Éxodo 1
1
Swocol israeletic ta Egipto
1Ja' sbiilic snich'nab Jacob te pajal bajt'ic ta Egipto soc, te Israel sbiilique: 2ja' te Rubén, Simeón, Leví, Judá, 3Isacar, Zabulón, Benjamín, 4Dan, Neftalí, Gad soc Aser. 5Spisil te snich'nab te Jacob soc te smamataque, ay lajuneb xchanwinic (70) ta jtul. Te José tey ayix stuquel a.#Gn 46.8-27.
6Laj bael te José soc te sbanquiltac, soc te sjo'tac ta ch'iele. 7Ja'uc me to, bayal esmajic te israeletique, c'axem to xan esmajic ta jyalel, mero bayal yipic a c'ot. Noj yu'unic te sq'uinal Egipto.
8Ta patil chicnaj yach'il muc' ajwalil ta Egipto te ma'yuc bay la sna'beyix sc'oplal te José. Jich la yalbey te slumale:
9—Aiya awaiyic stojol, te lum Israel bayal ta jyalel, soc c'axem to xan tulanic a te bit'ilotique. 10Jich yu'un ya me sc'an ya quich'tic jp'ijiltic te yacuc comuc ta esmajel, melel teme ay tal jcontrotic, teme ba xchap sc'opic soque, ya me yac'botic guerra, jich me ya xcolic bael ta jc'abtic#Hch 7.14-19. —xi'.
11Jich yu'un te egipcioetic la sleic tulan jwolwanejetic, te ya stenic ta tulan at'el te israeletique. La yac'beyic spas cha'pam lum te Pitón soc Ramsés te sbiilique. Yu'un ay ta yo'tan te faraón, te muc' ajwalil xi' c'oem yu'un Egipto, te ja' sq'uejibal te sbiluque. 12Te bit'il c'axem to xan yac ta tulan uts'inel te israeletic, tey c'axem to xan yacal ta esmajel a. Jich yu'un te egipcioetic cajic ta xiwel ta stojol te israeletique.
13Te israeletic ochic ta woclajel ta tulan at'el yu'un te egipcioetique. 14La yac'beyic swocol ta tulan at'el ta swots'el ajch'al ta spasel adobe, soc spasel spisil at'el ta q'uinal. Spisil te israeletic bayal xc'uxul la yaiyic te bitic pasbotique. 15Te ajwalil yu'un te Egipto ay bila la snop xan. La sc'opon te Sifra soc te Fúa te jtam-alaletic yu'un te hebreoetique. Jich la yalbey ta stojolic:
16—Te c'alal ya xba awilic te hebrea-antsetic te ya x'alajique, ilawilic ta lec te bi alalil te ya x'ayine. Teme ach'ixe, ac'a cuxinuc, yan teme quereme, milaic —xi' sc'oplalic.
17Ja'uc me to, te jtam-alaletic la xi'ic te Diose. Jich ma ba la spasic te bila mandal la yal te ajwalil ta Egipto, la yac' cuxinuc te ch'in queremetique. 18Te muc' ajwalil yu'un Egipto la sticun ta iq'uel te jtam-alaletique, jich la yalbey:
—¿Bistuc la awac' cuxinuc te alal-queremetique? —xi'.
La sjac' te antsetique:
19—Melel te hebrea-antsetique, ma jichuc te bit'il yantsilel te egipcioetique. Jujp'en ta lec stuquelic, ayinemix yu'unic a te ya xc'ootic xane —xiic.
20-21Ja' swentail te lum israeletic yac ta esmajel soc ta yich'bel yip ta c'axem to xan. Te bit'il ja' la xi'ic Dios te jtam-alaletic, esmajic ta lec ta snaic uuc. 22Te faraón la yalbey mandal spisil te slumale. Jich la yal:
—Ch'ojaic bael ta muc'ja' spisil te alalqueremetic te ya x'ayinique.#Hch 7.19. Yan teme ach'ixetique, ma xawuts'inbey xcuxlejal stuquelic —xi'.
Currently Selected:
Éxodo 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.