yal:
—La calbeyex, ja'uc me to, ma x'ac'an ach'uunbonic jc'op. Te at'eliletic ya jpas ta swenta sbiil te Jtate, ja' testigoetic cu'un. 26Ja'uc me to, ma xach'uunic, yu'un ma chijuquex cu'un, jich nix te bit'il la calbeyexe. 27Te chijetic cu'une ya sna'bonic sba te jc'ope, soc ya jna'bey sbaic uuc. Jich ya sts'aclinonic. 28Jo'on ya cac'bey xcuxlejal sbajt'el q'uinal, soc xujt' ma xch'ayic sbajt'el q'uinal. Ma'yuc mach'a ya spojbon loq'uel ta jc'ab. 29Melel ja' yac'ojbon ta jwenta te Jtate te cajal yu'el stuquele. Ma'yuc mach'a ya xju' ya spojbey loq'uel ta sc'ab te Jtate. 30Te jo'one soc te Jtate jun nax ayon soc —xi'.
31Jich yu'un te judioetique la xcha'leic ton xch'ojic a te Jesuse. 32Te Jesús jich la yalbey:
—Bayal lequil at'eliletic la jpas ta atojolic ta swenta yu'el te Jtate. ¿Bila amen la jpas te ya amilonic ta ch'ojel ta ton yu'une? —xi'.
33Te judioetic la yalic:
—Ma ta swentauc lequil at'elil te ya jmilticat ta tone. Ja' nax ta swenta te ya atoybac'optay te Diose.#Lv 24.16. Melel winicat nax te ya acuy aba ta Diose —xiic.
34Te Jesús jich la yalbey yaiyic:
—Ta bay te mandalil awu'unique ts'ibubil tey a te bit'il la yal te Diose te “ja'ex diosex”,#Sal 82.6. te xie. 35Jich yu'un Dios la yal te ja' diosetic te mach'atic ac'bot ta swentaic te sc'op Diose. Jpisiltic jna'ojtic stojol te ma xju' ta ch'ayel te bi ya yal te Sjun Diose. 36Jich yu'un teme tsabilon yu'un Dios te la sticunon tel ta balumilale, ¿bistuc ya awalbonic te yacon ta stoybac'optayel Dios a te bit'il la cal te ja' Snich'anone? 37Teme ma pajaluc soc yat'el Jtat te bila ya jpase, ma me xach'uunbonic te bila la cal jiche. 38O teme ja' nix yacon ta spasele, manchuc teme ma xach'uunbonic te bila la cale, ja' me x'awich'ic ta muc' te at'eliletic ya jpase, swenta yu'un tey me ya ana'ic ta jc'axel a te jun ayon soc te Jtate —xi' te Jesuse.
39Jich yu'un c'an stsaquic bael yan buelta te Jesuse, ja'uc me to, col bael ta sc'abic.
40Te Jesús bajt' yan buelta c'alal ta jejch' ja' Jordán ta stojol sloq'uib c'aal. Tey jalaj a ta bay la yac' ich'ja' ta neelal te Juane.#Jn 1.28. 41Tsobol tal yilic. Jich la yalic:
—Manchuc teme ma'yuc señail la spas te Juane, ja'uc me to, smelelil te bila la yalbey sc'oplal in winic to —xiic.
42Jich ay tsobol la xch'uunic te Jesuse.
Currently Selected:
San Juan 10: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.