Hageo 1
1
Tac'uyel swenta spasel templo
1Ta xchebal ja'wil yochel ta muc' ajwalil a te Darío, ta sbabial c'aal sjajch'el swenta swaquebal u a, tal sc'op Cajwaltic ta swenta te j'alwanej Hageo ta stojol te jwentainwanej ta Judá, ja' te Zorobabel snich'an Salatiel, soc ta stojol te muc'ul sacerdote te swentainej te sacerdoteetic, ja' te Josué te snich'an Josadac.#Esd 4.24—5.2; 6.14.
2-3Te Cajwaltic te Spisil ya xju' yu'un jich la yal ta swenta te j'alwaneje:
—Te winiquetic ya yalic te ma to yorailuc te ya yich' xan cha'pasel te templo cu'une. 4¿Ja'ex nax bal c'otix yorail te ya xju' ya xnainexix ta buen t'ujbil naetique, manchuc me ja' jinem to stuquel te templo cu'une? 5Jo'on Ajwalilon te Spisil ya xju' cu'un ya calbeyex: Nopaic ta lec te bi yilel te awat'elique. 6Te ja'exe bayal ya xts'unbajex, pero ma'yuc bayal ya aset'beyic sit. Ya xwe'ex, pero ma ba ya xnoj ach'ujt'ic. Ya x'uch'ex, pero ma ba ya xquejch'aj te ataquinti'ilique. Ay ac'u'-apaq'uic ya alapic, pero ma ba ya xq'uixnajex yu'un. Te mach'a ya yaiy ganar, ya yac' ochel ta lomen coxtal c'oem te stojole. 7Jo'on Ajwalilon te Spisil ya xju' cu'un ya calbeyex te yacuc anop awaiyic te bi yilel te awat'elique. 8Moanic bael ta wits, ich'aic tel te'etic tey a, cha'pasaic xan te temploe. Bin nax me co'tan ya x'ainon tey a, soc ya me cac' ta ilel xojobil cutsilal tey a.
9“Te ja'exe bayal bila ya ac'an ya ataic, pero ma'yuc bayal ya ataic. Te bila ya aq'uej ta anaique, jo'on la jch'ojbeyex c'axel, jichuc ic' te ya x'eanot bael yu'un te sulile. Pero ¿bi yu'un? Melel ja' yu'un te jinem te jnae. Yan te ja'exe ja' nax bayal sc'oplal ta awo'tanic ta spasel te anaique. Jo'on Ajwalilon te jich ya cale. 10Ja' yu'un ma xtal ja'al ta atojolic, soc ni ja'uc ay bila ya yac'beyex sitinuc awu'unic te lumq'uinale.#Lv 26.18-20. 11Jo'on te ma ba la cac' tel ja'al ta lumq'uinal, soc ta witstiquil, soc ta sba te trigo, te ts'usubiletic, te olivoetic, soc ta sba te bitic ya yich' tulbeyel sit te ts'unul ta lumq'uinale. Ma ba la cac' tel ja'al ta atojolic ja'ex ants-winiquex, soc ta stojol te chambalametic awu'unique, soc ta sba awawal-ats'unubic —xi' te Cajwaltique.
12Te Zorobabel, te Josué soc te jayeb xan ants-winiquetic, tal xiwel ta yo'tanic yu'un te c'alal la yaiyic te bila albotic yu'un Cajwaltic ta swenta te j'alwanej Hageo. 13Ja'ic c'oponotic yu'un te Hageo te jc'asesej-c'op yu'un Cajwaltic, jich albotic yu'un:
—Jich ya yalbeyex awaiy te Cajwaltique: “Jo'on Ajwalilon te jich ya cal ta jamal: Jo'on joinejex”, xi' me te Diose —xi' te Hageoe.
14-15Te Cajwaltic jich la yac'bey xan jajch'el yip yo'tanic te Zorobabel, ja' te jwentainwanej yu'un Judá, soc te Josué, te ja' muc'ul sacerdote te swentainej te sacerdoteetique, soc te jayeb xan te ants-winiquetique. Chaneb xcha'winic (24) c'aal sjajch'el swaquebal u swenta xchebal ja'wil yich'bel yat'el ta muc' ajwalil a te Darío, jajch' spasic xan te templo yu'un te Dios cu'untique, ja' te Cajwaltic te Spisil ya xju' yu'une.#Esd 5.2.
Currently Selected:
Hageo 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.